Su Kinapagakal'u Iskak kanu Abimilik
26
Na aden nakatingguma a kinanggutem kanu entu a dalepa a liu kanu nauna a kinanggutem kanu timpu nu Ibrahim. Na linemu su Iskak sa dalepa a Girar a nia lun pendatu na bedtuan sa Abimilik a datu nu manga taw a Pilistin. 2 Daka pibpayagan sekanin nu Kadenan a Mapulu ka nia nin pidtalu na “Da ka 'bpelu sa dalepa a Egypt ka lu ka endalepa kanu dalepa a edtalun ku sa leka. 3 Sia ka demun pan ba 'gkakaleben ka tapiden ku seka taman sa palihalan ku seka kagina inggay ku sa leka enggu kanu manga tupu nengka su nia a manga kalupan a mana bun su inibpasad ku kanu ama nengka a si Ibrahim. 4 Pagkadakelen ku su manga tupu nengka a mana su kadakel'u bitun kanu kawang-kawangan, enggu inggay ku kanu manga tupu nengka su nia a manga kalupan. Na sia makanggulalan kanu manga tupu nengka na kapalihalan su langun nu bangsa sia sa liwawaw na dunia 5 kagina pinaginugutan nu Ibrahim su kadtalu ku, su manga kasuguan ku, su manga pangitaban ku enggu su inipapata ku sa lekanin.” 6 Na guna su maitu na lu den ba mindadalepa sa dalepa a Girar su Iskak.7 Na sabap sa manisan a babay su kaluma nu Iskak a si Ribika na inidsa nu manga mama kanu entu a dalepa u ngin nu Iskak si Ribika. Na nia nin inisumpat na “Suled ku sekanin.” Da nin edtalua i kaluma nin kagina 'gkagilekan sa imatayan sekanin ka enggu nilan makua si Ribika.
8 Na guna su malu nauget den lu su kapegkaleben nu Iskak kanu entu a dalepa, na aden isa a gay a natulungan ni Abimilik a datu nu manga Pilistin su Iskak a pedsuyaten nin si Ribika. 9 Daka inipatawag'i Abimilik su Iskak ka pidtaluan nin sa “Nia nin kabantang na kaluma nengka besen sekanin. Na ngintu ka nia nengka pidtalu na suled'engka sekanin?”
Na nia nakasawal'u Iskak na “Kagina nagilekan aku ka nia ku kataw na imatayan aku sabap sa lekanin.” 10 Nia pan pidtalu ni Abimilik na “Ngintu ka maitu i pinakaidan nengka sa lekami? Panun u dinulug sekanin nu isa kanu manga mama sia? Na amaika maitu na seka i nananggit sa kabaladusan sia sa lekami.” 11 Daka pinasabutan ni Abimilik kanu langun nu manga taw i apia entain i mamungkaid kanu 'gkalumaya a nia na paimatayan nin.
Su Kinapamagukag makapantag kanu manga Kalut
12 Na nangangawid su Iskak kanu entu a dalepa taman sa nakasabpet sekanin sa nakamagatus takep kanu entu bun ba a lagun kagina pinalihalan sekanin nu Kadenan a Mapulu 13 tembu migkawasa sekanin. Na 'gkaumanan-'gkaumanan bun su kapegkapantiali nin taman sa migkawasa a benal sekanin. 14 Na nadsekelan a benal sekanin nu manga taw a Pilistin kagina madakel gaid i panunugun nin, manga bili-bili nin, manga kambing enggu manga sapi nin. 15 Na sabap kanu kinadsekel'u manga taw a Pilistin na tinampulan nilan su manga kalut'u Iskak a inumbal pan nu manga panunugun nu Ibrahim a ama nin kanu timpu a bibiag pan sekanin. 16 Daka pidtaluan ni Abimilik su Iskak sa “Tangkai kami den ka mabagel ka den a benal kumin sa lekami.”
