Su Kinaawa nu Yakub
31
Na nakineg'u Yakub i nia pedtalu-talun nu manga wata a mama ni Laban na “Kinua ni Yakub su langun nu kaaden nu ama tanu kagina su langun nu kakawasan nin na nakabpun kanu kaaden nu ama tanu.” 2 Na nadsuliman bun nu Yakub i su palangay ni Laban sa lekanin na dikena den mapia. 3 Daka nia pidtalu nu Kadenan a Mapulu kanu Yakub na “Uli ka den kanu dalepa a pimbatan sa leka lu kanu manga pagali nengka ka tapiden ku seka.”4 Na guna su maitu na inipatawag'u Yakub si Rakil enggu si Lia ka nagilaya silan lu kanu 'bpanadtaban nu manga ayam. 5 Na nia nin pidtalu kanilan na “Nadsuliman ku i su palangay nu ama nu sa laki na dikena den mapia. Ugaid'a tinapid aku nu Kadenan a pedsimban nu ama ku. 6 Katawan nu i inibped ku i bagel ku sa kinanggalebek ku kanu ama nu. 7 Na apia ka maitu na pidsalimbut aku nin bun ka nakapila nin den nasalin su bayad'in sa laki ugaid'a da sekanin suguti nu Kadenan sa kapamungkaid'in sa laki. 8 Amaika pedtalun ni Laban i nia nin ibayad sa laki na su mimbutek-butek kanu manga ayam na nia mambu 'gkapamipis'u manga ayam na manga mimbutek-butek. Amaika menem ka nia nin pedtalun na babalek i laki na nia mambu 'gkapamipis'u manga ayam na babalek. 9 Na maitu ba i ukit a kinaenggay nu Kadenan sa laki kanu manga ayam'u ama nu.
10 “Na kanu timpu na kabpaguntul'u manga mandangan na midtaginep aku sa nailay ku i mimbutek-butek enggu babalek den langun su manga mandangan a 'bpaguntul. 11 Na sia kanu taginepen ku na tinawag aku nu malaikat'u Kadenan sa nia nin pidtalu na ‘Yakub!’ Nia ku nakasawal na ‘Nia aku bun.’ 12 Daka nia nin pidtalu sa laki na ‘Ilay ka! Su 'bpanguntul a manga mandangan na mimbutek-butek enggu mimbabalek. Kahanda ku i nia kagina katawan ku i pinakaidan sa leka ni Laban. 13 Saki su Kadenan a mibpapayag sa leka lu sa Bitil a lu kanu pinatindegan nengka sa watu a tademan sa laki enggu binubusan nengka sa lana ka inidsela-sela nengka sa laki taman sa lu ka bun ba mibpasad sa laki. Na pamagayas ka, ka ganati ka i nia a dalepa ka embalingan ka lu kanu dalepa a pimbatan sa leka.’ ”
14 Nia inisawal'i Rakil enggu si Lia na “Dala den 'bpangingapan nami a umun nami a ebpun kani ama. 15 Initimbang kami nin den sa lapu ka pibpasa kami nin taman sa inibped'in minasa su langun nu sunggudan sa lekami. 16 Saben-sabenal a su langun nu kakawasan a nia a kinua nu Kadenan ebpun kanu ama nami na lekitanu enggu kanu manga wata tanu. Na enggula ka u ngin i pidtalu sa leka nu Kadenan.”
17-18 Daka nagadil su Yakub sa kambalingan nilan lu kanu ama nin lu sa Kanaan. Pinagkuda nin kanu manga unta su manga wata nin enggu su manga kaluma nin. Na inipasedseg'in su manga ayam asal'a mauna enggu pidtapik'in bun su langun nu kaaden a napantiali nin lu sa Padan-Aram. 19 Na kanu timpu na kabpagawa nilan na dala lu si Laban ka napapanampad sa bumbul'u manga bili-bili nin. Na daka tinegkaw ni Rakil su manga balahalaa a kadenan nu ama nin. 20 Na na liu sa entu na pinagakalan nu Yakub si Laban ka dala sekanin pagetaw sa kinaawa nilan. 21 Namagayas sekanin gemanat a it'in su langun-taman nin ka linemipag sekanin lu kanu lawas'a ig'u Yupratis ka linemu kanu kabakuludan nu Giliad.
