2
Manga dua na wata, inisulat ku i nia sa lekanu asal'a di kanu embaladusa. Na amaika menem ka makandusa tanu na nia mamagelet sa lekitanu sia kanu Ama na su Isa al-Masih a ikelas. 2 Ka sekanin i nabaluy a kurban u panun i kaampun kanu kabaladusan tanu. Dikena bu lekitanu a kabaladusan ka apia su kabaladusan nu sakadunia.3 Na nia amadan sa katawan tanu su Kadenan na amaika ipenggulalan tanu su manga kasuguan nin. 4 Na pakandalebut su pedtalu sa katawan nin kun su Kadenan inunta na di nin ipenggulalan su kasuguan nin. Dala sa lekanin su bantang. 5 Ugaid'a apia entain menem i 'bpaginugut kanu kadtalu nu Kadenan na saben-sabenal a natalutup den su limu nin kanu Kadenan. Na kanu maya ba a ukit na katawan tanu i lusud tanu sa lekanin. 6 Na su pedtalu sa lusud sekanin kanu Kadenan na dait a maguyag-uyag sekanin sa mana su kinapaguyag-uyag'u Isa al-Masih.
7 Manga lusud ku sa tian a papedtayan, na dikena man bagu a kasuguan i inisulat ku a nia sa lekanu ka andang den a san sa lekanu enggu nia bun ba su panduan a nangakineg'u den. 8 Ugaid'a madtalu bu a bagu a kasuguan su nia kagina 'gkadadag den su malibuteng enggu pakatayaw den su maliwanag. Kagina nia nin man kabantangan na nailay den man su entu a kasuguan sia kanu kinapaguyag-uyag'u Isa al-Masih enggu 'gkailay bun i entu sia kanu kabpaguyag-uyag'u.
9 Na apia entain i edtalu sa lusud sekanin kanu maliwanag inunta na 'gkabensian nin su suled'in na lu pamun sekanin nalusud kanu kalibutengan. 10 Na apia entain i ipegkalimu nin su suled'in na sia 'bpaguyag-uyag kanu maliwanag enggu dala sa lekanin su 'gkadsabapan na kambaladusa. 11 Ugaid'a apia entain menem i 'gkabensi kanu suled'in na sia sekanin malusud kanu kalibutengan enggu entu bun ba i 'bpelalakawan nin. Di nin katawan u endaw sekanin pebpawang kagina pinisek sekanin nu kalibutengan.
Di Kalilini kanu Dunia
12 Pedsulatan ku sekanu manga dua na wata, kagina inampun den su manga kabaladusan nu sabap kanu Isa al-Masih.
13 Pedsulatan ku sekanu a manga ama kagina katawan nu den su sekanin a iganat pan sa ganatan na san den.
Pedsulatan ku sekanu a manganguda kagina tinabanan nu den su Datu na Giadsal.
14 Pedsulatan ku sekanu manga dua na wata, kagina katawan nu den su Ama.
Pedsulatan ku sekanu a manga ama kagina katawan nu den su sekanin a iganat pan sa ganatan na san den.
Pedsulatan ku sekanu a manganguda kagina mabagel i salig'u enggu lalayun sa lekanu su kadtalu nu Kadenan taman sa tinabanan nu den su Datu na Giadsal.
15 Na di nu kalilini su dunia atawa ka su apia ngin a nakadalem lun, ka apia entain i malilini kanu dunia na di nin ipegkalimu su Ama. 16 Kagina su langun na nakadalem sa dunia a mana su mawag a kiug'u ginawa enggu su 'gkailay nu mata a 'gkadsagikel'u ginawa taman kanu kabpemamasela sabap kanu ngin i aden kanu taw, na dikena i entu ebpun kanu Ama ka ebpun i entu kanu dunia. 17 Su dunia enggu su langun nu entu a nakadalem lun a 'gkadsagikel'u ginawa na 'gkadadag bun su entu ugaid'a su penggalebek kanu kahanda nu Kadenan na maguyag-uyag sa da taman nin.
Su 'Bpamedsungkang kanu Isa al-Masih
18 Manga dua na wata, nia den ba man su manga mauli a gay! Nakineg'u bun i pakauma su taw a pedsungkang kanu Masih.a Ugaid'a apia man saguna na madakel den a penggemaw a 'bpamedsungkang kanu Isa al-Masih. Tembu ba 'gkatawan tanu i nia den ba su manga mauli a gay. 19 Na apia nadtagapeda tanu den su nia a manga taw kanu paganay na dikena silan lusud sa lekitanu. Kagina amaika lusud silan sa lekitanu na tatap tanu silan madtatagapeda. Ugaid'a minawa silan sia sa lekitanu asal'a makapailay nu Kadenan i saben-sabenal a langun nilan na dikena lusud sa lekitanu.
20 Ugaid'a sekanu, na san den sa lekanu su kapegkagaga nu Ruh a ebpun kanu kaisa-isa nin a Suti a su Isa al-Masih taman sa katawan nu den langun su bantang. 21 Dikena nia ku kapedsulat sa lekanu i di nu katawan su bantang ka katawan nu bun su entu enggu katawan nu bun i dala man kabudtud a ebpun kanu bantang. 22 Na entain ba i budtuden, dikena ba su manga taw a ipegkias'in i su Isa na su Masih?b Silan ba a entu su manga taw a 'bpamedsungkang kanu Isa al-Masih kagina ipegkias'ilan su Ama enggu su Tunggal'in. 23 Na apia entain i pegkias kanu Tunggal'in na da malusud kanu Ama. Ugaid'a apia entain menem i ipebpayag'in i 'bpaginugutan nin i su Isa al-Masih na Tunggal'u Kadenan na nalusud sekanin kanu Ama. 24 Na sekanu na palalayun nu kanu atay nu su langun na nangakineg'u kanu nangauna pan a timpu. Ka amaika mapalalayun sa lekanu su entu na mapalalayun kanu bun mambu kanu Tunggal enggu kanu Ama. 25 Ka nia man i inibpasad'u Isa al-Masih sa lekitanu na su uyag-uyag a da taman nin.
26 Na ipedsulat ku sa lekanu su makapantag kanu manga taw a papedsibay sa lekanu. 27 Ugaid'a sekanu, na san den sa lekanu su kapegkagaga nu Suti a Ruh a pinalangkap'u Isa al-Masih tembu di nu den nasisita su apia entain a mamandu pan sa lekanu. Ka su kapegkagaga nu Suti a Ruh i 'bpamandu sa lekanu kanu langun-langun enggu benal su ibpamandu nin, dala kalebut'in. Na kagina ka maitu na palalayun kanu kanu Isa al-Masih a mana bun su inipamandu nu Ruh sa lekanu.
28 Na saguna manga dua na wata, na palalayun kanu sa lekanin ka enggu sia kanu kauma nin na di tanu kagilekan mangadap sa lekanin taman sa di tanu lun kayan. 29 Na amaika katawan nu i ikelas sekanin na dait a katawan nu bun i natatalanged i apia entain i penggula sa kaikelasan na nabaluy den a wata nu Kadenan.