17 Guna su maitu na minalat su Iskak lu kanu kadatalan nu dalepa a Girar ka lu ba sekanin migkakaleben. 18 Na inipakagkal 'bpaluman nu Iskak su manga kalut a inumbal kanu timpu nu ama nin a su Ibrahim a tinampulan nu manga taw a Pilistin ulian nu kinapatay nu Ibrahim. Na nia bun inibedtu nu Iskak kanu manga kalut a entu na su andang bun a inibedtu lun nu ama nin. 19 Na kinemalut su manga panunugun nu Iskak lu kanu kadatalan na nakatun silan sa bualan na ig 20 ugaid'a nakadsusumpata su manga danden a manga taw lu a pedtuganul sa bili-bili kanu 'bpamedtuganul sa bili-bili nu Iskak makapantag kanu kalut sa nia nilan kadtalu na kanilan kun su entu a bualan. Tembu binedtuan nu Iskak su kalut a entu sa Isika kagina pinagukag sekanin nu manga danden a manga taw lu. 21 Daka kinemalut menem su panunugun nu Iskak na linimbul bun silan nu manga danden a manga taw sa dalepa a Girar tembu binedtuan menem'u Iskak su entu sa Sitna.b 22 Na inawan nin menem su entu ka kinemalut menem silan 'bpaluman, na da den ba a entu linemimbul kanilan tembu binedtuan nin su kalut a entu sa Rihubutc ka nia nin pidtalu na “Saguna na inenggan tanu nu Kadenan a Mapulu sa maulad a dayag enggu embuad-buad tanu kanu nia a dalepa.”
23 Na iganat lu ba na linemu su Iskak sa dalepa a Birsiba. 24 Na kanu entu bun ba a magabi na pibpayagan sekanin nu Kadenan a Mapulu sa nia nin pidtalu sa lekanin na “Saki su Kadenan a Mapulu ni Ibrahim a ama nengka. Na da ka 'gkagilek ka tapiden ku seka enggu palihalan ku seka taman sa pagkadakelen ku su tupu nengka sabap kanu ulipen ku a si Ibrahim.” 25 Daka minumbal lu ba su Iskak sa pegkurbanan ka sinemimba sekanin kanu ingala nu Kadenan a Mapulu. Daka pinatindeg'in lu ba su kagkakalebenan nin taman sa kinemalut bun lu ba sa kalut su manga panunugun nin.
Su Kapasadan nu Iskak enggu si Abimilik
26 Na linemu kanu Iskak si Abimilik a ebpun sa dalepa Girar a kaped'in si Ahusat a 'bpangingindawan sa lekanin taman kani Pikul a mapulu nu manga sundalu nin. 27 Na inidsan silan nu Iskak sa “Ngin i pegkuan nu sia? Dikena ba pinakabulugan aku nu a benal taman sa pinaawa aku nu?”
28 Na nia inisumpat'i Abimilik na “'Saben-sabenal a pedtapiden ka nu Kadenan a Mapulu. 'Gkapangingalap'ami i makapangaden tanu sa mabagel a kapasadan. 29 Idsapa nengka i di kami nengka 'bpamungkaidani a mana bun su da nami kapamungkaid sa leka. Pibpia-pianan nami seka enggu malilintad i kinapaganat'ami sa leka. Na saben-sabenal a pinalihalan ka nu Kadenan a Mapulu.”
30 Daka inadilan silan nu Iskak sa madakel a pegken ka kineman silan enggu mininem. 31 Na nia nin kinagkapita na mibpanay silan gemedam ka midsasapaya silan. Na nagetaw den silan kanu Iskak enggu pinaganat'in mambu silan sa malilintad. 32 Na kanu entu bun ba a gay na nakauma su manga panunugun nu Iskak ka inipanudtul'ilan su makapantag kanu kalut a nakagkal'ilan. Nia nilan lun pidtalu na “Nakatun kami sa bualan na ig!” 33 Na binedtuan nu Iskak su kalut a entu sa Sibad enggu sampay den saguna na su ngala nu dalepa a entu na Birsiba.e