Su Kinapagadil'u Yakub sa Kapagilaya nilan kanu Isaw
32
Na tinemalus su Yakub apeg'u sakatiwalayan nin kanu kabpelalakaw nilan daka nadsumbak'ilan su manga malaikat. 2 Na kanu kinailay nu Yakub kanilan na nia nin nadtalu na “Nia ba su kampu nu Kadenan!” Tembu binedtuan nin i entu a dalepa sa Mahanaim.a3 Na sinemugu su Yakub sa makauna sa lekanin lu kanu kaka nin a su Isaw lu sa dalepa a Sir a binedtuan bun sa Idum. 4 Nia nin inidtutuma kanilan na “Nia i edtalu nu kanu mapulu ku a si Isaw. Edtalu nu lun i ‘Saki si Yakub a ulipen nengka. Kanu nangaipus a timpu na lu aku migkakaleben kani Laban, na nia pan i kinauli ku. 5 Saguna na madakel i sapi ku, kimar, bili-bili, kambing enggu manga panunugun ku. Pinauna ku i nakadtanggit a nia sa katigan ka 'gkapangingalap ku i matalima aku nengka.’ ”
6 Na guna makambalingan su manga sinugu na nia nilan pidtalu kanu Yakub na “Nakalu kami den kanu suled'engka a si Isaw. Na sia den sekanin pedsangul a kaped'in su pat gatus kataw a manga mama sa kabpagalaw nin sa leka.” 7 Daka nagilekan a benal su Yakub kanu entu a katigan taman sa binad'in sa dua kalumpukan su langun nu kaped'in taman kanu manga bili-bili, kambing, sapi enggu manga unta nin. 8 Nia nin 'gkapagitung na “Amaika makauma si Isaw ka bunun nin su salumpuk na makapalalaguy pamun su salumpuk.”
9 Daka nangeni-ngeni su Yakub sa “Hu Kadenan nu tuwa ku a si Ibrahim enggu Kadenan bun nu ama ku a si Iskak, tabangi aku! Pidtalu nengka sa laki i embalingan aku kanu dalepa ku enggu kanu manga pagali ku taman sa pidtalu nengka i tiakapan aku nengka sa mapia. 10 Di aku pakadait kanu langun nu limu nengka sa laki a ulipen nengka ugaid'a lalayun aku nengka bun pedtabangan. Na kanu kinaganat ku kanu dalepa ku na dala nadtanggit ku, nia tabia na su tungkedb ku ugaid'a saguna na dua kalumpukan den i kaped ku 'bpaguli. 11 'Bpangenin ku i ilipuas aku nengka kanu lima nu suled ku a si Isaw. 'Gkagilekan aku sa kanu kapagilaya nami na tabia bun ka bunun kami nin apeg'u manga babay taman kanu manga wata. 12 Ugaid'a 'gkagkalendem ku su inibpasad'engka sa tiakapan aku nengka sa mapia taman sa pagkadakelen nengka su tupu ku a mana su pedtad lu kanu dedsan a di magaga milang.”
13 Daka lu ba napalepas sa magabi su Yakub taman kanu manga tagapeda nin. Na kanu mapita na namili su Yakub kanu manga ayam a makaenggay nin kani Isaw. 14 Na nia nin pinamili na dua gatus i babay a kambing enggu duapulu i mandangan a kambing, dua gatus i babay a bili-bili enggu duapulu i mandangan a bili-bili, 15 telupulu i babay a unta apeg'u manga pipis'in, patpulu i babay a sapi enggu sapulu i tudu, duapulu i babay a kimar enggu sapulu i tudu a kimar. 16 Na pimbad-bad din su entu sa uman i sabad na inipatuganul'in sa sakataw a panunugun nin taman sa nia nin pidtalu kanu manga panunugun nin na “Una kanu den sa laki enggu edtundug-tundug kanu a aden pageletan nin i uman i sabad sa lekanu.”
17 Daka pinapatan nin su nauna sa “Amaika madsumbak'u su kaka ku a si Isaw enggu midsa sa ‘Entain i mapulu nengka? Endaw ka 'bpagangay? Entain i kigkuan sa manga ayam a nia?’ 18 na nia nengka isawal na ‘Nia kigkuan sa nia na su ulipen nengka a si Yakub. Ibpagenggay nin i nia kanu mapulu nin a si Isaw enggu pedtundug bun sekanin sa lekami.’ ”
19 Na maitu bun ba i inipapata nin kanu temundug taman kanu nauli sa langun a pinatuganul'in kanu manga ayam sa nia nin pidtalu na “Maitu bun ba i edtalu nu langun kanu kaka ku a si Isaw amaika madsumbak'u sekanin, 20 enggu sigulu nu a madtalu nu i ‘Su ulipen nengka a si Yakub na pedtundug bun sa lekami.’ ” Na pidtalu nin i nia kagina nia nin 'gkapagitung na “Basi kapangungumpian ku sekanin kanu langun nu ibpagenggay ku lun a nia, na kanu kapagilaya nami na basi ampunen aku nin den.” 21 Na pinauna nu Yakub su manga ibpagenggay nin enggu napalepas pan sekanin sa magabi kanu pidtangenan nilan a entu.
Su Kinagkisua nu Yakub lu sa Dalepa a Pinil
22 Ugaid'a kanu magabi ba a entu na ginemedam su Yakub ka inilipag'in kanu lawas'a ig'u Yabuk su dua kataw a kaluma nin taman kanu dua kataw a pegkakaluman nin a panunugun enggu su sapulu enggu isa a manga wata nin a mama. 23 Guna nin silan makalipag na inisukeli nin menem lemipag su langun nu tamuk'in 24 ugaid'a migkalidtabun sekanin.
Daka aden mama a nakatekaw demun nakauma ka inigkisua nin su Yakub taman den sa magan mapita. 25 Guna madsagipa nu mama i di nin magaga su Yakub na binetay nin sekanin sa tebing daka nalepu. 26 Daka nia pidtalu nu mama na “Pitasi aku ka magan den pedsisi i mapita!” Nia inisumpat'u Yakub na “Di ku seka pitasan nia tabia na palihalan aku nengka.” 27 Na nia inidsa nu mama na “Entain i ngala nengka?” Nia nin inisawal na “Yakub.” 28 Na nia pidtalu nu mama lun na “Su ngala nengka na dikena den Yakub ka Israil den kagina inidsigi nengka sa bagel su Kadenan enggu su manga taw taman sa nanaban ka.”
29 Daka pinangeni nu Yakub i “Edtalu ka pan sa laki i ngala nengka.” Nia nin inisawal na “Enduken ka ibpagidsa nengka pan i ngala ku?” Daka pinalihalan nin su Yakub.
30 Na nia nadtalu nu Yakub kanu ginawa nin na “Nakapagadapa ku su Kadenan ugaid'a bibiag aku pamun.” Tembu binedtuan nin su entu a dalepa sa Pinil.c 31 Na sinemebang den i senang kanu kinaganat'in lu ba a pedtiud-tiud bu kanu kabpelakaw nin. 32 Nia ba i sabap'in u enduken ka sampay saguna na di pegkan su manga taw a Israil sa kumindel'u tebing'a binatang kagina lu ba kanu kumindel'u tebing binetay nu mama su Yakub.