28
Guna su maitu na inipatawag'u Iskak su Yakub ka pinalihalan nin taman sa pidtaluan nin sa “Da ka a benal mangaluma sa babay a Kanaan. 2 Makin ka pagadil ka lu ka sa dalepa a Padan-Aram kanu sakambinabatan ni Bitul a ama nu ina nengka. Lu ka ba pamili sa mapangaluma nengka kanu manga edtenged'engka a wata ni Laban a suled'u ina nengka. 3 'Bpangenin ku kanu Kadenan a Barakat sa Langun i palihalan ka nin enggu enggan ka nin sa madakel a muliataw taman sa mabaluy ka a ama nu madakel a bangsa. 4 Na 'bpangenin ku bun i inggay nin sa leka taman kanu manga muliataw nengka su palihala kani Ibrahim ka enggu nengka mabpusaka su kalupan a pendadalepan nengka a inenggay nu Kadenan kani Ibrahim.” 5 Daka pinaganat den nu Iskak su Yakub 'bpawang sa dalepa a Padan-Aram kanu bapa nin a si Laban a wata ni Bitul a taw a Aram. Si Laban na suled'i Ribika a ina nu Yakub enggu Isaw.Su Kinapangaluma nu Isaw kanu Wata nu Ismail
6 Na nakineg'u Isaw i pinalihalan nu Iskak su Yakub taman sa pinalu nin sa dalepa a Padan-Aram ka enggu pakapangilay lu sa mapangaluma nin kagina sinapalan nin sa di kapangaluma kanu manga babay a Kanaan. 7 Na natawan nin bun i pinaginugutan nu Yakub su ama nilan enggu su ina nilan ka linemu sa dalepa a Padan-Aram. 8 Guna katuntayi nu Isaw i di 'gkalinian nu ama nin su manga babay a Kanaan 9 na linemu sekanin kanu bapa nin a su Ismail a wata nu Ibrahim ka inipanduaya nin su wata nu Ismail a si Mahalat a ali ni Nibayut.
Su Kinadtaginep'u Yakub
10 Na ginanatan nu Yakub su dalepa a Birsiba ka linemu sekanin kanu pagingedan sa dalepa a Haran. 11 Guna su pedsukilep den kanu kabpelalakaw nin na nakauma sekanin sa mapia a dayag a kapangintelenan, na lu ba sekanin napagkagabi. Na nakailay sekanin lu ba sa watu a mapia a 'bpagulunan na miniga lu ba ka tinemulug. 12 Na midtaginep sekanin sa aden kun panikan a nakaudsad sia sa dunia enggu su pundu nin na nakauma lu sa sulega taman sa nailay nin su manga malaikat'u Kadenan a manik-maba kanu panikan. 13 Daka nailay nin su Kadenan a Mapulu a pedtindeg lu kanu ubay nin a midtalu sa “Saki su Kadenan a Mapulu a su Kadenan nu tuwa nengka a si Ibrahim enggu su Kadenan nu ama nengka a si Iskak. Na su kalupan ba a nia a 'bpagigan nengka na inggay ku sa leka taman kanu manga muliataw nengka. 14 Na su manga muliataw nengka na mana su kadakel'u libubuk taman sa makalapat silan kanu pat a pisuk'u dunia. Na sia makanggulalan sa leka enggu kanu manga muliataw nengka na kapalihalan su langun nu bangsa. 15 Na pakikineg ka, tapiden ku seka enggu pangelungan ku seka sa apia endaw ka mangay taman sa pambalinganen ku seka kanu nia a kalupan. Di ku seka tagaken taman sa tumanen ku su langun na inibpasad ku sa leka.”
16 Daka nakagedam su Yakub taman sa nia nin nadtalu na “Di ku katawan i sia ba besen su Kadenan a Mapulu! 17 Na sangat a makagilek su nia a dalepa! Ka nia besen ba su walay nu Kadenan enggu su bengawan nu sulega.”
18 Na mibpanay sekanin gemedam kanu entu a mapita ka kinua nin su watu a inulunan nin ka pinatindeg'in a tademan enggu binubusan nin sa lana ka inidsela-sela nin kanu Kadenan a Mapulu. 19 Na binedtuan nin su entu a dalepa sa Bitil,a ugaid'a nia andang a ngala nu siudad a entu na Lus. 20 Daka mibpasad su Yakub kanu Kadenan a Mapulu sa “Hu Kadenan ku, amaika tapiden aku nengka enggu tiakapan aku nengka kanu nia a kabpelalakaw ku taman sa enggan aku nengka sa makan enggu mambalegkas 21 taman sa makambalingan aku sa dala bun baya-baya nin kanu walay nu ama ku, na seka a Kadenan a Mapulu i mabaluy a Kadenan ku. 22 Na su nia a pinatindegan ku sa watu a tademan, na mabaluy a simban sa leka a Kadenan taman sa inggay ku sa leka su ikasapulu bad kanu langun nu inggay nengka sa laki.”