Su Kinagkudi ni Sikim kani Dina
34
Aden isa a gay na si Dina a wata ni Lia kanu Yakub na tinemalaw ka kinakap'in su manga laga a danden den kanu dalepa a entu. 2 Na guna sekanin mailay ni Sikim a wata a mama ni Hamur a taw a Hib a datu nu entu a dalepa na kinua nin si Dina ka pigkudi nin. 3 Ugaid'a si Sikim na sangat a nalilinian nin si Dina enggu inikalimu nin taman sa pinangungumpian nin asal'a kalilinian bun sekanin ni Dina. 4 Na inimbitiala ni Sikim su ama nin a si Hamur sa nia nin pidtalu lun na “Ipangaluma aku nengka kanu laga a nia.”5 Na guna katawi nu Yakub i su wata nin a si Dina na pigkudi ni Sikim na dala den muna sekanin 'gkenu-kenu taman sa dala makauma su manga wata nin a pedtuganul kanu manga ayam lu kanu malinawag.
6 Saleta mambu na si Hamur a ama ni Sikim na linemu kanu Yakub ka inimbitiala nin sekanin pantag kanu entu. 7 Na su manga wata mambu nu Yakub a mama na endaw i kinataw nilan kanu entu a nanggula na minuli silan mamagayas ebpun kanu malinawag. Ka sangat man a nakeduan i ginawa nilan enggu nalipunget a benal silan sabap kanu mawag a entu a pinakaidan ni Sikim kanu suled'ilan. Na su entu a pinggula ni Sikim na masela a kayayan kanu manga taw a Israil a di dait a pinggula nin.
8 Ugaid'a nia pidtalu ni Hamur kanilan na “Saben-sabenal a 'gkalinian ni Sikim su wata nu. Na 'bpangenin ku i suguti nu a mapangaluma sekanin nu wata ku. 9 Suguti nu i makanggigiamunga tanu. Ipapangaluma nu su manga laga nu sa lekami enggu ipapangaluma nami bun su manga laga nami sa lekanu. 10 Amaika maitu na mapakay kanu den endalepa sia kanu dalepa nami sa apia endaw kanu pegkiug. Makambaya-baya kanu sa kapamantiali nu sia taman sa kapakayan kanu bun a makakua sa lupa sia a mabaluy a kaaden nu.”
11 Na nia pidtalu ni Sikim kanu ama ni Dina taman kanu manga suled'in na “'Bpangenin ku i suguti aku nu a mapangaluma ku suled'u. Na apia ngin i ipantun nu sa laki na inggay ku sa lekanu. 12 Edtalu nu sa laki u ngin i kadakel a 'gkalinian nu a makasunggud ku enggu u ngin i 'gkalinian nu a inggay ku sa lekanu ka inggay ku, suguti aku nu bu a mapangaluma ku si Dina.”
13 Ugaid'a sabap kanu kinapakaid'i Sikim kanu suled'ilan na dala embantangan su manga wata nu Yakub kanu kinasawal'ilan kani Sikim enggu kanu ama nin. 14 Ka nia nilan inisawal na “Di kami makasugut sa mangaluma su suled'ami sa mama a dala mapaletak,a kagina makapananggit i entu sa kayayan sa lekami. 15 Makasugut kami bu u mayun kanu a makailing sa lekami sia kanu kapaletak'u kanu langun nu manga mama nu. 16 Na entu pan ka mayun kami sa kanggigiamunga tanu enggu kandalepa nami sia sa lekanu taman sa maisa su bangsa tanu. 17 Ugaid'a amaika di kanu pakaayun sa kapaletak sa lekanu na kuan nami su suled'ami ka mawa kami sia.”
18 Na nalilinian ni Hamur taman kanu wata nin a si Sikim su kadtalu nilan a entu. 19 Daka dala den pagangga su manguda kanu kapenggula nin sa entu kagina nalilinian nin a benal si Dina. Na si Sikim i labi a 'bpagadatan nu manga taw sia kanu sakambinabatan ni Hamur kanu entu a dalepa. 20 Kagina ka maitu na linemu si Hamur apeg'u wata nin a si Sikim kanu pembatunan sa bitiala a lu kanu bengawan nu siudad ka inimbitiala nilan su manga mama nu siudad a entu. 21 Nia nilan pidtalu na “Su manga taw a nia na malilintad sa lekitanu. Enduken u sugutan tanu silan sa endalepa sia enggu makapambaya-baya silan sa kapamantiali nilan? Kagina su kalupan sia na maulad a benal enggu makanggigiamunga tanu pan kanilan. 22 Ugaid'a su manga taw a nia na makaayun bu sa kandalepa nilan sia enggu kaisa nu bangsa tanu amaika mapapaletak su uman i mama sia a mana bun su silan a entu a nangapaletak. 23 Amaika maitu na mabaluy pan a lekitanu su langun nu manga pangangayamen nilan taman den kanu manga kaaden nilan. Nia tanu bu penggulan na makaayun tanu kanilan ka enggu silan pakandalepa sia.” 24 Na minayun mambu su langun nu manga mama lu kanu bengawan nu siudad kanu bitiala ni Hamur enggu si Sikim. Daka pinaletak su langun nu manga mama taman den kanu langun a makagaga pan embunua.b
25 Ulian nu ikatelu nin gay kanu timpu a 'bpanasangan i lebag'u kinapaletak kanilan na su dua kataw kanu wata nu Yakub a si Simiun enggu si Libi a tebped sa pused'i Dina na kinemua sa sundang ka linusudan nilan su siudad sa dala katukawi taman sa binunu nilan su langun nu manga mama. 26 Binunu nilan bun si Hamur apeg'u wata nin a si Sikim taman sa kinua nilan si Dina lu kanu walay ni Sikim ka minuli silan. 27 Daka su ped kanu manga wata a mama nu Yakub na linudepan nilan su siudad ulian nu kinabunu nilan namakut silan mangua-ngua kanu manga kaaden lu a suli nilan kanu kinanggiabu kanu suled'ilan. 28 Pinangua nilan su langun nu manga bili-bili enggu manga kambing, manga sapi enggu su manga kimar taman den kanu endaw i nagaga nilan kemua magidsan i lu sa siudad enggu lu kanu malinawag. 29 Kinua nilan su langun nu manga tamuk enggu apia ngin a lu kanu manga walay. Pinanigkem'ilan bun su manga babay taman den kanu manga wata.
30 Na guna katawi nu Yakub su pinggula ni Simiun enggu si Libi na nia nin pidtalu kanilan na “Binudsengan nu a benal su ngala ku kanu manga taw nu nia a dalepa magidsan kanu manga taw a Kanaan enggu kanu manga taw a Piris. Na u magisa-isa silan sa kabunu nilan sa lekitanu na mana tanu bu tungaw. Na maibped-ibped tanu matay langun, saki enggu su langun nu sakambinabatan ku.” 31 Ugaid'a nia nilan inisawal na “Ngintu, pandayan nami den a pakabulugan nilan su suled'ami enggu i iling'ilan sa sundal?”