Su Kinapatay nu Ibrahim
25
Na nangaluma su Ibrahim sa ped a babay a bedtuan sa Kitura. 2 Nakambata silan sa manga wata a mama a si Simran, Yuksian, Midan, Midian, Isbak enggu si Suak. 3 Si Yuksian ba a nia i ama ni Siba enggu Didan. Na si Didan ba a nia i nabpunan nu manga taw a Asur, manga taw a Litus enggu su manga taw a Lium. 4 Daka nia menem manga wata ni Midian na si Ipa, si Ipir, si Hanuk, si Abida enggu si Ildaha. Na silan ba a nia langun su manga tupu ni Kitura.5 Na langun nu kaaden nu Ibrahim na lu nin inibpusaka kanu Iskak. 6 Ugaid'a kanu bibiag pan sekanin na pinangumunan nin den sa tamuk su manga wata nin a mama sa ped a manga babaya enggu pinalu nin silan kanu dalepa a mag sa sebangan a mawatan kanu wata nin a su Iskak.
7 Na nia kinauget'u kinapaguyag-uyag'u Ibrahim na magatus enggu pitupulu enggu lima lagun. 8 Na matua den a benal sekanin kanu kinapatay nin taman naguyag-uyag sekanin sa mapia entu pan ka minatay sekanin. 9 Na inilebeng sekanin nu dua kataw a wata nin a su Iskak enggu su Ismail lu kanu takub sa Makpila a lu mag sa sebangan na Mamri lu kanu kalupan ni Iprun a wata a mama ni Suhar a taw a Hit. 10 Napamasa i entu nu Ibrahim kanu tupu nu manga taw a Hit ka lu ba nakalebeng su kaluma nin a su Sara enggu lu bun ba mambu sekanin nakalebeng. 11 Ulian nu kinapatay nu Ibrahim na pinalihalan nu Kadenan a Mapulu su wata nin a su Iskak enggu lu sekanin migkaleben sa dalepa a Bir-lahay-ruwi.b
Su Tarsilan kanu Tupu nu Ismail
12 Nia ba su tarsilan kanu manga tupu nu Ismail a wata nu Ibrahim kanu taw sa Egypt a si Hagiar a panunugun nu Sara.
13 Nia su kinadtundug-tundug'u manga wata a mama nu Ismail. Nia kaka sa langun na si Nibayut entu pan ka si Kidar, si Adbil, si Mibsam, 14 si Misma, si Duma, si Masa, 15 si Hadad, si Tima, si Hitul, si Napis enggu si Kidima. 16 Na silan ba a entu su sapulu enggu dua a manga datu a wata a mama nu Ismail a 'gkangaunutan nu sapulu enggu dua a bangsa. Nia inibedtu kanu bangsa nilan enggu su pendalepan nilan na su ngala nu uman i isa kanilan. 17 Na nakagaus pan sa magatus enggu telupulu enggu pitu lagun su umul'u Ismail entu pan ka minatay sekanin. 18 Na lu mindalepa su manga tupu nu Ismail kanu pageletan nu kalupan na Habila enggu Sur a lu mag kanu lalan a ipedsangul sa dalepa a Asiria a lu mag kanu sebangan na dalepa a Egypt. Na lalayun nilan pedsamuken su kapegkakaleben nu manga pagali nilan.
Su Kinambata kanu Yakub enggu su Isaw
19 Na nia ba su tarsilan nu manga tupu nu Iskak a wata a mama nu Ibrahim.
20 Nakapatpulu lagun su Iskak kanu kinapangaluma nin kanu suled'i Laban a si Ribika a wata a babay ni Bitul a taw sa Aram a lu pendalepa sa Padan-Aram. 21 Na kagina ka di pembata su kaluma nu Iskak na nangeni-ngeni sekanin kanu Kadenan a Mapulu. Na pinakikineg sekanin nu Kadenan a Mapulu taman sa migkagingay si Ribika. 22 Na sia pan sa didalem'a tian su kagingay nin na pedsumaga den silan taman sa nia nadtalu na ginawa ni Ribika na “Ngin i 'gkanggula ku a nia?” Tembu nangeni-ngeni sekanin kanu Kadenan a Mapulu.
23 Na nia inisawal sa lekanin nu Kadenan a Mapulu na
“Su ipegkagingay nengka na leping.
Su dua kataw a wata kanu wawatan nengka
na su katupuan nu dua a bangsa a makabpitas.
Su sakataw na mabagel kumin kanu sakataw,
na mapanunugu nu mauli
su mauna embatan.”c
24 Guna mauma su gay nu kapembata nin na leping den ba i nambata nin. 25 Na nia nauna ginememaw na maliga-liga i lanitan nin enggu bumbulen tembu Isawd i inibedtu lun. 26 Daka nakatundug menem su sakataw a nakakapet kanu palu nu leping'in tembu binedtuan sa Yakub.e Na nakanempulu lagun i umul'u Iskak kanu kinambata kanilan.
Su Kinadsambi nu Isaw kanu Kawagib'in sa Kakakai
27 Guna su manga kanakan den silan na migkategel manganup su Isaw enggu nia nin bu dalepa na damakayu. Ugaid'a su Yakub na di gaid edtalu-talu enggu di gaid semugud. 28 Na nia tinemu nu Iskak na su Isaw kagina 'gkalinian nin pegkan su manga talaw a binatang a 'gkakua nu Isaw 'bpanganup, ugaid'a si Ribika menem na nia nin tinemu na su Yakub.
29 Na aden isa a gay a gagalu nu kabpagilutu nu Yakub sa kamu na nakauma su Isaw ebpun kanu kinapanganup'in a 'gkagutem a benal. 30 Daka nia nin pidtalu kanu Yakub na “'Gkagutem aku gaid. Enggi aku pan sa 'bpagilutun nengka a nan a maliga.” Nia bun ba i sabapan na kinabedtu kanu Isaw sa Idum.f
31 Nia inisawal'u Yakub na “Uway, leka den langun amaika inggay nengka sa laki su kawagib'engka sa kakakai.”g 32 Nia inisawal'u Isaw na “Ilay ka, ngin i katagan na kakakai ku amaika pebpatay aku menem'a gutem?” 33 Nia pidtalu nu Yakub na “Amaika maitu na edsapa ka muna.” Na midsapa mambu su Isaw ka inidsambi nin su kawagib'in sa kakakai. 34 Daka inenggay den mambu nu Yakub kanu Isaw su inilutu nin a kamu a mana munggu taman sa inenggan nin pamun sa pan. Na guna makapasad keman enggu minem su Isaw na minawa bun semambut. Dala pinatagan nu Isaw kanu kawagib'in sa kakakai.