Su Kinapatay nu Sara enggu su Kalebengan lun
23
Na nakasaut pan su umul'u Sara sa nakamagatus enggu duapulu enggu pitu lagun 2 entu pan ka minatay sekanin lu sa dalepa a Kiriat-arba a bedtuan bun sa Hibrun lu kanu kalupan sa Kanaan. Na sangat a ginagawana su Ibrahim taman sa inuliangan nin su entu.a3 Daka ginanatan muna nu Ibrahim su bangkay nu kaluma nin ka inimbitiala nin su manga taw a Hitb sa nia nin pidtalu na 4 “Lapu aku bu sia sa kanu dalepa nu. Na 'bpasai aku nu sa lupa a kapamelebengan ka enggu ku makalebeng lu ba su kaluma ku.”
5 Daka nia inisawal sa lekanin nu manga taw a Hit na 6 “Hu Mapulu, pakikineg kami nengka! Ipedtimbang'ami seka sa 'bpagadatan a datu. Na pamili ka den sa kalinian nengka a kalebengan kanu kaluma nengka ka apia sakataw sa lekami na dala edsingit lun i kalebeng'engka kanu kaluma nengka lu ba.”
7 Daka midtindeg su Ibrahim ka dinemukumc sekanin kanu manga taw a Hit a manga danden kanu dalepa. 8 Nia nin pidtalu sa kanilan na “U saben-sabenal a pedsugutan aku nu sa sia ku makalebeng su kaluma ku na 'bpangenin ku sa lekanu i tabangi aku nu mamitiala kani Iprun a wata ni Suhar 9 sa 'bpasan nin sa laki su takub sa dalepa a Makpila a lu kanu tedtab'u lupa nin. Pangeni nu sa lekanin i pabayadan nin i entu sa laki sia kanu kaadapan nu u ngin i ustu a alaga nin ka enggu ku kapamelebengan.”
10 Saleta mambu na natabu a benal i lu ba si Iprun kanu nangalimud a manga taw. Daka nia nin pidtalu kanu Ibrahim sa 'gkakineg bun nu manga taw a Hit a lu kanu bengawan nu siudadd na 11 “Ampun bu mapulu, pakikineg aku pan. Saksi ku su madakel a taw a natabu sia i dikena matag su takub bu i inggay ku sa leka ka apeg'u maliwanag a nabetadan nu entu na inggay ku sa leka a kalebengan kanu kaluma nengka.”
12 Daka dinemukum 'bpaluman su Ibrahim lu kanu kasangulan nu manga danden a taw kanu dalepa 13 ka inipapakikineg'in kanu manga taw a entu i kinadtalu nin kani Iprun sa “'Bpangenin ku sa leka i pakikineg aku pan. Pamasan ku sa leka su lupa nengka sa endaw i ustu a alaga nin. Na talima ka su kabpamasa ku lun ka enggu ku den makalebeng su kaluma ku.”
14 Nia inisawal sa lekanin ni Iprun na 15 “Saki menem i pakikineg ka mapulu. Nia alaga nu lupa na pat gatus timan a pilak.e Ugaid'a timbang a da i entu kapantag'in sa lekita ka nia balapantag na makalebeng su kaluma nengka.” 16 Daka inayunan nu Ibrahim su pidtalu sa lekanin ni Iprun. Guna su maitu na kinemua su Ibrahim sa pat gatus timan a pilak ka tinemimbang sia kanu kaadapan nu manga taw sia luyud kanu kadsalilidan a 'bpagusalen nu manga padagang.
17-18 Na maitu ba i ukit a kinapamasa nu Ibrahim kanu lupa ni Iprun lu sa dalepa a Makpila a lu mag sa sebangan nu Mamri. Na kanu Ibrahim den su langun nu entu apeg den nu langun nu manga kayu a nakabalibet lun taman den kanu takub a entu. Na pinamasa nin su entu sia kanu kaadapan nu manga taw a Hit a nangalimud lu kanu bengawan nu siudad. 19 Na guna su maitu na inilebeng den nu Ibrahim su Sara a kaluma nin lu kanu takub kanu dalepa a Makpila a lu mag sa sebangan nu Mamri a bedtuan bun sa Hibrun lu kanu kalupan sa Kanaan. 20 Na su lupa ba a entu enggu su takub a nakaludep lun na pinamasa nu Ibrahim kanu tupu nu manga taw a Hit ka inumbal'in a 'bpamelebengan.