Su Kinapangaluma nu Iskak
24
Na kanu nia ba a manga timpu na matua den a benal su Ibrahim enggu sangat a pinalihalan sekanin nu Kadenan a Mapulu. 2 Daka nia pidtalu nu Ibrahim kanu 'gkasaligana nin kanu manga panunugun nin enggu sinaligan kanu langun nu kaaden nin na “Ililip'engka su lima nengka sia kanu didalem'u bubunb ku 3 ka enggu ku seka makapadsapa sia kanu ingala nu Kadenan a Mapulu a su Kadenan nu langit enggu lupa sa di nengka papangaluman su wata ku a si Iskak kanu manga babay sia sa Kanaan a su pendalepan ku saguna. 4 Ugaid'a lu ka angay kanu dalepa ku, lu kanu manga pagali ku ka lu ka ba sekanin pangilayi sa mapangaluma nin.”5 Daka inidsan sekanin nu panunugun sa “Panun amaika su matun ku a babay ka di munut sa laki embalingan sia, na ngintu, kapakayan a si Iskak i pananggiten ku lu ba?” 6 Ugaid'a nia pidtalu sa lekanin nu Ibrahim na “Di kapakayan! Kalimu-limu ka na di ka pedtapika su wata ku lu. 7 Kagina su Kadenan a Mapulu a su Kadenan nu sulega a napaawa sa laki lu kanu manga tupu nu ama ku a su dalepa nu manga pagali ku i mibpasad sa laki sa inggay nin kanu mangauma a tupu ku su kalupan ba a nia. Na sugun nin mapauna su malaikat'in ka enggu ka makatun lu ba sa babay a mapangaluma nu wata ku. 8 Amaika di munut sa leka embalingan su babay a matun nengka na makapukas ka den ba a entu kanu sapa. Ugaid'a kalimu-limu ka bu na di ka pedtapika su wata ku lu ba.” 9 Na guna su maitu na inililip den nu panunugun su lima nin lu kanu didalem'u bubun nu Ibrahim ka inidsapa nin i enggulan nin su langun nu ipedsugu sa lekanin nu Ibrahim.
10 Daka kinemua su panunugun sa sapulu timan a unta enggu ginemanat a init'in su uman i embalangan kanu mapia a tamuk'u mapulu nin. Na linemudsu den ba a entu sekanin lemakaw 'bpawang lu kanu siudad a pindalepan ni Nahur a lu sa dalepa a Aram-Naharaim. 11 Guna sekanin makauma na pinadtinggaleb'in su manga unta lu kanu ubay nu kalutc a lu tampal kanu liu nu siudad kagina pedsedep den su senang. Na entu ba su kadsalilidan a kutika nu kabpanageb'u manga babay. 12 Daka nangadapd sekanin sa nia nin kadtalu na “Hu Kadenan a Mapulu a pedsimban nu mapulu ku a si Ibrahim! Palihalai aku nengka kanu lakaw ku saguna enggu inggay nengka kanu mapulu ku su da idsan nin a limu nengka sa lekanin. 13 Sia aku saguna pedtindeg kanu ubay nu kalut a 'bpamanageban nu manga laga a dumadalepa kanu nia a siudad. 14 Na pangenin ku kanu isa kanu manga laga a entu i ‘Amaika mapakay bu na ibaba nengka pan su 'bpanaguan nengka sa ig ka enggu aku makainem.’ Na amaika sawalen aku nin sa ‘Inem ka den taman kanu manga unta nengka.’ Na nia nin maena na sekanin su pinamili nengka a mapangaluma nu ulipen nengka a si Iskak. Sa maitu ba a ukit na maamad ku su da idsan nin a limu nengka kanu mapulu ku.”
