Su Kinasenggay kani Saul enggu Barnabas sa Kanggalebek'ilan sia kanu Kadenan
13
Na aden manga nabi enggu aden bun 'bpamamandu lu kanu lumpukan nu 'bpamaginugut sa Antiuk a si Barnabas, si Simiun a bedtuan bun sa Maitem, si Lusius a taw sa Sirin, si Saul enggu si Manain a isa bu i kinagkasela nilan kanu Hirud.a 2 Na gay nilan pebpuasab enggu pedsimba kanu Kadenan na nia pidtalu nu Suti a Ruh kanilan na “Isenggay nu si Barnabas enggu si Saul ka enggu nilan manggalebek su galebekan a iniumun ku kanilan.” 3 Guna su nakapasad silan 'bpuasa enggu mangeni-ngeni na dinapenetan nilan si Barnabas enggu si Saul entu pan ka pinaganat'ilan.Su Kinapangusiat kanu Mapia a Tutuma lu sa Saiprus
4 Na guna su nakapaganat den silan nu Suti a Ruh na linemu den silan sa Silusia taman sa linemayag silan 'bpawang sa Saiprus. 5 Guna silan makauma sa Salamis na inipangusiat'ilan su kadtalu nu Kadenan lu kanu manga walay a pedsambayangan nu manga Yahudi. Kaped'ilan bun si Yuhanc a pedtabang kanilan.
6 Guna su nataneb'ilan su manga dalepa a entu taman sa nakauma silan sa Papus na aden nakadtalabuka nilan a Yahudi a 'bpangalintaw enggu 'bpenabi-nabi a bedtuan sa Bar-isa, 7 a masupeg a benal a pakat'u balaitungan a gubilnadul a si Sergius Paulus. Pinaangayan nu gubilnadul si Barnabas enggu si Saul ka kiugan nin makikineg su kadtalu nu Kadenan. 8 Ugaid'a su 'bpangalintaw a entu a si Bar-isa (Ilimas i ngala nin sa Grik) na pedsungkangen nin si Saul enggu si Barnabas asal'a di makapalitiala su gubilnadul kanu kadtalu nu Kadenan. 9 Daka si Saul a entu a bedtuan bun sa Bulus a linangkapan nu Suti a Ruh na pinandang'in su mama a 'bpangalintaw taman sa 10 pidtaluan nin sa “Seka, saitan ka, dupang ka a benal, budtuden ka enggu sungkang ka kanu langun nu mapia. Nginan, di nengka den katelenan i kapapedsibay nengka kanu matidtu a lalan kanu Kadenan? 11 Na ilay ka, makatingguma sa leka su siksa nu Kadenan, mabulag ka, di nengka pan babaya mailay su mata nu senang.” Daka midsambuta demun i da nin kailay taman sa nakapangabul sekanin ka nangilay sa makatundan lun. 12 Guna mailay nu gubilnadul su nanggula a entu na naginugut sekanin enggu nagaip bun i ginawa nin kanu usiatan makapantag kanu Mapulu.
Su Kinadtalu-talu ni Bulus lu sa Antiuk a Masupeg sa Pisidia
13 Iganat sa Papus na linemayag si Bulus enggu su manga tagapeda nin 'bpawang sa Pirga lu sa Pampilia. Na tinagak silan ni Yuhant ka mimbalingan lu sa Awrusalim. 14 Iganat menem sa Pirga na tinemalus silan sa Antiuk a masupeg sa Pisidia. Na kanu Gay nu Kabpangintelenen nu manga Yahudi na linemu silan kanu walay a pedsambayangan nilan ka nagagayan silan makikineg. 15 Na ulian nu kinabatia kanu Kitab Taurat enggu kanu manga Kitab a Inisulat'u Manga Nabi na inipasampay nu 'gkangaunutan nu walay a pedsambayangan kani Bulus enggu Barnabas i “Manga lusud'ami sa tian, amaika aden makapangusiat'u kanu manga taw a nia na mapakay a ipangusiat'u.” 16 Na midtindeg si Bulus ka pinggulinganan nin silan enggu nia nin pidtalu na “Manga lusud ku sa tian a manga taw a Israild enggu su manga taw a dikena Israil a aden gilek'in kanu Kadenan na pakikineg kanu. 17 Su Kadenan a pedsimban tanu a manga taw a Israil na pinamili nin su manga kalukesan tanu taman sa pinagkadakel'in silan kanu timpu a lapu silan sa Egypt. Sabap kanu bagel'u Kadenan na pinaliu nin bun silan kanu entu a inged. 18 Kanu dalem'u patpulu lagun lu kanu tawan-tawan a dalepa na pidsabalan bu silan nu Kadenan. 19 Ulian nu kinabinasa nu Kadenan kanu pitu katribu sa Kanaan na inenggay nin kanilan su entu a dalepa a mabpusaka nilan.
