Pugin su Kadenan kanu Kapianan nin enggu kanu Kapegkagaga nin
135
Pugin su Kadenan a Mapulu!Pugin su ingala nu Kadenan a Mapulu.
Hu sekanu a panunugun nu Kadenan a Mapulu, pugi nu sekanin.
2 Su sekanu a gumagalebek kanu walay a 'bpangadapan sa lekanin a Kadenan a Mapulu
enggu kanu lama-lama nin na pugi nu sekanin.
3 Pugin su Kadenan a Mapulu kagina mapia man sekanin;
edsengalana tanu su ingala nin a Kadenan a Mapulu ka makagkapia sa ginawa i kapamikil sa lekanin.
4 Ka su Kadenan man a Mapulu i namili kanu Yakub,
pinamili nin su manga taw a Israil a malusud sa lekanin.
5 Ka 'gkatawan ku man i su Kadenan a Mapulu na labi a mabagel;
mapulu pan kanu langun nu pedtawagen a kadenan.
6 Penggulan nu Kadenan a Mapulu su apia ngin a pakasuat sa lekanin
lu kanu sulega enggu sia sa dunia,
lu kanu lagat taman kanu didalem'u entu.
7 Sekanin i papebpapulu kanu manga gabun ebpun kanu mawatan a tedtab'u dunia.
Papedtingguman nin su kilat a pakadtapik sa ulan
taman sa papedsanggiupen nin su sambel ebpun kanu 'bpametadan nin lun.
8 Sekanin man i minimatay kanu manga kaka sa langun a wata a mama sa Egypt,
magidsan i kaka sa langun a wata a mama nu manga taw enggu manga pangangayamen.
9 Napatingguma sekanin sa manga tanda enggu kangagaipan
kanu dalepa a Egypt
sungkang kanu Piraun enggu kanu langun nu panunugun nu Piraun.
10 Bininasa nin su madakel a bangsa
enggu inimatayan nin su mabagel a manga datu
11 a mana si Sihun a datu nu manga taw a Amur
enggu si Ug a datu sa dalepa a Basan
taman den kanu langun nu pendatuan sa Kanaan.
12 Inenggay nin su kalupan nilan kanu manga taw a Israil
a ibpusaka nin kanilan a manga taw nin.
13 Hu Kadenan a Mapulu, su ingala nengka na taman sa taman,
su kabadtugan nengka na di kalipatanan taman kanu langun nu temundug pan a manga muliataw.
14 Ka seka man, Hu Kadenan a Mapulu, na ipailay nengka i dala kadupangan nu manga taw nengka
enggu 'bpelatan nengka sa nanam su manga panunugun nengka.
15 Na su manga pegkakadenanen nu manga bangsa na ebpun sa pilak enggu bulawan
a inumbal bu nu manusia.
16 Aden manga ngali nilan ugaid'a di silan pakadtalu;
aden manga mata nilan ugaid'a di silan pakailay;
17 aden manga tangila nilan ugaid'a di silan pakakineg,
dala giginawan a 'bpeluakat kanu ngali nilan.
18 Na su minumbal kanilan
enggu su langun nu pedsalig lun
na mamakailing bun silan kanu entu a pegkakadenanen nilan.
19 Hu sekanu a manga taw a Israil, pugi nu su Kadenan a Mapulu!
Hu sekanu a manga tupu nu Harun, pugi nu su Kadenan a Mapulu!
20 Hu sekanu a manga tupu nu Libi, pugi nu su Kadenan a Mapulu!
Hu sekanu a aden gilek'in kanu Kadenan a Mapulu, pugi nu su Kadenan a Mapulu!
21 Pugi nu su Kadenan a Mapulu sa Zion
a su sekanin a pedtangen sa Awrusalim.
Pugin su Kadenan a Mapulu!