15 Ugaid'a da gaid matana-tana kanu kabpangadap'in a entu na aden babay a nakatekaw demun nakauma a 'bpamusan sa 'bpanaguan sa ig a bedtuan sa Ribika. Nia ama ni Ribika na si Bitul a nia nin ama menem na si Nahur a kaluma ni Milka. Na si Nahur enggu su Ibrahim na edsuled. 16 Na manisan a benal a babay si Ribika enggu laga pamun ka da pan makapagukiten sa pidtalu a kambalagiuma. Daka linemu sekanin kanu kalut ka dinikenan nin sa ig su 'bpanaguan nin entu pan ka minuli. 17 Daka inalaw sekanin mamagayas'u panunugun ka nia nin lun pidtalu na “'Bpangenin ku sa leka i enggi aku pan sa paidu bu a ig a mainem ku.” 18 Na nia nin mambu inisawal na “Inem ka mapulu.” Daka inibaba nin mamagayas su 'bpanaguan nin sa ig ka inenggan nin su panunugun sa ig a mainem'in.
19 Guna nin den sekanin makapainem na pidtalu nin pamun kanu panunugun i “Sageban ku bun sa mainem'in su manga unta nengka ka enggu silan makainem langun.” 20 Daka inidingil'in mamagayas su ig lu kanu pebpagineman kanu manga ayam ka mimbabalingan sekanin manageb taman sa nakapainem'in langun su manga unta. 21 Saleta na pedsima-siman a benal sekanin nu panunugun ka enggu nin 'gkaamad u pinambantas'u Kadenan a Mapulu su lakaw nin atawa ka dala.
22 Na guna den makapasad minem su manga unta na inenggay lun nu panunugun su bulawan a ipebpamalang sa ngilung enggu su dua timan a bulawan a bulusu a mangapulu a benal i alaga nin. 23 Guna su maitu na inidsan nin sa “Mapakay a edtalun nengka sa laki u entain i kiwata sa leka? Aden kapangintelenan nami lu kanu walay nu ama nengka?” 24 Na nia nin inisawal kanu panunugun na “Wata aku ni Bitul a wata a mama ni Nahur enggu Milka.” 25 Na pidtalu nin pan i “Madakel a benal i makan lu nu manga unta nengka enggu aden bun kaigan nu lu kagina madaya su walay nami.” 26 Guna su maitu na sinemugiud su panunugun ka pinugi nin su Kadenan a Mapulu 27 sa nia nin pidtalu na “Pugin su Kadenan, su Kadenan nu mapulu ku a si Ibrahim! Da nin lipatani su dala idsan nin a limu nin kanu mapulu ku. Tinutulu aku nin kanu pegkalebenan nu pagali nu mapulu ku.” 28 Na minuli mamagayas si Ribika lu kanu ina nin ka pinanudtul'in kanilan su langun nu entu a nanggula.
29 Na aden suled'i Ribika a nia nin ngala na si Laban. Na pibpawangan mamagayas'i Laban su mama a entu a lu kanu ubay nu kalut 30 endaw demun i kinailay nin kanu pamalange sa ngilung'i Ribika, su manga bulusu lu kanu bulunguan nin enggu su kinakineg'in kanu kadtalu a entu ni Ribika. Na nauman nin a pedtindeg a masupeg kanu manga unta lu kanu ubay nu kalut su mama a entu. 31 Nia pidtalu ni Laban sa lekanin na “Nginan ka pedtindeg bu san? Hu seka a nan a pinalihalan nu Kadenan a Mapulu, talus ka lu sa walay ka aden lu pinagadil ku a kapangintelenan nengka taman kanu manga unta nengka.”
32 Na guna su maitu na minunut den mambu su panunugun. Daka guna silan makauma na inipapamaba den ni Laban su inipamelulan kanu manga unta enggu pinakan nin pan su manga ayam ba a entu. Daka nananggit si Laban sa ig a makapangagas sa ayf nu panunugun apeg den nu manga tagapeda nin. 33 Guna den mapagatul su pegken nilan na nia pidtalu nu panunugun na “Taman a di ku madtalu su tangga nu lakaw ku na di aku pan keman.” Daka nia mambu pidtalu ni Laban na “Amaika maitu na edtalu ka den.”
