Pimbata su Iskak
21
Na pinalihalan nu Kadenan a Mapulu su Sara ka tinuman nin su langun nu inibpasad'in lun a mana bun su pidtalu nin. 2 Tembu migkagingay su Sara taman sa mimbata silan kanu Ibrahim sa wata a mama kanu timpu a mangatua den silan a mana bun su pidtalu nu Kadenan. 3 Daka binedtuan nu Ibrahim su wata nilan kanu Sara sa Iskak.a 4 Na guna su nakawalu gay den i umul'u Iskak na pinaletakb sekanin nu Ibrahim a mana bun su inisugu sa lekanin nu Kadenan. 5 Na kanu timpu a kinambata kanu Iskak na nakamagatus lagun i umul'u Ibrahim.6 Guna su maitu na nia pidtalu ni Sara na “Kadtatawan a benal i pinakaidan nu Kadenan a nia sa laki! Na langun na makakineg lun na makadtatawa.” 7 Na pidtalu nin pan i “Aden ba taw a makadtalu kani Ibrahim sa makamuliataw aku pamun? Ugaid'a pidsan ka maitu na nakambata kami pamun sa apia mangatua kami den.”
8 Na guna den pegkasela su wata taman sa minenda den semusu kanu ina nin na kanu entu demun ba a gay na midsela-sela su Ibrahim. 9 Daka guna mailay nu Sara su Ismail a nambata ni Hagiar a taw sa Egypt a pedtataungaten nin si Iskak 10 na nia nin pidtalu kanu Ibrahim na “Paawa ka i panunugun a nan enggu su wata nin! Di dait a kaumunan su wata nu panunugun ka si Iskak bu i dait a kapusakan.” 11 Na sangat a inikalidu na ginawa nu Ibrahim su entu kagina wata nin bun su Ismail.
12 Ugaid'a nia pidtalu sa lekanin nu Kadenan a Mapulu na “Di ka 'bpelidua i ginawa nengka makapantag kanu wata enggu su panunugun nengka. Paginuguti ka su langun nu kadtalu sa leka ni Sara kagina san makanggulalan kani Iskak su manga tupu a inibpasad ku sa leka. 13 Apia ka maitu na pagkadakelen ku bun su manga tupu nu wata nengka kanu panunugunc nengka ka enggu silan mabaluy a bangsa kagina wata nengka bun sekanin.”
14 Daka mibpanay gemedam su Ibrahim ka kinemua sa pegken enggu 'bpanaguan sa igd entu pan ka inenggay nin kani Hagiar ka inipasalay nin lun ka inisigkil'in silan. Na ginemanat den mambu si Hagiar ka mindadalaug den silan lu kanu tawan-tawan a dalepa sa Birsiba.e 15 Na guna maibped su ig a lutu nilan na initagak'i Hagiar su wata lu kanu atag'u manaut a kayu. 16 Daka tinangkan nin su wata sa manga magatus kamitru enggu nagagayan sekanin sa nia 'gkadtalu na ginawa nin na “Di ku magaga edtulik a matay su wata ku.” Na gagalu nu kabpagayan nin na minuliang sekanin sa matanug.
17 Saleta mambu na nakineg bun nu Kadenan su uliang'u wata, daka midtalu su malaikat'u Kadenan a ebpun sa sulega sa “Ngin i nan ka 'gkalidu i ginawa nengka, Hagiar? Da ka 'gkagilek ka nakineg'u Kadenan su uliang'u wata lu kanu nambetadan nin. 18 Na edtindeg ka, ka angayi ka sekanin. Kapeti ka su lima nin ka padtindeg ka kagina umbalen ku sekanin a mabagel a bangsa.” 19 Na inipailay nu Kadenan kani Hagiar su kalut daka minubay sekanin lu ba ka dinikenan nin sa ig su 'bpanaguan nin ka pinainem'in su wata. 20-21 Na tinapid'u Kadenan su Ismail taman sa lu sekanin migkasela kanu tawan-tawan a dalepa sa Paran enggu nabaluy sekanin a talinganup. Na gagalu nu kinagkakaleben nilan lu ba na pinapangaluma sekanin nu ina nin sa babay a taw a Egypt.
Minumbal sa Kapasadan su Ibrahim enggu si Abimilik
22 Na kanu entu bun ba a timpu na pinaunut'i Abimilik si Pikul a mapulu nu manga sundalu nin ka inimbitiala nin su Ibrahim sa nia nin pidtalu na “Katawan ku i pebpalihalan ka nu Kadenan a Mapulu kanu langun na penggalebeken nengka. 23 Kagina ka maitu na idsapa nengka sa laki kanu ingala nu Kadenan a Mapulu i di aku nengka pagakalan taman den kanu manga wata ku enggu kanu manga tupu ku. Na ipailay nengka sa laki taman kanu dalepa a nia a nalapuan nengka su katidtu na pamusungan a mana bun su inipailay ku sa leka.”
24 Daka na nia inisumpat'u Ibrahim na “Uway, ipebpasad ku su entu.” 25 Ugaid'a inibpanun nin kani Abimilik su pantag kanu kalut a pinggumaked'u manga panunugun nin. 26 Na nia mambu pidtalu ni Abimilik na “Di ku katawan u entain i minggula sa entu. Da nengka makatutuag sa laki su pantag sa entu, saguna pan ba a nia i kinakineg ku lun.” 27 Daka kinemua su Ibrahim sa bili-bili enggu sapi ka inenggay nin kani Abimilik entu pan ka minumbal silan dua sa kapasadan. 28 Na sinemenggay su Ibrahim sa pitu timan a babay a bili-bili ebpun kanu pangangayamen nin. 29 Na nakaidsa ni Abimilik sa lekanin i “Nginan ka sinemenggay ka sa pitu timan a babay a bili-bili?”
30 Na nia inisawal'u Ibrahim na “Talima ka su pitu timan a nia a babay a bili-bili ka namba i amadan sa minayun ka sa saki i kinemalut kanu kalut.” 31 Na tembu nabedtuan su kalut a entu sa dalepa a Birsiba kagina lu ba midsapai su Ibrahim enggu si Abimilik.
32 Guna mapasad su kinadsapai nilan na mimbalingan den si Abimilik enggu si Pikul a mapulu nu manga sundalu lu kanu pendalepan nu manga taw a Pilistin. 33 Na su Ibrahim menem na namula sa kayu a bedtuan sa tamaris kanu entu a dalepa sa Birsiba enggu sinemimba sekanin sia kanu ingala nu Kadenan a Mapulu a su Kadenan a Dala Kapedtaman. 34 Na malu nauget bun i kinagkakaleben nu Ibrahim lu kanu kalupan nu manga taw a Pilistin.