Su Kinaseled'i Laban kanu Yakub
22 Na kanu ikatelu nin gay na aden nakadtalu kani Laban sa minawa su Yakub. 23 Daka pinaunut'i Laban su manga pagali nin a mama ka kanu dalem'u nakapitu gay na sineled'ilan bu su Yakub na lu nilan nasaut kanu kabakuludan nu Giliad. 24 Na kanu entu ba a magabi na pibpayagan nu Kadenan si Laban a taw a Aram sa ukit a kinadtaginep sa nia nin kadtalu na “Pangingati ka a benal sa mapamagigis'engka mamungkaid si Yakub.”
25 Na nakapatindeg den su Yakub sa pegkakalebenan nin kanu kinagaus'i Laban lun enggu lu bun ba mambu napatindeg si Laban enggu su manga pagali nin a mama sa kagkakalebenan nilan kanu kabakuludan nu Giliad.
26 Daka pidtaluan ni Laban su Yakub sa “Ngin i pinakaidan nengka a nia sa laki ka pinagakalan aku nengka taman sa pidtatanggit'engka su manga wata ku a mana su nangasigkem sa kinambunua? 27 Enduken ka pinagakalan aku nengka kanu kinaawa nengka a dala ka demun pagetaw? U mana bu ka nagetaw ka sa laki na paganaten ku seka sa aden kagalaw nin a pedsalenganen na uni na tambul enggu kutiapi. 28 Da nengka demun apasa i masium ku su manga wata ku taman den kanu manga apu ku kanu kinaganat'u. Kababalan i nan a pinggula nengka! 29 Aden kagaga ku sa kapakasakit ku sa leka, ugaid'a su Kadenan nu ama nengka na pidtaluan aku nin kagina magabi sa ukit a taginepen sa di ku seka pamagigisen mamungkaid. 30 Aden a entu na ginemanat ka kagina pegkiug ka den a benal 'bpaguli. Ugaid'a ngintu ka kinua nengka pan su manga kadenan ku?”
31 Nia nakasawal'u Yakub kani Laban na “Minggagan aku mawa kagina 'gkagilekan aku sa agawn nengka sa laki su manga wata nengka. 32 Ugaid'a makapantag kanu pegkakadenanen nengka na paimatayan su apia entain i katunan nengka lun. Na sia kanu kaadapan nu manga pagali ta na pangilay ka su langun nu leka a langun-taman ka kua ka.” Ugaid'a di katawan nu Yakub i si Rakil i tinemegkaw kanu pegkakadenanen ni Laban.
33 Na pinangilay den mambu ni Laban lu kanu pegkakalebenan nu Yakub entu pan ka lu kani Lia taman den kanu pegkakalebenan nu dua kataw a panunugun ugaid'a dala nin matun su balahala nin. Daka linemudep sekanin kanu pegkakalebenan ni Rakil. 34 Saleta na nakapagena ni Rakil su manga pegkakadenanen lu kanu uyut'u ampis'u unta enggu inayanan nin. Pinangilay den mamikal'i Laban lu kanu pegkakalebenan ugaid'a dala nin matun. 35 Nia pidtalu ni Rakil kanu ama nin na “Ampun aku ama sa di ku kapedtindeg kagina nauma aku na gay.” Na pinamungkal den mambu ni Laban su manga langun-taman na dala nin bun matun su manga pegkakadenanen nin.
