5
Na apia entain i 'bpaginugutan nin i su Isa na sekanin su Masih na su entu ba a taw na nabaluy den a wata nu Kadenan. Na apia entain i malimu kanu ama na malimu bun kanu wata nin. 2 Amaika ipegkalimu tanu su Kadenan enggu ipenggulalan tanu su kasuguan nin na katawan tanu i pakakalimu tanu bun su nabaluy a manga wata nu Kadenan. 3 Ka maitu ba i ukit a kapegkalimu kanu Kadenan amaika ipenggulalan tanu su kasuguan nin. Na dikena man malegen a ipenggulalan su manga kasuguan nin 4 kagina apia entain i nabaluy a wata nu Kadenan na tinabanan nin den su dunia. Na nia tanu kinataban kanu dunia na sabap kanu salig tanu. 5 Na entain ba man i makagaga temaban kanu dunia, dikena ba su 'bpamaginugut sa su Isa al-Masih na su Tunggal'u Kadenan?Su Pangimbenal pantag kanu Isa al-Masih
6 Na su kinasia nu Isa al-Masih sa dunia na napasalawat sekanin sa ig enggu napatuga sa lugu. Na dikena bu sekanin matag sinalawatan sa ig sa amadan sa sekanin su Tunggal'u Kadenan ka apeg den su kinatuga nu lugu nin. Su Ruh nu Kadenan demun i 'bpangimbenal kanu entu ka su langun nu kadtalu nu Ruh nu Kadenan na bantang. 7-8 Na su Ruh nu Kadenan enggu su ig apeg'u lugu na nia ba i 'bpangimbenal kanu Isa al-Masih. Isa bu i ibpangimbenal'ilan pantag sa lekanin. 9 Na amaika pedtaliman tanu su kapangimbenal'u manusia, na labi a taliman tanu su kapangimbenal'u Kadenan. Na su entu a inipangimbenal'in na makapantag kanu Tunggal'in. 10 Na apia entain i pedsalig kanu Tunggal'u Kadenan na naginugut kanu inipangimbenal a entu. Ugaid'a apia entain menem i di pedsalig sa entu na papendalebuten nin su Kadenan kagina di nin 'bpaginugutan su ibpangimbenal'u Kadenan pantag kanu Tunggal'in. 11 Na nia ba su inipangimbenal'in: Inenggay nu Kadenan sa lekitanu su uyag-uyag a da taman nin enggu su Tunggal'in i 'gkabpunan nu nia ba a uyag-uyag a da taman nin. 12 Kagina ka maitu na apia entain i nalusud kanu Tunggal'u Kadenan na lu den sa lekanin su uyag-uyag a da taman nin. Ugaid'a apia entain menem i dala malusud kanu Tunggal'u Kadenan na dala lu sa lekanin su uyag-uyag a da taman nin.
Su Taw a Makatalima sa Uyag-uyag a Da Taman nin
13 Na ipedsulat ku i nia sa lekanu a 'bpamedsalig kanu ingala nu Tunggal'u Kadenan asal'a 'gkatawan nu i san den sa lekanu su uyag-uyag a da taman nin. 14 Na nia makagkabagel kanu manggiginawa tanu sa kanu kapangadap tanu kanu Kadenan na u mangeni tanu sa apia ngin a sia luyud kanu kahanda nin na pakikinegen tanu nin. 15 Na amaika katawan tanu i 'bpakikinegen tanu nin, na katawan tanu bun i apia ngin i pangenin tanu sa lekanin na inggay nin sa lekitanu. 16 Na apia entain i makailay kanu suled'in a penggula sa kabaladusan a dikena bun menem nia nin kabpawangan na kapataya na ipangeni-ngeni nin asal'a makambalingan sekanin kanu Kadenan. Na nia maena nu pedtalun ku a nia na su manga taw a pembaladusa sa dikena nia nin kabpawangan na kapatay. Kagina aden bun manga kabaladusan a nia nin kabpawangan na kapatay,b na dikena ku i entu pedtalun sa lekanu sa ipangeni-ngeni nu su apia entain a enggalebek sa maitu ba. 17 Ka benal man a langun na kadaluakan a galebek na kabaladusan ugaid'a aden kabaladusan a dikena bun nia nin kabpawangan na kapatay.
18 Na katawan tanu i langun nu nabaluy a wata nu Kadenan na di nin den papanalusen su kanggalebek'in sa kabaladusan ka pedtiakapan silan nu Tunggal'u Kadenan taman sa di silan 'gkaleseb'u Datu na Giadsal. 19 Katawan tanu i sia tanu nalusud kanu Kadenan, apia pendatuan pan nu Datu na Giadsal su sakadunia. 20 Katawan tanu i sinemia den su Tunggal'u Kadenan enggu inenggan tanu nin sa itungan asal'a makilala tanu su tidtu a Kadenan. Na lusud tanu kanu tidtu a Kadenan kagina nalusud tanu kanu Tunggal'in a su Isa al-Masih. Sekanin su tidtu a Kadenan enggu su uyag-uyag a da taman nin.
21 Kagina ka maitu manga dua na wata, na tangkai nu su manga pegkakadenanen.
Wassalam