Su Kinasigkem kani Pitru enggu Yuhan
4
Na pedtalu-talu pamun si Pitru enggu Yuhan lu kanu manga taw na sinemupeg kanilan su manga 'bpangurbana enggu su mapulu nu manga tameng kanu Suti a 'Bpagagaman taman den kanu manga taw a lusud kanu lumpukan a Sadusiyu.b 2 Na 'gkasakit a benal i ginawa nilan kani Pitru enggu Yuhan kagina ibpamandu nilan kanu manga taw su pantag kanu Isa al-Masih enggu su kambibiag 'bpaluman nu namamatay kagina su Isa al-Masih na mimbibiag 'bpaluman. 3 Na sinigkem'ilan si Pitru enggu Yuhan. Sabap sa pegkagabi den na binilanggu nilan muna taman sa mapita. 4 Ugaid'a madakel kanu manga namakakineg kanu entu a panduan ni Pitru enggu Yuhan i naginugut taman sa nakasaut sa manga lima ngibu i kadakel'u manga mama bu a naginugut.5 Na kanu mapita na mindidilimudan sa Awrusalim su 'bpamangukum a mana su 'gkangaunutan taman den kanu manga gulu nu pangitaban 6 apeg'i Anas a mapulu sa langun nu 'bpamangurban kaped'in si Kaipas, si Yuhan, si Anduk enggu su langun nu ped pan a lusud kanu sakambinabatan nu mapulu sa langun nu 'bpamangurban. 7 Na pinaadap'ilan si Pitru enggu Yuhan ka pinangingidsan nilan sa “Panun i kinagaga nu enggula sa nia? Entain i minenggay sa lekanu sa kawagib sa kapenggula nu sa nan?”
8 Saleta mambu na si Pitru a linangkapan nu Suti a Ruh na nia nin pidtalu kanilan na “Manga 'bpamangukum a 'gkangaunutan, 9 amaika pedsumalian kami nu saguna sabap kanu kapianan a pinggula nami kanu mama a nia a di pakalakaw 10 na patuntayan ku sa lekanu sa mapia taman den kanu langun nu taw a Israil i nakalakaw su mama a nia sabap kanu kabarakat'u Isa al-Masih a taw sa Nasarit a initutuk'u kanu kayu a pinambalawaga ugaid'a pinambibiag sekanin 'bpaluman nu Kadenan. Na sabap sa lekanin na nakadtindeg kanu adapan nu su mama a nia. 11 Su Isa al-Masih ba a nia su nadtalu kanu kitab a watu a inendan nu sekanu a manga panday na walay, na entu bun ba i nabaluy a balapantag kanu langun nu watu nu walay.c 12 Na saben-sabenal a su Isa al-Masih bu i inadil'u Kadenan a makapalipuas kanu manga taw, da den salakaw pan.”
13 Na guna nilan mailay su kawalaw na kinasumpat'i Pitru enggu Yuhan na sangat a nangagaip silan, na labi a nagaip silan guna nilan katuntayi i dala makapangagi enggu kadsalilidan bu a manga taw si Pitru enggu Yuhan. Daka nagkalendem'ilan i tagapeda nu Isa al-Masih si Pitru enggu Yuhan. 14 Na sabap sa 'gkailay nilan a pedtindeg kanu ubay ni Pitru enggu Yuhan su mama a naulian na dala den nadtalu nilan.
15 Kagina ka maitu na pinaliu nu 'bpamangukum si Pitru enggu Yuhan kanu ludep'u 'bpangukuman entu pan ka mimbibitiala silan. 16 Na nia nilan nakapamagidsaya na “Ngin i enggulan tanu kanu manga mama a nia? Nasabutan na langun nu taw sia sa Awrusalim su kabarakatan a pinggula nilan, na saben-sabenal a di tanu makakias i nia. 17 Ugaid'a asal'a di den makapayapat kanu manga taw su nia na sapalan tanu silan sa di nilan den edtalu-talun kanu apia entain su makapantag kanu Isa.” 18 Na inipatawag'ilan menem 'bpaluman si Pitru enggu Yuhan ka pibpaliugatan nilan sa di nilan den edtalu-talun atawa ka ipamandu su pantag kanu Isa al-Masih. 19 Ugaid'a nia inisawal'i Pitru enggu Yuhan na “Sa lekanu a kalangan, ngin i pakasugat kanu Kadenan? Sekanu i unutan nami atawa ka su Kadenan? 20 Na di nami man magaga sa di nami makapayag u ngin i nailay nami kanu Isa al-Masih enggu nakineg'ami lun.” 21 Daka inisegan nu 'bpamangukum i kinapakagilek'ilan kani Pitru enggu Yuhan entu pan ka pinambaya-baya nilan den silan sabap sa dala ukit'ilan u panun i kasiksa nilan lun kagina pebpugi kanu Kadenan su langun nu taw lu kanu entu a nanggula. 22 Su mama a nia a naulian sabap kanu kabarakatan a entu na labi patpulu lagun i umul'in. Na nait'in den gememaw i di nin kapegkalakaw.
