Su Bedtuan sa manga Wata nu Kadenan enggu su Kagkakalimua
3
Ilay nu u ngin i kasela nu limu a inenggay nu Ama sa lekitanu! Initimbang tanu nin sa wata nin, na saguna na benal a nabaluy tanu den a manga wata nu Kadenan. Tembu nia ba i sabapan sa di tanu 'gkakilala nu dunia ka di nilan katawan su Kadenan. 2 Manga lusud ku sa tian a papedtayan, saguna na nabaluy tanu den a manga wata nu Kadenan, na di tanu pan katawan u ngin i kadtandangan tanu kanu mangauma a gay ugaid'a katawan tanu i amaika makapayag den 'bpaluman su Isa al-Masih na makailing tanu kanu ngin i aden sa lekanin kagina mailay tanu den sekanin sa matakapala. 3 Na apia entain i aden maya ba i inam'in sia kanu Isa al-Masih na itangka nin i ginawa nin kanu apia ngin a makambudseng sa lekanin kagina su Isa al-Masih na suti.4 Na apia entain i penggula sa kabaladusan na pedsungkang kanu pangitaban kagina su kapembaladusa na kapedsungkang i entu kanu pangitaban. 5 Na katawan nu i nia kinasia nu Isa al-Masih na ibpagawa nin su kabaladusan. Na sekanin na dala man a benal dusa nin. 6 Tembu apia entain i malalayun sa lekanin na di pembaladusa enggu apia entain menem i pembaladusa na da nin kilala su Isa al-Masih enggu da nin tuntayi u entain sekanin.
7 Manga dua na wata, da kanu mapapagakal kanu apia entain. Ka su penggalebek man sa kaikelasan na ikelas sekanin a mana su kaikelas'u Isa al-Masih. 8 Na apia entain menem i penggula sa kabaladusan na luyud kanu Datu na Giadsal kagina su Datu na Giadsal na iganat sa ganatan na pembaladusa den. Na nia man sabapan a kinasia nu Tunggal'u Kadenan na asal'a mabinasa nin su langun na galebekan nu Datu na Giadsal. 9 Na apia entain i nabaluy a wata nu Kadenan na di den enggula sa kabaladusan kagina lu den sa lekanin su uyag-uyag a ebpun kanu Kadenan. Na kagina ka wata den sekanin nu Kadenan na di nin den makapapanalus su kanggalebek'in sa kabaladusan. 10 Na sia tanu ba mailay u entain i manga wata nu Kadenan enggu entain i manga wata nu Datu na Giadsal: Na apia entain i di penggalebek sa kaikelasan enggu di nin ipegkalimu su suled'in na dikena wata nu Kadenan.
11 Nia man tutuma a nangakineg'u den paganay na dait a 'gkakalimua tanu. 12 Di tanu ilingan si Kabil a taw nu Datu na Giadsal ka binunu nin su suled'in. Ngintu guna ka inimatayan ni Kabil su suled'in? Kagina si Kabil na mawag i galebek'in enggu su suled'in menem na ikelas i galebek'in. 13 Tembu ba da kanu 'gkangagaip manga dua na suled amaika kabensian kanu nu dunia. 14 Na sabap kanu kapegkalimu tanu kanu manga suled tanu na katawan tanu i nalepas tanu den kanu kapatay taman sa naaden den sa lekitanu su uyag-uyag a da taman nin. Na apia entain i di mangalimuan na da pan malepas kanu kapatay. 15 Apia entain i 'gkabensian nin su suled'in na talibunu. Na katawan nu bun i dala kanu talibunu su uyag-uyag a da taman nin.
16 Sia tanu ba katawan su tidtu-tidtu a limu sa su Isa al-Masih na ininggihad'in su umul'in sabap sa lekitanu. Na maitu tanu bun ba, dait a inggihad tanu su ginawa tanu sabap kanu manga suled tanu. 17 Na amaika su taw a aden kaaden nin ka 'gkailay nin den su suled'in a pakanasisita ugaid'a da nin edtabangi, na panun ba i kapedtalu nin sa lu sa lekanin su limu nu Kadenan?
18 Manga dua na wata, di tanu mangalimuan sa kadtalu bu atawa ka bitiala bu ugaid'a nia tanu kapangalimuan na inggulalan tanu sa senep sa atay. 19 Na amaika enggulan tanu i entu na matatalanged tanu i lusud tanu kanu bantanga enggu sia kanu adapan nu Kadenan na makalilintad pan su ginawa tanu 20 apia aden manga geda-geda nu atay tanu. Kagina labi a mabagel su Kadenan kumin kanu manga geda-geda nu atay tanu enggu katawan nin su langun-langun. 21 Manga lusud ku sa tian a papedtayan, amaika da geda-geda nu atay tanu, na di tanu kagilekan sa kanu kapangadap tanu kanu Kadenan. 22 Na apia ngin i pangenin tanu sa lekanin na inggay nin sa lekitanu kagina 'bpaginugutan tanu su kasuguan nin enggu penggalebeken tanu su ngin i pakasuat sa lekanin. 23 Nia kasuguan nu Kadenan na su kasalig sia kanu ingala nu Tunggal'in a su Isa al-Masih enggu su kagkakalimua a mana bun su inisugu nin sa lekitanu. 24 Na apia entain i 'bpaginugut kanu kasuguan nu Kadenan na lusud sekanin kanu Kadenan taman sa tapiden sekanin nu Kadenan. Na nia ukit a katawan tanu i pedtapiden tanu nu Kadenan na sia kanu kapalalayun nin sa lekitanu kanu Suti a Ruh.