Su Kinapagilaya nu Yakub kanu Kaka nin a su Isaw
33
Na da gaid mauget na nasandeng'u Yakub su Isaw a pakauma apeg'u pat gatus a manga taw nin. Daka pinalu nu Yakub su manga wata nin kanu manga ina nilan. 2 Na pinadtundug-tundug'u Yakub su sakambinabatan nin sa nia nin pinauna na su dua kataw a kaluma nin a panunugun entu pan ka su manga wata nilan. Nia menem temundug na si Lia enggu su manga wata nilan entu pan ka nia sa ulian si Rakil enggu si Yusup. 3 Daka minuna su Yakub kanilan ugaid'a gagalu nu kapedsupeg'in kanu kaka nin na nakapitu den sekanin sinemugiud. 4 Ugaid'a pinalalaguy sekanin malaw nu Isaw ka kinakep'in enggu sinium'in taman sa nakapagulianga silan dua. 5 Na guna mailay nu Isaw su manga babay taman kanu manga wata na nia nin nakaidsa na “Entain i manga kaped'engka a nia?”Nia nakasawal'u Yakub na “Namba su inipalihala nu Kadenan kanu ulipen nengka.” 6 Daka minubay su manga kaluma nin a panunugun enggu su manga wata nilan ka sinemugiud. 7 Na entu pan ka tinemundug si Lia enggu su manga wata nilan ka sinemugiud bun. Na nia den mauli a minubay na si Rakil enggu su wata nin a si Yusup ka sinemugiud bun.
8 Daka nia menem nakaidsa nu Isaw na “Ngin i maena nu manga ayam a entu a nadsumbak ku?” Na nia inisawal'u Yakub na “Ibpagenggay i entu nu ulipen nengka sa leka.” 9 Ugaid'a nia pidtalu nu Isaw na “Di ka den ali ku, isan nengka demun i nan sa leka ka madakel den i kaaden ku.” 10 Nia nakasawal'u Yakub na “Amaika naampun aku nengka den na 'bpangenin ku i talima ka den su ibpagenggay nu ulipen nengka. Ka su kabantang'in na kanu kinailay ku bu sa beneng'engka na mana ku bun nailay su Kadenan ka tinalima aku nengka sa mapia. 11 Na 'bpangenin ku i talima ka den su ibpagenggay ku sa leka a suled ku, ka su Kadenan na ipegkalimu aku nin enggu pembalilidsekian aku nin.” Na kagina ka ipedtegel bun sa lekanin nu Yakub su entu na tinalima nin den mambu.
12 Daka nia pidtalu nu Isaw lun na “Temalus tanu den lemakaw ka pangunanan ku sekanu.” 13 Ugaid'a nia inisawal'u Yakub na “Edtatangguli kami demun pan kaka ku kagina su manga wata ku na mangalumbat enggu 'gkalidu bun i ginawa ku kanu manga ayam a pedsusu pamun su manga pipis'ilan. Amaika sasawan silan sa kasedseg lun sa apia kagagabian bu na tabia bun ka matay silan langun. 14 Na 'bpangenin ku i una kanu den sa lekami ka edtatagitu kami bu kanu manga wata apeg'u manga ayam sa endaw i magaga nilan. Na lu tanu bu magilaya sa dalepa a Sir.”
15 Na nia pidtalu nu Isaw sa lekanin na “Amaika maitu na suguti aku sa makatabun ku sa leka su ped kanu manga taw ku.” Ugaid'a nia inisawal'u Yakub na “Di ka den kaka ku. Di ka den 'bpelidua i ginawa nengka. Nia balapantag na inampun aku nengka den.”
16 Daka minuli den mambu kanu entu ba a gay su Isaw lu sa dalepa a Sir apeg'u manga taw nin. 17 Na saleta mambu na tinemalus den su Yakub apeg'u manga kaped'in sa dalepa a Sukut enggu mimbalay silan lu ba taman sa pinaumbalan nin bun sa manga balal su manga ayam'in. Nia ba i sabapan na kinabedtu kanu entu a dalepa sa Sukut.a
Su Malilintad a Kinauma nu Yakub lu sa Dalepa a Sikim
18 Na nakauma sa malilintad su Yakub sa dalepa a Sikim a sakup'u dalepa a Kanaan kanu kinambalingan nin ganat sa dalepa a Padan-Aram. Na napatindeg sekanin sa kagkalalebenan nin a lu masupeg kanu siudad a Sikim. 19 Guna su maitu na pinamasa nin su lupa a entu a pinatindegan sa kagkakalebenan nin kanu manga wata ni Hamur a ama ni Sikim sa alaga na magatus timan a pilak. 20 Daka minumbal sekanin lu ba sa pegkurbanan a binedtuan nin sa Il-Iluhi-Israil.b