Su Kinakua nu Yakub kanu Palihala nu Isaw
27
Guna su matua den su Iskak enggu di den gaid pakaalung na inipatawag'in su kaka a wata nin a su Isaw. Guna sekanin makauma na nia nin pidtalu na “Ngintu ba ama?” 2 Daka nia inisawal'u Iskak na “Ilay ka, matua aku den na di ku katawan u kanu i kapatay ku. 3 Na kua ka su busug'engka ka lu ka sa damakayu ka panganupi aku sa talaw a binatang. 4 Ilutu ka sa laki sa mapia a mana su 'gkalilinian ku pegkan. Na edtanggit ka sa laki ka endaw i kapasad ku lun keman na palihalan ku seka gagalu na bibiag aku pamun.”5 Saleta na kanu entu ba a timpu na 'bpaninilung besen si Ribika kanu kapembitiala nu Iskak kanu Isaw. Daka guna makaganat su Isaw kanu kabpanganup'in 6 na nia pidtalu ni Ribika kanu Yakub na “Nakineg ku a inimbitiala ni ama nengka si Isaw sa nia nin pidtalu na 7 ‘Pananggiti aku sa talaw a binatang ka ilutu ka sa laki sa mapia ka endaw i kapasad ku lun keman na palihalan ku seka sia kanu adapan nu Kadenan a Mapulu gagalu na bibiag aku pamun.’ 8 Na kagina ka maitu wata ku, na pakikineg aku ka enggula ka i isugu ku sa leka. 9 Lu ka kanu manga ayam ka kuayi aku sa dua timan a mangasebud enggu manganguda a kambing. Daka ilutun ku sa mapia kani ama nengka a mana bun su 'gkalilinian nin pegkan. 10 Na italagad'engka kani ama nengka ka enggu ka nin kapalihalan gagalu na bibiag pan sekanin.”
11 Ugaid'a nia inisumpat'u Yakub kanu ina nin na “Panun i nia ka si Isaw na bumbulen ugaid'a saki na dikena? 12 Na amaika abpelen aku ni ama na katukawan nin i 'bpagakalan ku sekanin, na dikena palihala i makua ku ka sinta.”
13 Na nia inisumpat'u ina nin na “Sia makasugat sa laki su sinta sa leka. Na paginuguti ka bu i ipedsugu ku sa leka, lu ka den, ka sigkem ka su manga kambing ka it ka sa laki.” 14 Na linemu den mambu sekanin ka sinigkem'in den su dua timan a kambing ka init'in kanu ina nin enggu inilutu mambu nu ina nin sa mapia a mana bun su 'gkalilinian nu ama nin pegkan. 15 Daka kinua ni Ribika su mapia a balegkas'u Isaw a lu kanu walay ka inipambalegkas'in kanu Yakub 16 enggu inibaus'in su upis'u kambing kanu lima nu Yakub taman kanu tengu nin. 17 Daka inidual'in kanu Yakub su inilutu nin enggu su pan.
18 Na linemu den mambu su Yakub kanu ama nin ka nia nin pidtalu na “Nia aku den ama!” Na nia nakasawal'u ama nin na “Entain i nia? Si Isaw atawa ka si Yakub?” 19 Na nia inisumpat'u Yakub na “Saki su kaka a wata nengka a si Isaw. Nanggula ku den su inisugu nengka sa laki. Na embangun ka ka enggu ka makakan kanu napanganup ku ka enggu aku nengka den 'gkapalihalan.”
20 Na nia nadtalu nu Iskak na “Panun a entu, ka mangagan gaid i kinakua nengka lun manganup?” Nia nin inisumpat na “Kagina su Kadenan nengka a Mapulu na tinabangan aku nin sa kakua ku lun.” 21 Na nia menem pidtalu nu Iskak kanu Yakub na “Ubay ka sia wata ku, ka pegkiugan ku seka 'bpagabpel asal'a matalanged ku i saben-sabenal a seka si Isaw.” 22 Daka minubay den mambu su Yakub ka inabpel'u ama nin a nia natagu sa ginawa nin na “Su suala nin na si Yakub ugaid'a su lima nin na kani Isaw.” 23 Na da nin katusi su Yakub kagina su lima nin na pagidsan nu kaka nin a su Isaw a bumbulen bun. Na 'bpeludsuan nin den pebpalihala su Yakub 24 ugaid'a inidsan nin pamun 'bpaluman sa “Saben-sabenal ba a seka si Isaw?” Nia nin inisawal na “Uway, saki.”
25 Daka nia pidtalu nu Iskak na “Inggay nengka sa laki su inilutu nengka a talaw a binatang ka endaw i kapasad ku lun keman na palihalan ku seka.” Na inenggay den mambu sa lekanin nu Yakub taman sa kinan nin enggu inenggan nin pan sa alak a ig'a ubas. 26 Daka nia pidtalu nu Iskak sa lekanin na “Ubay ka sia ka sium aku.”