36 Na inetuan na lipunget su Yakub taman sa inidsan nin si Laban sa “Ngin i kadupangan ku sa leka? Ngin i kadusan ku ka mapasang a benal i kinapaneled'u sa laki? 37 Na kagina ka pinamungkal nengka den su manga langun-taman ku, na ipailay nengka sa lekami u ngin i natun nengka! Ibetad'engka sia kanu kaadapan nu manga taw ta u ngin i natun nengka ka silan i kemukum sa lekita u entain i ikelas sa lekita dua. 38 Kanu dalem'u nakaduapulu lagun na kaped aku nengka. Su manga bili-bili enggu su manga kambing'engka na dala kalebati na kabpamipis enggu apia sawalu kanu manga mandangan a bili-bili nengka na dala ku makan.b 39 Amaika aden kanu manga ayam i 'bpagimatayan nu talaw a binatang na saki demun i pedsambi kanu minatay. Papembayadan nengka bun sa laki su manga ayam a magidsan i tinegkaw sa malamag atawa ka tinegkaw sa magabi. 40 Kanu kagagabian na 'gkalasay aku kanu kayaw nu senang enggu pedtegkigen aku na matenggaw kanu kalalamagan taman sa di aku pakatulug. 41 Namba i natala ku kanu dalem'u nakaduapulu lagun a kinanggalebek ku sa leka. Nakasapulu enggu pat lagun i kinanggalebek ku sa leka asal bu na mapangaluma ku su manga wata nengka enggu nakanem lagun menem kanu manga ayam'engka ugaid'a apia ka maitu na nakapila nengka sinambian su ukit a kinabayad'engka sa laki. 42 U dikena aku bu pedtapiden nu Kadenan nu Ibrahim a su Kadenan a ipegkagilek'u ama ku a si Iskak na natatalanged ku i paganaten aku nengka sa apia sawalu na dala madtanggit ku. Ugaid'a su Kadenan na nailay nin mambu su kamalasayan ku enggu su kapasang'u kinanggalebek ku tembu sinapalan ka nin kagina magabi.”
Su Kapasadan nu Yakub enggu Laban
43 Daka nia inisawal'i Laban kanu Yakub na “Su manga babay a nia na manga wata ku enggu su manga wata nilan na manga apu ku. Su manga ayam a nia na laki taman sa langun nu 'gkailay nengka sia na laki. Ugaid'a kagina ka saguna na di ku den maungen su kaawa nu manga wata ku taman den kanu manga wata nilan sia sa laki, 44 na sia ka, ka mangaden ta sa kapasadan a mabaluy a saksi sa lekita dua.”
45 Daka kinemua su Yakub sa watu ka pinatindeg'in a mabaluy a tademan 46 taman sa pidtalu nin bun kanu manga taw nin i lemimud silan sa watu enggu padtatambakan nilan. Na lu ba silan langun kineman kanu ubay nu pinadtatambaka a entu a watu. 47 Na binedtuan ni Laban su entu sa Yigar-Sahaduta,c ugaid'a su Yakub na binedtuan nin sa Galid.d
48 Nia pidtalu ni Laban na “Su nia a pinadtatambaka a watu na mabaluy a saksi sa lekita saguna.” Na entu ba i sabapan nin ka nabedtuan su entu a dalepa sa Galid 49 enggu Mispae kagina pidtalu bun ni Laban i “'Bpangenin ku i edsulimanen ta nu Kadenan a Mapulu kanu kapebpitas ta dua. 50 Amaika pakapasangan nengka i manga wata ku a nia atawa ka mangaluma ka sa ped a babay na apia di ku 'gkailay na 'gkakalendem ka i su Kadenan a Mapulu i pakailay sa lekita.” 51 Na pidtalu bun ni Laban i “Ilay ka su pinadtatambaka ku a nia a watu sa pageletan ta enggu su watu a pinatindeg a nabaluy a tademan ta dua. 52 Su nia a pinadtatambaka a watu enggu su watu a nabaluy a tademan na saksi ta dua sa di aku lemampas sa nia ba a dulunan enggu di ka bun lemampas kanu nia a dulunan asal'a kalusudan ta i uman i isa sa lekita. 53 Na 'bpangenin ku kanu Kadenan ni Ibrahim enggu kanu Kadenan ni Nahurf i silan i kemukum sa lekita dua.”
Guna su maitu na midsapa su Yakub sia kanu ingala nu Kadenan a pedsimban nu ama nin a su Iskak sa pagadatan nin su dulunan. 54 Daka migkurban su Yakub kanu Kadenan lu kanu bakulud a entu taman sa pinangenggat'in su langun nu pagali nin sa edtatagapeda silan keman. Na guna silan makapasad keman na napalepas pan silan sa magabi kanu bakulud a entu. 55 Na kanu kinagkapita, na sinium'i Laban enggu pinalihalan nin su manga wata nin taman kanu manga apu nin ka minuli den sekanin.