Su Kinambibitiala lu sa Awrusalim
15
Ugaid'a aden manga taw a nakauma sa Antiuk ebpun sa Yudia a nia nilan ibpamamandu kanu 'bpamaginugut na “Amaika da kanu pamun mapaletak sia kanu kasuguan nu Musa na di kanu malipuas.” 2 Na da kaayuni ni Bulus enggu Barnabas su entu taman sa namakabpapalawa silan sa tidtu. Daka nia napagayunan na palun sa Awrusalim si Bulus enggu si Barnabas apeg'u ped a 'bpamaginugut ka enggu nilan makapagilaya su manga sinugu nu Isa al-Masih enggu su 'gkangaunutan pantag kanu nia a bitiala.3 Daka pinaganat mambu silan nu 'bpamaginugut. Na guna silan makaaut sa Pinisia enggu Samaria na pinanudtul'ilan 'bpia-pia kanu 'bpamaginugut lu su kinapaginugut'u manga taw a dikena-Yahudi. Na su entu a katigan na sangat a nakagkapia kanu manggiginawa nilan. 4 Na guna makauma si Bulus enggu Barnabas lu sa Awrusalim na sinakaw silan nu 'gkangaunutan enggu su manga sinugu taman den kanu langun nu 'bpamaginugut lu. Pinanudtul'ilan su langun na pinggula nu Kadenan a sia nakanggulalan kanilan. 5 Ugaid'a su ped a 'bpamaginugut lu a lusud kanu lumpukan a Parisiyu na midtindeg silan ka nia nilan pidtalu na “Dait a mapapaletak su 'bpamaginugut a dikena-Yahudi ka nasisita i unutan nilan su manga kasuguan nu Musa.”
6 Na mindidilimudan su manga sinugu enggu su 'gkangaunutan ka pimbitiala nilan su pantag kanu entu. 7 Ulian nu malu malendu a kinambibitiala nilan na midtindeg si Pitru ka nia nin pidtalu na “Manga lusud ku sa tian, katawan nu i kanu paganay na pinamili aku nu Kadenan san sa lekanu a makapangusiat ku su Mapia a Tutuma lu kanu manga taw a dikena-Yahudi asal'a makineg'ilan taman sa paginugutan nilan su entu. 8 Su Kadenan a pakataw kanu dalem'u atay nu manusia na inipaamad'in i tinalima nin su dikena-Yahudi kanu kinapalangkap'in kanu Suti a Ruh kanilan a mana bun su kinapalangkap'in sa lekitanu. 9 Da tanu pambidaya nu Kadenan kanu manga taw a dikena-Yahudi ka linimpiu nin bun su atay nilan taman sa inampun nin silan sabap kanu salig'ilan. 10 Na enduken ka 'bpagunanan nu su kiug'u Kadenan? Kagina pebpaliugatan nu su 'bpamaginugut a dikena-Yahudi sa dait a unutan nilan su kasuguan nu Musa a apia sekitanu na da tanu magaga enggulalan, maitu bun su manga katupuan tanu. 11 Ugaid'a nia tanu man 'bpalitialan na malipuas tanu sabap kanu limu nu Mapulu a su Isa al-Masih, na maitu bun ba su manga taw a dikena-Yahudi.”
12 Na guna su maitu na nakalenek su langun nu taw lu ka pinakikineg'ilan su 'bpanudtulen ni Barnabas enggu Bulus pantag kanu kabarakatan a ininggulalan nu Kadenan kanilan lu kanu manga taw a dikena-Yahudi. 13 Ulian nu kinadtalu-talu nilan na nia menem midtalu-talu na si Yakub sa “Manga lusud ku sa tian, pakikineg aku nu. 14 Bagu pamun i kinadsinantal'i Simiun Pitru sa lekitanu u panun i muna-muna demun a kinapailay nu Kadenan kanu limu nin kanu manga taw a dikena-Yahudi asal bu na malusud bun sa lekanin su ped kanilan. 15 Na su pedtalun ni Pitru a entu na nagayun kanu kadtalu nu manga nabi a sia kanu kitab sa nia kadtalu nu Kadenan na
16 ‘Ulian nu nia na embalingan aku
ka patindegen ku su nakadadsang a pendatuan nu Daud.
Umbayan ku kanu kinageba nin
ka patindegen ku menem 'bpaluman
17 asal'a su langun na dikena-Yahudi a pinamili ku a makaluyud sa laki na mapangilay aku nilan.
18 Na maitu ba su kadtalu nu Kadenan
a napatuntay kanu langun nu nia kanu paganay pan a timpu.’a
19 “Kagina ka maitu na nia laki na di tanu pakapasangan su dikena-Yahudi a 'bpamedsangul kanu Kadenan. 20 Nia pan mula na edsulatan tanu silan sa di silan keman sa apia ngin a iniapal sa balahala, di edsisina, di keman sa pinamekel bu a binatang enggu di silan keman sa lugu. 21 Kagina iganat pan sa paganay na ibpangusiat den su nia a kasuguan nu Musa kanu langun na dalepa enggu pembatian uman mauma su Gay nu Kabpangintelenen kanu manga walay a pedsambayangan tanu.”