34 Daka nia nin pidtalu sa kanilan na “Panunugun aku ni Ibrahim. 35 Na sangat a pinalihalan nu Kadenan a Mapulu su mapulu ku a si Ibrahim sa langun na embalangan na pangangayamen a mana su bili-bili, manga kambing, sapi, manga unta enggu kimar. Pinalihalan bun sekanin sa manga pilak, bulawan, enggu manga panunugun a magidsan i mama enggu babay tembu migkawasa a benal sekanin. 36 Na pigkahanda bun nu Kadenan i makambata pamun si Sara a kaluma nu mapulu ku apia matua den sekanin. Na su wata nilan ba a entu i makabpusaka kanu langun nu kaaden nin. 37 Na pinadsapa aku nu mapulu ku sa pinakalimu-limu nin sa laki i di ku papangaluman su wata nin kanu manga babay sa Kanaan a su pendalepan nin saguna. 38 Na sia aku nin ba pinaangay kanu dalepa nu manga lukes'in enggu manga pagali nin ka enggu ku 'gkapangilayan sia ba su wata nin sa mapangaluma nin. 39 Daka inidsan ku sekanin sa ‘Panun amaika di munut sa laki su babay a matun ku?’ 40 Na nia nin inisawal sa laki na ‘Su Kadenan a Mapulu a pedsaligan ku kanu uyag-uyag ku na sugun nin mapauna su malaikat a makatapid sa leka asal'a pembantas su lakaw nengka ka enggu ka makatun sa babay a mapangaluma nu wata ku a ebpun kanu dalepa nu manga lukes ku enggu manga pagali ku. 41 Na amaika makalu ka kanu manga pagali ku enggu di nilan paunuten sa leka su babay a matun nengka na makapukas ka den kanu entu a sapa.’
42 “Na endaw demun i kinauma ku lu kanu ubay nu kalut na nia ku nadtalu sa ginawa ku na ‘Hu Kadenan a Mapulu a su Kadenan nu mapulu ku a si Ibrahim! 'Bpangenin ku sa leka i pambantas ka su lakaw ku saguna. 43 Sia aku saguna pedtindeg kanu ubay nu kalut. Na pangenin ku kanu isa kanu manga babay a 'bpamanageb i painemen aku nin sa apia paidu bu ebpun kanu sinageb'in. 44 Na amaika nia nin isawal sa laki i “Inem ka den taman kanu manga unta nengka,” na sekanin den su pinamili nengka a mapangaluma nu wata nu mapulu ku.’
45 “Na da aku pamun makapasad kanu kabpangadap ku na nakauma si Ribika a aden 'bpamusayn nin a 'bpanaguan sa ig enggu linemu sekanin kanu kalut ka sinemageb. Daka pinangeni ku sa lekanin i painemen aku nin. 46 Na inibaba nin mamagayas su 'bpananggiten nin a ig ka nia nin pidtalu na ‘Inem ka den taman kanu manga unta nengka.’ Daka mininem aku mambu enggu pinainem'in bun su manga unta. 47 Na inidsan ku sekanin u entain i kiwata sa lekanin. Na nia nin pidtalu sa laki na wata kun sekanin ni Bitul a wata a mama ni Nahur enggu Milka. Na guna su maitu na inenggan ku sekanin sa ipebpamalang sa ngilung enggu manga bulusu. 48 Daka sinemugiud aku enggu sinimba ku su Kadenan a Mapulu ka pinugi ku su Kadenan nu mapulu ku a si Ibrahim. Pinangunanan aku nin ka enggu ku matun su babay a apu nu suled'u mapulu ku asal'a mapangaluma nu wata nin.
49 “Na kagina ka maitu na edtalu nu sa laki u ngin i makakalimu enggu makagkapia nu kanu mapulu ku ka enggu ku 'gkatawan u ngin i temundug a enggulan ku.”
