Su Kinalu nu Ibrahim enggu Sara sa Dalepa a Girar
20
Na iganat sa Mamri na minalat su Ibrahim 'bpawang sa dalepa a Nigib taman sa lu sekanin mindilapu kanu pageletan nu dalepa a Kadis enggu Sur. Na gagalu nu kinagkakaleben nilan lu sa dalepa a Girar, 2 na nia nin inipakilala na edsuled silan kanu kaluma nin a su Sara. Na sabap sa entu ba na inipalapit'i Abimilik a datu nu dalepa a Girar su Sara. 3 Ugaid'a napadtaginep su Kadenan kani Abimilik sa kutika na magabi sa nia nin pidtalu na “Pakikineg ka! Matay ka den kagina su babay a kinua nengka na kaluman.”4 Ugaid'a kagina ka dala pan madulug'i Abimilik su Sara na nia nin pidtalu na “Hu Mapulu imatayan nengka ba i taw a dala kadupangan nin? 5 Dikena ba nia lun inipakilala sa laki ni Ibrahim na edsuled silan? Na apia si Sara na midtalu bun sa edsuled silan. Na su kinanggula ku sa entu na ikelas kanu pamusungan ku enggu su lima ku na dala kabudsengi.”
6 Daka nia pidtalu nu Kadenan kani Abimilik kanu taginepen nin na “Katawan ku i saben-sabenal a ikelas i entu kanu pamusungan nengka, tembu da ku suguti a madulug'engka sekanin ka enggu di ka makambaladusa sa laki. 7 Kagina ka maitu na imbalingan nengka su babay lu kanu kaluma nin. Na sabap sa nabia su mama a entu na ipangeni-ngeni ka nin ka enggu di ka matay. Ugaid'a u di nengka sekanin imbalingan na natatalanged a matay ka taman den kanu 'bpamegkaleben kanu lusud'u walay nengka.”
8 Daka mibpanay gemedam si Abimilik ka inipatawag'in su 'gkangasaligan nin. Na guna nin mapanudtul kanilan su langun nu entu na sangat a nangagilekan silan. 9 Guna su maitu na inipatawag'i Abimilik su Ibrahim ka inidsan nin sa “Ngintu ka pinggula nengka i nia sa lekami? Aden ba kadupangan ku sa leka ka pinambaladusa aku nengka taman den kanu 'gkasakupan ku? Su pinggula nengka sa laki na di 'gkaalus a enggulan nu apia entain.” 10 Na pidtalu pamun ni Abimilik sa lekanin i “Ngin i natagu sa ginawa nengka ka pinggula nengka i entu?”
11 Daka nia inisawal'u Ibrahim na “Kagina natagu sa ginawa ku i su manga taw a pegkaleben sia na dala gilek'in kanu Kadenan tembu nagilekan aku sa imatayan aku nilan ka enggu nilan makua su kaluma ku. 12 Ugaid'a nia nin kabantang na edsuled kami ka isa bu i ama nami ugaid'a embidaya bu i ina nami tembu nakadtampung kami. 13 Na iganat den kanu kinapaganat sa laki nu Kadenan ebpun kanu manga tupu nu ama ku na nia ku pidtalu kanu kaluma ku na ‘Nia nengka makadtabang sa laki na apia endaw ta makabpawang na nia ka edtalu na edsuled ta.’ ”
14 Guna su maitu na inimbalingan ni Abimilik kanu Ibrahim su Sara taman sa inenggan nin pan sa manga bili-bili, manga kambing enggu manga sapi apeg den na manga panunugun a mama enggu babay. 15 Na pidtalu ni Abimilik sa lekanin na “Sandeng ka su langun na kalupan ku ka apia endaw san i 'gkalinian nengka pegkaleben na 'gkalebeni ka.” 16 Na nia nin menem pidtalu kanu Sara na “Pakikineg ka! 'Bpagenggan ku su suled'engka sa sangibu timan a pilakb a amadan nu saben-sabenal a dala ka kabudsengi. Sa maya ba a ukit na di mapagitung'u apia entain i minggula ka sa malat.”
17 Daka nangeni-ngeni su Ibrahim kanu Kadenan, na pinagkapia nu Kadenan si Abimilik enggu su kaluma nin taman den kanu manga panunugun nin a babay asal'a mamakambata silan. 18 Kagina pigkahanda nu Kadenan a Mapulu i di embabata su langun nu babay a lu kanu tulugan ni Abimilik sabap kanu kinapalapit'in kanu Sara a kaluma nu Ibrahim.