27 Daka minubay den mambu sekanin ka sinium'in su ama nin. Na guna mabaw nu Iskak su balegkas'u Yakub na nakapaginugut bun entu pan ka pinalihalan nin sa nia nin kadtalu na
“Ilay ka! Su baw nu wata ku
na mana bun su baw nu malinawag
a nia lun pebpalihala na su Kadenan a Mapulu.
28 'Bpangenin ku kanu Kadenan
i enggan ka nin sa namug, masibukal a lupa,
madakel a masabpet enggu enggan ka nin bun sa alak a ig'a ubas.
29 'Bpangenin ku bun i sugutan nin
a mapanunugu nengka su manga bangsa
taman sa mamedsugiud silan sa leka.
“Kandatuan nengka su manga suled'engka
taman sa mamedsugiud bun silan sa leka.
Na makadsinta su apia entain a edsinta sa leka,
enggu kapalihalan su apia entain a mangalimuan sa leka.”
Namagayuk su Isaw sa Palihalan nu Iskak
30 Na endaw i kinapasad malihala nu Iskak kanu Yakub na ginemanat den sekanin na entu bun ba mambu i kinauma nu Isaw ebpun kanu kinapanganup'in. 31 Na inilutu nin bun sa mapia su pinanganup'in ka pinananggit'in kanu ama nin. Na nia nin pidtalu kanu ama nin na “Embangun ka ama ka kan ka su pinanganup'u wata nengka ka enggu aku nengka 'gkapalihalan.”
32 Daka nia nakaidsa nu ama nin lun na “Entain ka?” Nia nin nakasawal na “Saki su kaka a wata nengka a si Isaw.”
33 Na kinemegkel'a sakit'a ginawa su Iskak taman sa nia nin nadtalu na “Entain maitu i nananggit a entu sa laki sa pinanganup'in? Bagu pamun a entu i kinapasad ku lun keman taman sa pinalihalan ku den sekanin na di den maawa lekanin su entu taman sa taman.”
34 Guna makineg'u Isaw su kadtalu nu ama nin na minuliang sekanin sa lawan i katanug'in taman sa namagayuk den kanu ama nin sa “Saki bun ama, palihalai aku bun!” 35 Ugaid'a nia pidtalu nu Iskak na “Pinagakalan aku nu suled'engka, na nakua nin den su palihala nengka.”
36 Na nia nadtalu nu Isaw na “Nakadait abenal su maena nu ngala nin a Yakub kagina nia den ba i ikadua a kinapagakal'in sa laki! Kinua nin den su kakakai ku lun na saguna na kinua nin menem su palihala ku.” Na nia nin pan nadtalu na “Da den a benal inisama nengka sa laki a palihala?”
37 Nia nakasawal'u Iskak na “Saben-sabenal a kandatuan ka nin taman sa inipayag ku lun i mapangungulipen nin su langun nu suled'in taman sa pambalilidsekin sekanin nu Kadenan a Mapulu sa manga masabpet enggu alak a ig'a ubas. Na da den katawan ku a pakaidan ku sa leka a wata ku!” 38 Na nia nin pan nakapamagayuk kanu ama nin na “Apia sawalu na da den makapalihala nengka sa laki ama? Palihalai aku bun mambu ama!” Na 'bpaguguliang bun a benal su Isaw.
39 Daka nia nakasawal sa lekanin nu ama nin na
“Pakikineg ka, su pendadalepan nengka
na tangkan nu namug
enggu dala mangengetu lun.
40 Na sia makanggulalan kanu sundang'engka
na mauyag ka.
Na mapanunugu ka nu suled'engka,
ugaid'a amaika matu ka
na mapukas ka
kanu kapegkagaga nin.”
41 Na nabensian a benal'u Isaw su Yakub sabap kanu nakapalihala nu ama nilan. Nia natagu sa ginawa nin na “Amaika matay den si ama, kagina mangagan den i entu mauma na imatayan ku si Yakub.”
42 Guna katawi ni Ribika su kahanda nu Isaw na inipatawag'in su Yakub ka nin lun pidtalu na “Pakikineg ka, pegkahandan ni Isaw i kaimatay nin sa leka asal'a makasuli. 43 Kagina ka maitu na pagadil ka, ka palaguy ka, ka lu kanu suled ku a si Laban sa dalepa a Haran. 44 Lu ka demun ba 'gkakaleben sa lekanin taman sa kadenggawan su pamusungan nu suled'engka. 45 Na amaika maawa den su lipunget'in enggu kalipatanan nin den u ngin i pinakaidan nengka sa lekanin na entu pan ka ipakua ku seka. Kagina di ku magaga u dua kanu den na matekaw madala sa laki sa sakelap mata bu.”
Su Kinapalu nu Iskak kanu Yakub lu kani Laban
46 Daka nia pidtalu ni Ribika kanu Iskak na “'Gkasemu aku den kanu manga babay a nia a taw a Hit. Amaika nia bun mapangaluma ni Yakub i isa kanilan na nia tinemu i minatay aku den.”