30
Na guna madsuliman ni Rakil i di sekanin pegkagingay na nangalikud sekanin kanu suled'in a si Lia taman sa nia nin pidtalu kanu Yakub na “Pagkagingay aku ka amaika dili na matay aku!” 2 Daka nasakit'i ginawa nu Yakub kani Rakil taman sa nia nin pidtalu na “Ngintu, saki su Kadenan? Sekanin i 'bpagelen sa di nengka kapegkagingay.”3 Na nia pidtalu ni Rakil sa lekanin na “Nia su panunugun ku a si Bilha, dulug ka sekanin ka enggu sia makanggulalan sa lekanin na kaadenan aku na wata.” 4 Daka inenggay den ni Rakil su panunugun nin a si Bilha a mapangaluma ni Yakub taman sa dinulug den mambu ni Yakub. 5 Na migkagingay si Bilha taman sa mimbata sa wata a mama. 6 Daka nia pidtalu ni Rakil na “Kinukum aku nu Kadenan, na nailay nin i pakabenal aku ka pinakikineg'in su 'bpangenin ku ka inenggan aku nin sa wata a mama.” Tembu nia nin inibedtu lun na Dan.a
7 Na migkagingay menem su panunugun ni Rakil a si Bilha enggu mimbata bun sa wata a mama, na nia ba i ikadua a nambata nin. 8 Daka nia pidtalu ni Rakil na “Kanu mapasang a kapegkisua na nanaban aku kanu suled ku.” Tembu binedtuan nin su wata sa Naptali.b
9 Na guna madsuliman ni Lia i di den sekanin pegkagingay na inenggay nin su panunugun nin a si Silpa ka inipagkaluma nin kanu Yakub, 10 taman sa nakambata si Silpa sa wata a mama. 11 Na nia pidtalu ni Lia na “Balaukul aku!” Tembu binedtuan nin sa Gad.c 12 Daka mimbata menem 'bpaluman si Silpa sa wata bun a mama. 13 Na nia pidtalu ni Lia na “Magalaw aku! Saguna na tawagen aku nu manga babay sa magalaw.” Tembu binedtuan nin su wata sa Asir.d
14 Na kanu timpu nu kapedsabpet sa bantad na linemu si Rubin sa benday, na nakatun sekanin sa unga na pamulan a bedtuan sa mandirike taman sa init'in kanu ina nin a si Lia. Daka nangeni si Rakil kani Lia sa nia nin pidtalu na “Enggi aku pan kanu manga unga nu mandirik'u wata nengka a nan.” 15 Daka nia nin lun inisumpat na “Di ka den 'gkasukul sa kinakua nengka kanu kaluma ku ka apia su manga unga nu mandirik'u wata ku na pegkuan nengka pamun?” Nia pidtalu ni Rakil na “Amaika enggan aku nengka kanu manga unga nu mandirik'u wata nengka na san sa leka makatulug si Yakub saguna magabi.”
16 Daka guna makauma su Yakub kanu entu a edsukilep a ebpun lu sa benday na inalaw ni Lia ka nia nin lun pidtalu na “Sia ka makadulug sa laki saguna magabi kagina inenggan ku si Rakil sa kanu manga unga nu mandirik'u wata ku a bayad sa lekanin.” Daka dinulug'in si Lia kanu entu a magabi 17 taman sa migkagingay menem sekanin kagina pinakikineg'u Kadenan su pangeni-ngeni nin. Na mimbata sekanin kanu ikalima a wata nilan a mama kanu Yakub. 18 Na nia pidtalu ni Lia na “Binalasan aku nu Kadenan kagina inenggay ku kanu kaluma ku su panunugun ku.” Tembu binedtuan nin su wata nin sa Isakar.f 19 Na ulian nu entu na migkagingay menem si Lia enggu pimbata nin su ikanem a wata nilan a mama. 20 Na nia pidtalu ni Lia na “Balaalaga a benal su inenggay nu Kadenan a nia sa laki. Saguna na pagadatan aku nu kaluma ku ka nakambata aku den sa nem kataw a wata a mama.” Tembu binedtuan nin su wata sa Sibulun.g 21 Ulian nu entu na mimbata menem sekanin sa wata a babay a binedtuan nin sa Dina.
22 Na su Kadenan na dala nin bun kalipatani si Rakil ka pinakikineg'in bun su pangeni-ngeni nin taman sa pigkahanda nu Kadenan i 'gkagingay sekanin. 23 Na migkagingay si Rakil taman sa mimbata sa wata a mama. Na nia nin pidtalu na “Pinambangun aku nu Kadenan kanu kinalusak ku.” 24 Tembu nia nin inibedtu kanu wata na Yusuph kagina nia nin kadtalu na “'Bpangingalapen ku i enggan aku nu Kadenan a Mapulu sa sakataw pan a wata.”