20 “Na su langun nu nia na nanggula kanu dalem'u manga nakapat gatus enggu limapulu lagun.
“Na ulian nu entu menem na inenggay nu Kadenan kanu manga kalukesan su 'bpamangukum taman den kanu timpu nu Nabi Samuil. 21 Na guna menem silan pangeni sa sultan na inenggay nu Kadenan kanilan si Saul a wata ni Kis a tupu nu Buniamin. Na mindatu si Saul kanilan kanu dalem'u nakapatpulu lagun. 22 Na guna menem iawa nu Kadenan si Saul na inisambi nin su Daud a makadsultan. Na nia pidtalu nu Kadenan pantag sa lekanin na ‘Sia ku nailay kanu Daud a wata ni Yisi su pakasuat sa laki. Na penggulan nin su langun nu kahanda ku sa lekanin.’e
23 “Na kanu muliataw nu nia a mama nakabpun su Isa al-Masih a inibpasad'u Kadenan a mamelipuas kanu taw a Israil. 24 Unan nu kauma nin, na inipangusiat'u Yahiya kanu langun nu taw a Israil sa dait a edtataubat silan taman sa mapasalawat silan. 25 Guna su 'gkapasad den nu Yahiya su galebek'in na inidsa nin i ‘Ngin i kataw nu sa laki, saki su Masih? Dikena saki su entu ugaid'a mangagan den sekanin makauma. Na apia su kapukas ku kanu ampis'u ay nin na di aku makadait.’ ”
26 Pidtalu pan ni Bulus i “Manga lusud ku sa tian magidsan i tupu nu Ibrahim enggu dikena tupu nu Ibrahim a aden gilek'in kanu Kadenan, na sia sa lekitanu inisampay su kalipuasan. 27 Su manga taw sa Awrusalim enggu su 'gkangaunutan nilan na dala nilan kasabuti i su Isa al-Masih su 'bpamelipuas taman sa dala nilan bun katuntayi su pedtalun nu manga nabi a pembatian den uman mauma su Gay nu Kabpangintelenen. Ugaid'a silan bun i nakatuman kanu kadtalu nu manga nabi pantag kanu kaimatay kanu Isa. 28 Ka apia dala dait a imatay nilan lun na pinangeni nilan bun kani Pilatu i paimatayan sekanin. 29 Na guna nilan den matuman su nakasulat pantag sa lekanin na inibaba nilan kanu kayu a pinambalawaga ka inikubul'ilan. 30 Ugaid'a pinambibiag 'bpaluman nu Kadenan su Isa. 31 Na kanu dalem'u namakapila gay na mibpapayag sekanin kanu manga tagapeda nin a minunut sa lekanin lu sa Awrusalim ebpun sa Galili. Silan su nabaluy a manga saksi nin kanu manga taw.
32 “Na saguna na ipedsampay nami sa lekanu su Mapia a Tutuma a inibpasad'u Kadenan kanu manga kaapuan tanu. 33 Natuman den nu Kadenan su pasad a nia sa lekitanu a manga muliataw nilan sa kanu kinapamili nin kanu Isa. Nakasulat i nia kanu ikadua a Sengal sia kanu Kitab Zabur a
‘Seka su Tunggal a wata ku,
saguna na ipebpayag ku i saki su Ama nengka.’f
34 Kagina ka pinambibiag den sekanin nu Kadenan na di den sekanin matay 'bpaluman. Na nia kadtalu nu Kadenan sia kanu kitab na
‘Saben-sabenal a pedtumanen ku sa lekanu
su manga inibpasad ku kanu Daud.’g
35 Nadtalu bun kanu ped a Sengal sia kanu Kitab Zabur i
‘Di nengka padtadayn a temala sa kaledak su Tunggal'engka a Suti.’h
36 Na su Daud na guna nin den matuman su kahanda nu Kadenan kanu timpu nin na minatay bun sekanin. Lu sekanin inikubul kanu ubay nu manga lukes'in taman sa lu den ba sekanin naledak. 37 Ugaid'a su Isa al-Masih a pinambibiag'u Kadenan na da sekanin maledak.
