Nakauma su Yakub sa Dalepa a Padan-Aram
29
Na guna su maitu na tinemalus den su Yakub taman sa nakauma sekanin kanu kalupan nu manga taw sa sebangan. 2 Daka nakailay sekanin lu kanu kadatalan sa telu kalumpukan a manga pangangayamen a 'bpangintelenen lu kanu ligid'u kalut kagina lu ba silan pebpaginemen. Na su kalut ba a entu na dinapengan sa masela a watu 3 enggu 'bpagukan bu i entu amaika 'gkangalimud den lu ba su langun nu pangangayamen. Na amaika makapainem'ilan den langun su pangangayamen na pendapengan nilan menem su kalut.4 Na daka inubay nu Yakub su 'bpamedtuganul sa bili-bili ka inidsan nin silan sa “Endaw kanu pegkaleben?” Nia nilan inisawal na “Lu sa dalepa a Haran.” 5 Na nia nin pan inidsa kanilan na “Katawan nu si Laban a apu ni Nahur?” Nia nilan inisumpat na “Uway.” 6 Na inidsan nin menem silan 'bpaluman sa “Ngin i betad'in?” Nia nilan pidtalu na “Mapia bun sekanin. Ilay ka, ka pakauma su wata nin a si Rakil apeg'u manga ayam'ilan.” 7 Na nia pan pidtalu nu Yakub na “Mapanay pan a benal i nia! Dikena pan i nia kutika na kabpelugen sa manga ayam. Enduken u makin nu painem su manga ayam ka papanadtab'u silan 'bpaluman entu pan ka lugen nu?” 8 Ugaid'a nia nilan pidtalu na “Di kapakayan a ukan nami su kalut enggu painemen nami su manga ayam taman a di mangalimud su langun nu manga ayam.”
9 Na gagalu na kapembitiala nu Yakub kanilan na nakauma si Rakil apeg'u manga ayam'u ama nin kagina sekanin i pedtuganul lun. 10 Na guna mailay nu Yakub su edtenged'in a si Rakil a wata ni Laban a suled'u ina nin enggu nailay nin bun su manga ayam'i Laban na iniawa nu Yakub su masela a watu a inidapeng kanu kalut ka pinainem'in su manga ayam'u bapa nin. 11 Na endaw i kinapasad'in mapainem kanu manga ayam na inubay nin si Rakil ka sinium'in taman sa nakauliang su Yakub kanu kinagalaw nin. 12 Na nia pidtalu nu Yakub sa lekanin na “Pakiwatan aku nu ama nengka ka wata aku nu babu nengka a si Ribika!”
Na nalalaguy muli si Rakil ka pidtalu nin kanu ama nin. 13 Daka endaw demun i kinakineg'i Laban makapantag kanu Yakub na namagayas lemiu ka inalaw nin taman sa kinakep enggu sinium'in ka pinaunut'in muli. Na guna mapanudtul'u Yakub kani Laban su langun nu napagukitan nin 14 na nia nadtalu ni Laban sa lekanin na “Saben-sabenal a lugu ku seka!”
Su Kinapangaluma nu Yakub kani Lia enggu Rakil
Guna maipus su nakasaulan a kinagkaleben nu Yakub lu ba 15 na nia pidtalu sa lekanin ni Laban na “Dikena nia nin maena i 'bpagalia ta na papenggalebeken ku seka sa dala sukay nin. Edtalu ka sa laki u pila i isukay ku sa leka.” 16 Saleta mambu na si Laban na aden dua kataw a wata nin a laga. Na nia ngala nu kaka na si Lia enggu su ali menem na si Rakil. 17 Na si Lia na mapia i kinanggumata nin ugaid'a si Rakil na mapia i kinanggulawas'in enggu manisan. 18 Na nalinian nu Yakub si Rakil tembu nia nin pidtalu kani Laban na “Enggalebek aku sa leka sa dalem'u pitu lagun a sunggud ku kani Rakil.” 19 Na nia pidtalu ni Laban na “Mayun aku sa entu ka nia ku pan tinemu i seka i magkaluma nin kumin sa salakaw. Na maitu den ba, enggalebek ka sia sa laki.”
20 Na minggalebek su Yakub sa nakapitu lagun asal'a mapangaluma nin si Rakil, ugaid'a sabap kanu lilini nin kani Rakil na mana namakapila gay bu i kinagedam'in kanu kinanggalebek'in a entu.
21 Daka nia pidtalu nu Yakub kani Laban na “Nauma den su kutika a dait a makawing kami den kanu wata nengka.” 22 Na guna su maitu na nagadil sa masela a kinagkalilang si Laban taman sa pinagakat'in su langun nu taw lu. 23 Ugaid'a kanu entu ba a magabi na da katawi nu Yakub i si Lia besen i inipadulug'i Laban sa lekanin, dikena si Rakil. 24 Na inenggay ni Laban su panunugun nin a si Silpa kani Lia.
25 Na guna su mapita den na nakakedu su Yakub guna nin madsuliman i si Lia besen i nadulug'in. Daka linemu sekanin kani Laban ka pidtaluan nin sa “Ngintu ka maya i pinakaidan nengka sa laki? Dikena ba minggalebek aku sa leka sa nakapitu lagun asal'a mapangaluma ku si Rakil? Na ngintu ka pinagakalan aku nengka?” 26 Na nia pidtalu ni Laban sa lekanin na “Benal su entu ugaid'a dikena adat-betad sia i mauna mapangaluma su ali kumin kanu kaka. 27 Palepas ka den muna i kapebpakalagian a nia ka endaw i kaipus'u sakapadian na inggay ku bun sa leka si Rakil amaika enggalebek ka pamun sa laki sa pitu lagun.”
28 Na minayun mambu su Yakub sa enggalebek pamun sekanin sa pitu lagun. Daka guna maipus su sakapadian na inenggay den ni Laban kanu Yakub si Rakil a mapangaluma nin. 29 Na inenggay bun ni Laban su panunugun nin a si Bilha kani Rakil. 30 Na dinulug'u Yakub si Rakil enggu inikalimu nin a benal kumin kani Lia. Daka minggalebek pan sekanin kani Laban sa nakapitu lagun.
Su manga Wata nu Yakub
31 Na katawan nu Kadenan a Mapulu i di ipegkalimu nu Yakub si Lia, tembu pigkahanda nu Kadenan i 'gkagingay si Lia ugaid'a si Rakil na dili. 32 Daka migkagingay si Lia taman sa mimbata sa wata a mama. Na nia nadtalu ni Lia na “Nailay nu Kadenan a Mapulu su kamalasayan ku, na saguna na ikalimu aku den nu kaluma ku.” Tembu nia nin lun inibedtu na Rubin.a 33 Na migkagingay menem sekanin enggu mimbata sa wata a mama taman sa nia nin pidtalu na “Inenggay bun sa laki i nia nu Kadenan a Mapulu kagina nakineg'in i di aku ipegkalimu.” Tembu nia nin inibedtu lun na Simiun.b 34 Na migkagingay menem sekanin 'bpaluman enggu mimbata bun sa wata a mama. Na nia nin nadtalu na “Mangiseg i kasupeg'u kaluma ku sa laki kagina telu kataw den i nambata ku a wata a mama.” Tembu binedtuan nin sa Libi.c 35 Daka migkagingay menem sekanin taman sa mimbata sa wata a mama. Na nia nin pidtalu na “Saguna na pugin ku su Kadenan a Mapulu.” Tembu nia nin inibedtu lun na Yahuda.d Daka tinemelen pan sekanin embata.