50 Daka nia mambu inisawal'i Laban enggu Bitul na “Kagina ka langun nu entu na ebpun kanu Kadenan a Mapulu na di nami mapamalaw. 51 Ilay nu, nan si Ribika kanu kaadapan nu, na paunut'u den sekanin ka enggu mapangaluma nu wata nu mapulu nengka a mana bun su kahanda nu Kadenan a Mapulu.”
52 Na endaw demun i kinakineg'u panunugun kanu entu a kadtalu nilan na sinemugiud sekanin ka pinugi nin su Kadenan a Mapulu. 53 Daka inipameliu nin den su manga pangimuan a pilak enggu bulawan maitu bun su manga balegkas ka inenggay nin kani Ribika. Na pinangenggan nin bun sa manga balaalaga a langun-taman si Laban enggu su ina nin.
54 Na guna su maitu na ginemabi den silan enggu lu den ba silan tinemulug kanu walay ni Laban kanu entu ba a magabi. Daka nia nilan kinagedam na nagetaw sekanin sa nia nin pidtalu na “'Bpangenin ku sa lekanu i suguti kami nu a makambalingan den lu kanu mapulu ku.” 55 Ugaid'a nia pidtalu ni Laban enggu su ina ni Ribika na “Padtangen ka pan muna sekanin sia sa lekami sa apia sapulu gay bu ka endaw i kaipus'u entu na entu pan ka paunut'u sekanin.” 56 Guna su maitu na nia mambu pidtalu nu panunugun na “Kagina ka su Kadenan a Mapulu i napambantas kanu lakaw ku a nia na 'bpangenin ku i di aku nu den 'bpagangga. Suguti kami nu den a makaganat ka enggu kami makambalingan kanu mapulu ku.” 57 Daka nia nilan pidtalu na “Idsan tanu muna sekanin.” 58 Na tinawag'ilan si Ribika ka inidsan nilan den mambu sekanin sa “Na panun, 'bpagunut ka kanilan?” Na nia mambu inisawal'i Ribika na “Uway, 'bpagunut aku.”
59 Na guna su maitu na sinugutan nilan den mambu a makaunut si Ribika apeg'u panunugun nin a babay lu kanu panunugun nu Ibrahim enggu kanu manga tagapeda nin a mama. 60 Nia nilan pidtalu kani Ribika na
“Ipangeni-ngeni nami
i mabaluy ka a ina nu ngibu-ngibuan a tupu
enggu tabanan nilan
su apia entain a 'gkuntela kanilan.”
61 Na guna den makadtatakena si Ribika enggu su manga panunugun nin na migkuda den silan kanu manga unta ka minunut kanu manga mama. Na maitu ba i ukit a kinalapit'u panunugun kani Ribika.
62 Na nakambalingan den mambu su Iskak lu kanu pendalepan nin sa Nigib kagina lu sekanin ebpun sa Bir-lahay-ruwi. 63 Guna su pedsusukilep den na linemu su Iskak kanu malinawag ka 'bpangadap.g Kanu kabpangingilay nin na nakasandeng sekanin sa pakauma a manga unta. 64 Na guna mambu masandeng'i Ribika su Iskak na mimbaba sekanin kanu pegkudan nin a unta 65 ka inidsan nin su panunugun sa “Entain i mama a nan a 'bpagalaw sa lekitanu?” Nia inisawal'u panunugun na “Sekanin su mapulu ku.” Daka kinemua si Ribika sa tendung ka midtendungh sekanin. 66 Daka pinanudtul den mambu nu panunugun kanu Iskak su langun nu nanggula nin.
67 Na guna su maitu na pidtapik den nu Iskak si Ribika lu kanu pigkakalebenan nu ina nin taman sa pinakawingan nin. Na inikalimu a benal sekanin nu Iskak taman sa si Ribika i nakalimpang sa lekanin kanu gagaw nin kanu kinapatay ni ina nin.