38 “Kagina ka maitu manga lusud ku sa tian, na dait a katuntayan nu i sia nakanggulalan kanu Isa na pakapangusiat sa lekanu su kaampun kanu manga kabaladusan. 39 Na su langun nu maginugut sa lekanin na makalipuas kanu langun na kabaladusan a di magaga lemipuas'u kasuguan a sia nakanggulalan kanu Musa. 40 Na abungi nu i sekanu i masugat'u nakasulat'u manga nabi a kadtalu nu Kadenan a
41 ‘Sekanu a 'bpamedsudi na ilay nu,
magaip kanu sa ngin i enggulan ku sa lekanu taman sa matay kanu.
Kagina gagalu nu bibiag kanu pan na aden itingguma ku sa lekanu a manggula a di nu a benal kapalitialan,
apia aden pan edtalu lun sa lekanu.’i”
42 Na kanu kabpeliu ni Bulus enggu Barnabas na pinangeni nu manga taw i madsinantal'ilan 'bpaluman i nia kanu temundug a Gay nu Kabpangintelenen. 43 Guna su napasad su kinandidilimuda na madakel kanu manga Yahudi enggu su minunut kanu agama nu Yahudi i minunut kani Bulus enggu Barnabas. Inibpaliugat'ilan kanu manga taw a entu i papanalusen nilan su kapedsalig'ilan sia kanu tabang'u Kadenan.
Su Kinalamig'i Bulus enggu Barnabas kanu Dikena-Yahudi
44 Kanu temundug a Gay nu Kabpangintelenen na sama bu da maibped su manga taw nu inged sa kinandidilimudan nilan ka enggu nilan mapakikineg su manga kadtalu nu Kadenan. 45 Ugaid'a guna mailay nu manga Yahudi su madakel a taw na pinangalikudan nilan su entu. Daka sinungkang'ilan su langun na pedtalun ni Bulus taman sa pidsudian nilan. 46 Saleta mambu na si Bulus enggu si Barnabas na da den gilek'ilan taman sa pidtalu nilan i “Nia man wagib na sekanu muna i dait a makakineg kanu kadtalu nu Kadenan ugaid'a kagina ka da nu talima na mana bun sekanu i minawa sa kawagib kanu ginawa nu kanu uyag-uyag a da taman nin. Ilay nu, ka nia nami den lamigen na su manga taw a dikena-Yahudi. 47 Kagina ka nia ba su inisugu nu Kadenan sa lekami kanu kinadtalu nin sa
‘Pinamili ku sekanu a mabaluy a palitan kanu manga taw a dikena-Yahudi
ka enggu nu makapayapat su kalipuasan kanu pat a pisuk'u dunia.’j”
48 Guna makineg'u manga taw a dikena-Yahudi su entu a katigan na sangat a nangapia i ginawa nilan taman sa pinugi nilan su kadtalu nu Kadenan. Na namaginugut su langun na napamili a makapaguyag-uyag sa da taman nin. 49 Na su kadtalu pantag kanu Mapulu na pakapayapat bun kanu lusud'u dalepa a entu.
50 Ugaid'a sinekat'u manga Yahudi su balaagama enggu balapantag a manga babay taman kanu 'gkangaunutan a manga mama lu kanu entu a inged ka inisundul'ilan sa kapamungkaid kani Bulus enggu Barnabas taman sa pinamugaw nilan lu kanu inged'ilan. 51 Daka pinubpug'i Bulus enggu Barnabas su libubuk'u ay nilan sungkang kanu manga Yahudi lu,k entu pan ka linemu silan sa Ikunium.
52 Saleta mambu na 'gkangapia a benal i ginawa nu 'bpamaginugut enggu linangkapan silan nu Suti a Ruh.