Su Kinalakaw nu Mama a Di Pakalakaw
3
Kanu isa a gay na linemu si Pitru enggu si Yuhan kanu lama-lama nu Suti a 'Bpagagaman sa uras a ikatelu sa malulem a kutika na kabpangeni-ngeni. 2 Na aden lu ba mama a nait'in den gememaw su di nin kalakaw a lu kanu bengawan nu Suti a 'Bpagagaman a binedtuan sa ‘Mapia a Bengawan.’ Uman-uman gay na 'bpananggiten den sekanin lu ba ka enggu pakapamangeni sa kuleta kanu manga taw a 'bpeludep 'bpeluakat kanu Suti a 'Bpagagaman.3 Na guna nin mailay si Pitru enggu si Yuhan a 'bpeludep kanu Suti a 'Bpagagaman na pinangenian nin silan. 4 Daka pidtulikan sekanin ni Pitru enggu Yuhan. Na nia pidtalu ni Pitru sa lekanin na “Edtuliki kami!” 5 Daka pidtulikan nin mambu silan ka 'gkapangingalap'in i aden makaenggay nilan lun. 6 Ugaid'a nia pidtalu ni Pitru sa lekanin na “Dala bulawan ku atawa ka pilak ugaid'a inggay ku sa leka u ngin i aden sa laki. Na sia kanu ingala nu Isa al-Masih a taw sa Nasarit na lakaw ka!” 7 Daka kinawa nin kanu kawanan a lima nin su mama a entu ka pinadtindeg'in. Na midsambuta demun i kinagkabagel'u embuku-bukuan nu ay nin 8 taman sa mibpakulut sekanin temindeg ka linemakaw. Na minunut sekanin lemudep kanilan lu kanu Suti a 'Bpagagaman a pakabpapaundu 'bpelakaw enggu pebpugi kanu Kadenan.
9 Na guna sekanin mailay nu manga taw a 'bpelakaw enggu pebpugi kanu Kadenan 10 na nakilala nilan i sekanin su mama a entu a 'bpamangeni a 'bpagagayan bu lu kanu bengawan nu Suti a 'Bpagagaman a binedtuan sa Mapia a Bengawan. Na sangat a nangagaip silan kanu nanggula nu mama a entu.
Su Usiatan ni Pitru lu kanu Pala-pala nu Suti a 'Bpagagaman
11 Na gagalu nu kapedsaged'u mama kani Pitru enggu Yuhan lu kanu pala-pala nu Suti a 'Bpagagaman a bedtuan sa Pala-pala nu Ragya Sulaiman, na pinalalaguyan silan semupeg'u madakel a taw ka sangat a nangagaip silan. 12 Na guna mailay ni Pitru i entu na nia nin pidtalu kanu manga taw na “Manga lusud ku sa tian a manga Israil, nginan ka 'gkangagaip kanu sa nanggula a nia enggu enduken ka 'gkadtulikan kami nu? Ngin i kataw nu lun, sabap kanu bagel enggu kaikelas'ami na nakapalakaw nami su mama a nia? 13 Dait a kasabutan nu i saben-sabenal a su Kadenan nu manga kalukesan tanu a su Ibrahim, Iskak enggu Yakub i napapangimpulu kanu sinugu nin a su Isa al-Masih. Inipalad'u sekanin enggu inikias'u kanu adapan ni Pilatu apia papembaya-bayan den sekanin ni Pilatu. 14 Inikias'u man su suti enggu matidtu ka nia nu pinangeni a makaliu na su mama a talibunu. 15 Inimatayan nu su nabpunan nu umul ugaid'a pinambibiag sekanin nu Kadenan kanu kinapatay nin. Na sekami ba su nakadsaksi kanu nia ba. 16 Na saben-sabenal a su kabarakatan nu Isa al-Masih enggu su salig sa lekanin i napagkapia sia kanu adapan nu kanu mama a nia a kilala nu a benal.
17 “Manga lusud ku sa tian, 'gkatawan ku i sekanu taman kanu 'gkangaunutan nu na pinggula nu i entu kagina da nu katuntayi sa mapia u entain su Isa. 18 Ugaid'a kanu entu a pinggula nu, na natuman su kadtalu nu Kadenan a sia nakanggulalan kanu manga nabi a dait a malasay su Masih.
19 “Kagina ka maitu na edtaubat kanu taman sa sangul kanu kanu Kadenan asal'a maampun su kabaladusan nu. 20 Na palilintaden nu Kadenan su atay nu enggu sugun nin san su Isa a inibetad'in a Masih a makandatu sa lekanu. 21 Ugaid'a nasisita a lu demun pan sekanin sa sulega taman a di pan mauma su kutika nu kapembagu nu Kadenan kanu langun-langun a mana su inipayag'in kanu manga nabi kanu paganay pan. 22 Na nia man kadtalu nu Nabi Musa na ‘Su Kadenan a Mapulu na pasuguan kanu nin sa nabi a maya bun ba sa laki a sia bun makabpun sa lekitanu a tribu. Na dait a pakikinegen nu su langun na edtalun sa lekanu nu nabi a entu.’a 23 Nia pan kadtalu nu Nabi Musa na ‘Apia entain i dili makikineg kanu entu a nabi na maawa sekanin sia kanu manga taw nu Kadenan taman sa mabinasa sekanin.’b 24 Na apia su ped a manga nabi iganat den kanu Nabi Samuil taman den kanu manga nauli pan sa lekanin a nabi na naalung'ilan bun su 'gkanganggula kanu nia a manga timpu. 25 Sekanu su manga muliataw nu manga nabi enggu kaped kanu kanu kapasadan nu Kadenan a inenggay nin kanu manga lukes'u sa nia pidtalu nu Kadenan kanu Ibrahim na ‘Kapalihalan su langun nu bangsa sia sa dunia sia makanggulalan kanu tupu nengka.’c 26 Kagina ka maitu na sinugu nu Kadenan su panunugund nin a su Isa al-Masih sia muna sa lekanu a manga Yahudi asal'a kapalihalan kanu nin sa kapataligkud'in sa lekanu kanu mawag a manga galebekan nu.”