Su Kinapangeni-ngeni nu 'Bpamaginugut
23 Guna su pinambaya-baya den si Pitru enggu Yuhan na linemu silan kanu manga tagapeda nilan ka pinanudtul'ilan su pidtalu nu manga mapulu nu 'bpamangurban enggu su 'gkangaunutan nu manga Yahudi. 24 Guna su nakineg'ilan i entu na namagisa-isa silan mangeni-ngeni kanu Kadenan sa “Hu Kadenan nami a Mapulu a nangaden kanu langit, kanu lupa enggu kanu lagat taman den kanu langun nu namakadalem lun, 25 seka bun i napadtalu kanu kaapuan nami a mana su panunugun nengka a su Daud sia nakanggulalan kanu Suti a Ruh sa
‘Ngin i nia ka su manga taw a dikena-Yahudi na sangat a 'gkalipunget
enggu ngintu ka su manga taw na nia nilan kategelan magitung na su dala kapantag'in?
26 Su manga sultan sia sa dunia na 'bpagadil silan sa kambunua
enggu su 'gkangaunutan na pendidilimudan silan sungkang kanu Kadenan enggu kanu Masih.’d
27 Hu Kadenan nami, saben-sabenal a nanggula i nia kanu nia a dalepa kagina su Hirud Antipas enggu su Pilatu apeg'u manga taw a dikena-Yahudi taman kanu taw nu Israil na mindidilimudan silan sungkang kanu suti a sinugu nengka a mana su Isa a pinamili nengka a Masih. 28 Na su pinggula nilan na sia i entu luyud kanu pigkahanda nengka kanu paganay pan.
29 “Hu Kadenan nami, na ilay ka su kapapegkagilek'ilan sa lekami. Na tabangi ka su manga panunugun nengka sa kaawan na gilek sa kapayag'ilan kanu kadtalu nengka. 30 Ipailay nengka pan su kabarakat'engka sa kapagkapia kanu manga taw a aden sakit'in enggu ipanggalebek'engka pan su manga tanda a kagaipan a sia makanggulalan kanu ingala nu suti a sinugu nengka a su Isa.”
31 Na guna silan makapasad mangeni-ngeni na nakuyung su walay a pindidilimudan nilan. Na linangkapan silan nu Suti a Ruh taman sa pakapayag'ilan su kadtalu nu Kadenan sa da den gilek'ilan.
Su Kabpamagenggaya nu 'Bpamaginugut
32 Na su langun nu 'bpamaginugut kanu Isa al-Masih na namagisa-isa silan. Dala isa kanilan a pebpuluan nilan i kaaden nin ka ibpamagenggaya nilan. 33 Na su manga sinugu nu Isa al-Masih na 'bpelantekan nilan pebpayag su kinapambibiag'u Kadenan kanu Mapulu a su Isa. Na sangat a pinalihalan silan langun. 34 Dala isa bu a 'gkapasangan kanilan kagina uman a entu na endaw su aden lupa nin atawa ka walay nin na pebpasan nin ka 'bpananggiten nin su pasa nin 35 lu kanu manga sinugu. Na silan menem i mataw lun mamagumun kanu apia entain i aden nasisita nin. 36 Na maitu bun ba su pinggula nu isa a mama a bedtuan sa Yusup a taw sa Saiprus a tupu sekanin nu Libi. Nia lun ipedtawag'u manga sinugu na Barnabas a nia nin maena na papegkabagel kanu manggiginawa. 37 Mibpasa sekanin kanu lupa nin ka pinananggit'in su pasa nin lu kanu manga sinugu nu Isa al-Masih.