Su Kinabatalu nu Kadenan a Mapulu kanu Nabi Ibrahim
22
Na guna maipus su entu na binatalu nu Kadenan su Ibrahim sa nia nin lun pidtalu na “Ibrahim!”Nia inisawal'u Ibrahim na “Hu Kadenan ku, nia aku bun!”
2 Daka nia pidtalu sa lekanin nu Kadenan na “'Bpangenin ku sa leka i paunut ka su wata nengka a su kaisa-isa nin a pinupusan nengka sa limu a si Iskak ka lu kanu kanu kalupan nu Muria ka igkurbana nengka sekanin sa laki sa kurban a pedtutungen langun lu kanu palaw a itutulu ku sa leka.”
3 Na nia nin mambu kinagkapita na mibpanay su Ibrahim ka inipagadil'in su kimar'in.b Pinaunut'in su dua kataw a panunugun nin enggu su wata nin a su Iskak. Na nananggit bun silan sa pinangulay a kayu ka linemu den silan kanu dalepa a pidtalu sa lekanin nu Kadenan.
4 Na nia nin kinatelu gay na nasandeng'u Ibrahim su dalepa a entu. 5 Daka nia pidtalu nu Ibrahim kanu manga panunugun nin na “'Gkalidtabun kanu demun sia apeg'u kimar ka embalinganan nami bu sekanu ka sekami bu kanu wata i temalus lu ba ka enggu kami makasimba.”
6 Na inipapananggit'u Ibrahim kanu Iskak su kayu a ibpelaleg kanu kapegkurban enggu sekanin menem i nananggit kanu waga na apuy enggu kanu masela a gelat.c Na kanu kabpelalakaw nilan 7 na tinawag'u Iskak su ama nin sa “Ama!” Nia mambu inisawal'u Ibrahim sa lekanin na “Ngin i entu ba wata ku?” Daka inidsan sekanin nu Iskak sa “Aden den waga na apuy enggu ibpelaleg ugaid'a endaw i bili-bili a ipegkurban a pedtutungen langun?” 8 Nia inisumpat'u Ibrahim sa lekanin na “Hu wata ku, su Kadenan i mangaden sa lekita sa entu.” Daka tinemalus den silan lemakaw.
9 Guna silan makauma kanu dalepa a pidtalu sa lekanin nu Kadenan na minumbal su Ibrahim sa pegkurbanan.d Daka inantang'in lu ba sa mapia su ibpelaleg a kayu entu pan ka pinawik'in su wata nin a su Iskak ka pinaiga nin lu kanu untul'u manga kayu a lu kanu pegkurbanan. 10 Daka kinua nu Ibrahim su gelat ka pedsumbalin nin den su wata nin. 11 Ugaid'a nakineg'in su suala nu malaikat'u Kadenan a Mapulu a ganat sa sulega a pedtawag lun sa “Ibrahim! Ibrahim!”
Nia nin nakasawal na “Hu Kadenan ku, nia aku bun.”
12 Na nia nin pidtalu kanu Ibrahim na “Di ka pedsumbali su wata nengka! Di ka sekanin mapakasakiti! Kagina naamad ku den i masela i gilek'engka kanu Kadenan kagina da nengka idsingit sa laki su kaisa-isa nin bu a wata nengka.”
13 Na guna 'bpelengi su Ibrahim na nailay nin su mama a bili-bili a nakasangkat i manga sidung'in kanu manga sapak'u kayu. Daka kinua nu Ibrahim su bili-bili a entu ka inigkurban nin sa tinutung langun a sambi kanu wata nin a su Iskak. 14 Na guna su maitu na binedtuan nu Ibrahim su entu a dalepa sa “Su Kadenan a Mapulu i 'Bpangaden lun.” Na iganat kanu entu a timpu na nia den pedtalu-talun nu manga taw na “Lu kanu palaw nu Kadenan a Mapulu na sekanin i mangaden.”
15 Na tinawag 'bpaluman nu malaikat'u Kadenan a Mapulu su Ibrahim 16 ka nia nin lun pidtalu na “Nia kadtalu nu Kadenan a Mapulu na ‘Ipebpasad ku i kagina ka pinggula nengka i nia enggu da nengka idsingit sa laki su kaisa-isa nin bu a wata nengka 17 na palihalan ku seka. Pagkadakelen ku su manga tupu nengka a mana su kadakel'u manga bitun sa kawang-kawangan enggu mana su kadakel'u pedtad'u dedsan. Na maagaw nilan su dalepa nu manga kuntela nilan. 18 Na kapalihalan su langun nu bangsa kanu liwawaw na dunia sia makanggulalan kanu manga tupu nengka kagina pinaginugutan nengka su kadtalu ku.’ ” 19 Na guna su maitu na pimbalinganan den nu Ibrahim su manga panunugun nin ka minuli silan lu sa Birsiba taman sa lu den ba silan mindalepa.
20 Da gaid mauget kanu kinaipus'u langun nu entu a nanggula na nakineg'u Ibrahim i si Milka a kaluma nu suled'in a si Nahur sa nakambata bun. 21 Na nia ngala nu kaka a wata nin na si Yus, nia temundug lun na si Bus, si Kamuil a ama ni Aram, 22 si Kisid, si Hasu, si Pildas, si Hidlap enggu si Bitul. 23 Na si Bitul ba a nia i ama ni Ribika. Na silan ba a nia su walu kataw a nambata ni Milka kani Nahur a suled'u Ibrahim. 24 Na sia menem kani Riuma a pegkakaluman ni Nahur na nia nin nambata na si Tiba, si Gaham, si Tahas enggu si Maaka.