Su Kinagkawasa nu Yakub
25 Na guna mambata su Yusup na inimbitiala nu Yakub si Laban sa nia nin kadtalu na “Suguti aku den sa makauli aku kanu dalepa ku. 26 Paunut ka su manga kaluma ku taman kanu manga wata ku ka enggu aku pakaganat kagina napantiali ku mambu silan kanu kinanggalebek ku sa leka. Na katawan nengka bun u panun i kinanggalebek ku sa leka.”
27 Ugaid'a nia inisawal'i Laban na “Suguti aku pan a madtalu ku i nia. Natawan ku sia kanu ilayan ku i benal a linidsekian aku nu Kadenan a Mapulu sabap sa leka. 28 Edtalu ka sa laki u pila i isukay ku sa leka ka entu ba i isukay ku.”
29 Nia inisawal'u Yakub na “Katawan nengka u panun i kinanggalebek ku sa leka enggu panun i kinagkadakel'u pangangayamen nengka kanu kinatuganul ku lun. 30 Su paidu a nauman ku a pangangayamen nengka na saguna na mimbuad-buad den taman sa su langun nu penggulan ku na pebpalihalan nu Kadenan a Mapulu. Na aden a entu na maginapas aku pan mambu sa kanu sakambinabatan ku?”
31 Na nia menem pidtalu ni Laban sa lekanin na “Ngin i isukay ku sa leka?” Nia pidtalu ni Yakub na “Di aku den pedsukayi. Amaika mayun ka kanu 'bpangenin ku na patalusen ku i katuganul ku kanu pangangayamen nengka. 32 Suguti aku a makalu kanu pangangayamen nengka amay-amay ka isenggay ku su manga bili-bili enggu manga kambing a babalek enggu maitim i bumbul'in ka entu ba i isukay nengka sa laki. 33 Na kanu maitu ba a ukit na malemu nengka mailay amaika midsalimbut aku atawa ka dala. Ka amaika makailay ka kanu manga ayam ku sa maputi a bili-bili atawa ka dikena babalek i bumbul'in a kambing na katawan nengka i tinegkaw ku i entu sa leka.”
34 Na nia pidtalu ni Laban na “Mapia su entu! Makua nengka i kiug'engka.” 35-36 Ugaid'a kanu entu demun ba a gay na inipasenggay ni Laban su langun nu babalek i bumbul'in a manga kambing magidsan i mandangan atawa ka babay enggu su langun nu maitem a bili-bili ka iniwatan nin kanu Yakub sa manga telu gay i kabpelalag lun. Na inipatuganul'in kanu manga wata nin a mama su manga ayam a entu nu Yakub. Na saleta mambu na langun nu natabun a manga ayam'i Laban na tinuganul den nu Yakub.
37 Na kinemua su Yakub sa telu balang a sapak'a kayui ka pinangupisan nin sa makaliu su maputi nu kayu asal'a pembabalek. 38 Daka initagu nin su pinangupisan nin a sapak'u kayu lu kanu pebpagineman sa manga ayam asal'a mailay nu manga ayam amaika minem silan. Kagina kanu kabpaginem'ilan ba a nia i kutika na kabpanguntul'u manga ayam. 39 Na 'bpanguntulan nu manga mandangan su manga ayam a babay lu kanu ubay nu sapak'u kayu tembu nia nilan 'gkapamipis na babalek i bumbul'in. 40 Na su manga bili-bili na inisenggay nu Yakub ka lu nin pinasangul kanu manga babalek i bumbul'in enggu maitem a lu kanu manga ayam'i Laban. Na maitu ba a ukit a kinapangaden nu Yakub sa lekanin demun a manga ayam enggu di nin ibpedtampung kanu manga ayam'i Laban. 41 Na uman nia 'bpaguntul su mangasebud a manga ayam na ipedtagu nu Yakub su sapak'u kayu lu kanu pebpagineman kanu manga ayam lu kanu kasangulan nilan ka enggu nilan mailay. 42 Ugaid'a amaika mangagasa menem a ayam i 'bpaguntul na di nin ipembetad lu asal'a su mangagasa i kani Laban enggu su mangasebud menem na kanu Yakub. 43 Na sabap sa entu na migkawasa a benal su Yakub. Nakangguayam sa madakel a benal a manga bili-bili enggu kambing, manga unta enggu manga kimarj taman sa naumanan bun su manga panunugun nin a babay enggu mama.