Su Sulat kanu 'Bpamaginugut a Dikena-Yahudi
22 Daka nia napagitung'u manga sinugu nu Isa al-Masih enggu su 'gkangaunutan taman den kanu manga tagapeda nilan a 'bpamaginugut na mamili silan sa masugu a ganat bun kanilan a madtagapeda ni Bulus enggu Barnabas lu sa Antiuk. Na nia nilan napamili na su 'gkangaunutan nu lumpukan nu 'bpamaginugut a si Silas enggu si Yahuda a bedtuan sa Barsabas. 23 Na aden sulat a napananggit'ilan a nia lun nakadalem na
“Sa lekanu a manga lusud'ami sa tian a dikena-Yahudi a 'bpamaginugut san sa Antiuk, sa Syria enggu Silisia na pedsalamen kanu nu manga lusud'u sa tian sia sa Awrusalim a su manga sinugu nu Isa al-Masih enggu su 'gkangaunutan.
24 “Na nakineg'ami i su ped a manga taw a ebpun bun sa lekami na sinemamuk sa lekanu enggu nabulibug'ilan su itungan nu sabap kanu panduan nilan. Na da nami silan masugu sa man. 25 Kagina ka maitu na namagayun kami sa mamili sa manga masugu nami san a maped'u manga papedtayan tanu a si Barnabas enggu si Bulus 26 a minggihad kanu ginawa nilan kanu ingala nu Mapulu a su Isa al-Masih. 27 Tembu ba sinugu nami si Yahuda enggu si Silas ka silan i mataw edtalu pantag kanu nakadalem kanu nia a sulat.
28 “Na sia kanu tutulu nu Suti a Ruh na napagayunan nami i di nami sekanu enggan sa lidu na ginawa a mapamawa nu, liu sa kanu nia a balapantag a kasuguan: 29 Da kanu keman sa apia ngin a iniapal sa balahala, da kanu bun keman sa lugu enggu pinamikel a binatang enggu da kanu edsisina. Na 'gkakakapia kanu amaika itangka nu su ginawa nu kanu entu. Sia bu taman. Wassalam.”
Su Kinatalima nu manga Dikena-Yahudi kanu Sulat
30 Guna su maitu na pinaganat den su manga sinugu a entu, na kanu kinauma nilan sa Antiuk na linimud'ilan su 'bpamaginugut lu entu pan ka inenggay nilan su sulat. 31 Na guna mabatia nu 'bpamaginugut su sulat na nangagalaw a benal silan ka nakagkabagel i entu kanu manggiginawa nilan. 32 Sabap sa si Yahuda enggu si Silas na manga nabi bun, na madakel i inipamandu nilan kanu 'bpamaginugut taman sa pinagkabagel'ilan su salig'ilan. 33 Na midtangen pan silan lu sa namakapila gay. Ulian nu entu na mimbalingan silan sa Awrusalim lu kanu sinemugu kanilan ugaid'a inipangeni-ngeni muna silan nu 'bpamaginugut sa da bun baya-baya nilan bagu silan ginemanat. 34-35 Na migkalidtabun si Bulus enggu si Barnabas sa Antiuk ka namamandu enggu nangusiat pan silan lu. Na aden bun ped a 'bpamamandu enggu 'bpangusiat lu kanu kadtalu nu Mapulu.
Su Kinabpitas'i Bulus enggu Barnabas
36 Na kanu kinaipus'u entu na pidtalu ni Bulus kani Barnabas i “Embalingan ta kanu langun nu dalepa a pinangusiatan ta kanu kadtalu nu Mapulu ka enggu ta mailay lu u ngin i betad'u 'bpamaginugut lu.” 37 Na si Barnabas na nia nin pegkiugan pebpagunut na si Yuhan a bedtuan bun sa Markus. 38 Ugaid'a nia kani Bulus na di dait a makaunut sekanin sabap kanu kinapitas'in kanilan lu sa Pampilia enggu da nin patalusa su galebekan nilan. 39 Na dala silan makapagayun sa bitiala taman sa nakabpitas silan. Pinaunut'i Barnabas si Markus ka linemayag silan 'bpawang sa Saiprus. 40 Ugaid'a si Bulus menem na nia nin pinamili na si Silas. Na ulian nu kinatapenay nu 'bpamaginugut kanilan kanu limu nu Kadenan na ginemanat silan. 41 Na si Bulus enggu si Silas na lu minukit sa Syria enggu Silisia ka pinagkabagel'ilan su salig'u 'bpamaginugut lu.