Su Kinambalingan nu Yakub lu sa Dalepa a Bitil
35
Na pidtalu nu Kadenan kanu Yakub i “Saki su Kadenan a mibpapayag sa leka lu sa Bitil kanu kinapalaguy nengka kanu kaka nengka a si Isaw. Na pamagayas ka lemu sa Bitil ka lu ka ba endalepa enggu umbali aku bun lu ba sa pegkurbanan sa laki.”2 Daka pidtalu nu Yakub kanu sakambinabatan nin taman kanu manga tagapeda nin i “Idtug'u su manga balahala nu enggu limpiu nu su badan nu ka pagikelas kanu taman sa edsambi kanu sa balegkas. 3 Ka magadil tanu ka lemu tanu sa Bitil ka enggu aku pakaumbal sa pegkurbanan kanu Kadenan a tinemabang sa laki kanu timpu nu kamalasayan ku enggu pedtapiden aku nin apia endaw aku 'bpagangay.” 4 Kagina ka maitu na inenggay nilan kanu Yakub su langun nu manga balahala nilan taman den kanu manga agimat'ilan a pamalang. Na inilebeng'u Yakub su entu lu kanu atag'u masela a kayu a masiken sa Sikim. 5 Na guna su pengganat den silan na nakatingguma su gilek a ganat kanu Kadenan kanu manga taw kanu embala-bala kanilan a dalepa asal'a dala makatika semeled kanilan.
6 Na nakauma su Yakub enggu su langun nu manga tagapeda nin kanu dalepa a bedtuan sa Lus a entu bun ba su dalepa a Bitil a sakup'u kalupan a Kanaan. 7 Daka minumbal sekanin lu ba sa pegkurbanan enggu binedtuan nin su dalepa a entu sa Il-Bitila kagina sia ba mibpapayag sa lekanin su Kadenan kanu kinapalaguy nin kani Isaw. 8 Na si Dibura a linemimbal kani Ribika iganat sa manaut pan sekanin na minatay. Na lu sekanin inilebeng kanu atag'u masela a kayu a lu kanu kababan nu Bitil tembu binedtuan nin su kayu a entu sa Alun-Bakut.b
9 Na guna makambalingan su Yakub lu sa Bitil iganat lu sa Padan-Aram na mibpapayag menem sa lekanin su Kadenan taman sa pinalihalan nin su Yakub. 10 Nia pidtalu nu Kadenan sa lekanin na “Iganat saguna na dikena den Yakub i itawag sa leka ka Israil den.” Na maitu ba i kinabedtu lun nu Kadenan sa Israil. 11 Nia pan pidtalu sa lekanin nu Kadenan na “Saki su Kadenan a Barakat sa Langun. Pagkadakel ka! San makabpun sa leka su mabagel a bangsa a bangsa nu manga tribu. Na su ped kanu manga tupu nengka na mabaluy a datu. 12 Su kalupan a inibpasad ku kani Ibrahim enggu kani Iskak na inggay ku sa leka taman den kanu mangauma pan a tupu nengka.” 13 Na daka ginanatan den sekanin nu Kadenan lu kanu dalepa a entu a pimbitialan nin lun.
14 Na daka napatindeg su Yakub sa watu a tademan lu kanu dalepa a entu a pimbitialan nu Kadenan sa lekanin taman sa binubusan nin sa lana enggu ipegkurban a 'bpaginemen ka inidsela-sela nin kanu Kadenan. 15 Na binedtuan nu Yakub su dalepa a entu sa Bitilc kagina sia ba sekanin inimbitiala nu Kadenan.
Su Kinagemaw ni Buniamin enggu su Kinapatay ni Rakil
16 Ulian nu entu na ginanatan nilan su Bitil. Guna su pakasiken den silan lu sa Iprat na ginedam'i Rakil su tian nin taman sa 'gkapasangan a benal sekanin pembata. 17 Na sia kanu kapembata nin na 'gkapasang a benal sekanin taman sa nia nadtalu nu walian na “Pakabagel ka i manggiginawa nengka ka wata a mama menem i pimbata nengka.” 18 Na saleta mambu na nakaliu bun su wata ugaid'a pebpaya si Rakil. Na nabedtuan nin pamun su wata sa Bin-unid bagu sekanin natebpedan na napas ugaid'a su Yakub na Buniamine i inipanggungala nin lun.
19 Na guna matay si Rakil na lu nilan inilebeng kanu ubay nu lalan a ipedsangul sa dalepa a Iprat a bedtuan bun sa Bitlihim. 20 Daka napatindeg su Yakub sa watu a tanda lu kanu lebeng'i Rakil enggu sampay saguna na lu pamun i tanda a entu.
21 Na tinemalus su Israilf a bedtuan bun sa Yakub apeg'u manga tagapeda nin kanu kabpelalakaw nilan. Na guna silan makalampas kanu dalepa a Migdal-Idirg na napatindeg silan sa pegkakalebenan nilan. 22 Na gagalu nu kapendalepa nilan lu na dinulug'i Rubin si Bilha a kaluma nu ama nin a su Israil taman sa natawan nu ama nin su nanggula a entu.
Su manga Wata a Mama nu Yakub
Na sapulu enggu dua den i wata a mama nu Israil a bedtuan bun sa Yakub. 23 Nia su manga wata nin kani Lia. Su kaka sa langun na si Rubin, temundug na si Simiun, si Libi, si Yahuda, si Isakar entu pan ka si Sibulun. 24 Sia menem kani Rakil na si Yusup enggu si Buniamin. 25 Na sia menem kani Bilha a panunugun ni Rakil na si Dan enggu si Naptali. 26 Nia nin menem wata kani Silpa a panunugun ni Lia na si Gad enggu si Asir. Na nia ba su manga wata a mama a nambata nin lu sa dalepa a Padan-Aram.
Su Kinapatay nu Iskak
27 Na minuli su Yakub lu kanu ama nin a su Iskak lu sa Mamri a lu tampal sa dalepa a Kiriat-arba a bedtuan bun sa Hibrun. Na sia bun ba nakandadalepa su Ibrahim. 28 Na su umul'u Iskak na nakagaus sa magatus enggu walupulu lagun 29 bagu sekanin nauma na limu nu Kadenan enggu inilebeng sekanin nu manga wata nin a su Isaw enggu su Yakub.