1 Yuhan 1

Ika-isa a Sulat'i Yuhan

Su Kinapayag kanu Kadtalu

Nia su sulat ku sa lekanu pantag kanu Kadtalu a 'gkabpunan nu uyag-uyag a da taman nin. San den sekanin iganat pan sa ganatan. Nakineg'ami enggu nailay demun nu dua embala a mata nami taman sa naami nami sekanin. 2 Na su uyag-uyag a nia a da taman nin na nakapayag den enggu nailay nami den. Na ibpangimbenal'ami enggu ipebpayag'ami sa lekanu su uyag-uyag a nia a da taman nin a lu den kanu Ama unan pan nu kinapangaden enggu inipayag den sa lekami. 3 Na ipebpayag'ami sa lekanu su ngin i nailay nami enggu nakineg'ami ka asal'a makaamung kanu bun kanu kabpagisa-isa nami a su kabpagisa-isa sia kanu Ama enggu kanu Tunggal'in a su Isa al-Masih. 4 Na inisulat'ami i nia sa lekanu ka enggu matalutup su kagalaw tanu.

Su Taw a 'Bpelalakaw kanu Maliwanag enggu su Taw a 'Bpelalakaw kanu Kalibutengan

5 Na nia su nakineg'ami a kadtalu nu Isa al-Masih a ipebpayag'ami sa lekanu: Su Kadenan na sigay enggu dala sa lekanin su kalibutengan. 6 Na pakandalebut tanu amaika edtalun tanu i 'bpagisa-isa tanu kanu Kadenan inunta na nia tanu 'bpelalakawan na su kalibutengan enggu dikena tanu 'bpaguyag-uyag sa bantang. 7 Ugaid'a maaden sa lekitanu su kapagisa-isa amaika sia tanu 'bpelalakaw kanu maliwanag a mana su sekanin a entu a lu sa lekanin su sigay taman sa su langun nu kabaladusan tanu na mapunas sia makanggulalan kanu kinatuga nu lugu nu Tunggal'in a su Isa al-Masih.

8 Na amaika edtalun tanu i dala kabaladusan tanu na pedsalimbuten tanu su ginawa tanu enggu dala sa lekitanu su bantang. 9 Ugaid'a amaika taliman tanu i mimbaladusa tanu na su Kadenan a matidtu enggu kasaligan na ampunen nin su kabaladusan tanu taman sa su langun na kadaluakan a galebekan tanu na punasen nin den. 10 Amaika edtalun tanu menem i dala tanu makandusa na papendalebuten tanu su Kadenan enggu su kadtalu nin na dala makatagu kanu pamusungan tanu.