Naamad su Kabaladusan nu Dalepa a Sudum enggu Gumura
19
Na kanu entu bun ba a magabi na nakauma su dua kataw a malaikat'u Kadenan sa dalepa a Sudum gagalu nu kabpamagagayan ni Lut kanu bengawan nu entu a dalepa. Na endaw i kinailay ni Lut sa kanilan na midtindeg sekanin mamagayas ka inalaw nin silan. Daka sinemugiud sekanin kanu lupa 2 sa nia nin pidtalu na “Hu manga mapulu! 'Bpangenin ku sa lekanu i aut kanu pan kanu walay nu ulipen nu ka enggu kanu makapangagas sa ay ka lu kanu demun pan pangintelenen sa saguna a magabi, ka 'bpanay kanu bu gemanat namag.”Ugaid'a nia nilan inisawal na “Di den! Ka sia kami den mapagkapita kanu dayag'u dalepa a nia.”
3 Ugaid'a sabap sa pinamagayukan silan ni Lut na minunut bun silan lu kanu walay nin. Daka napailutu sekanin sa pan a da pakembang'in enggu pinatalagadan nin silan sa mangapia a pegken ka kineman silan. 4 Na gagalu nu da pan silan mamakatulug na linibet'u langun nu mama sa dalepa a Sudum magidsan i manguda enggu mangutua su walay ni Lut. 5 Nia nilan ibpelalis sa matanug kani Lut na “Endaw den su manga mama a tinemumpa kanu walay nengka? Paliu ka silan sia ka enggu nami silan magkakaluma!”
6 Daka liniuwan silan ni Lut ka ipembitiala nin silan ugaid'a pinintuan nin bun mamagayas su bengawan endaw i kinaliu nin. 7 Na nia nin pidtalu sa kanilan na “Manga lusud ku sa tian! 'Bpangenin ku sa lekanu i di nu penggula su nan a kadaluakan. 8 Pakikineg aku nu pan sa mapia! Aden dua kataw a wata ku a babay a da pamun makapagukiten sa pidtalu a kapembalagiuma! Na silan i inggay ku sa lekanu ka sekanu den i mataw u ngin i pegkiugan nu a pakaidan kanilan. Ugaid'a di nu bu pegkudia su manga ana ku kagina sia silan tinemumpa kanu walay ku tembu dait a dalindingan ku silan.”
9 Ugaid'a nia nilan pidtalu na “Lapu bu sekanin sia! Dala kawagib'in sa pamanduan tanu nin sa dait a enggulan tanu.” Daka nia nilan pidtalu kani Lut na “Awa ka san! Ka lawan pan i pakaidan nami sa leka kumin sa pakaidan nami kanilan.” Daka ibpanumag'ilan si Lut ka pegkiugan nilan penggeba su pintu. 10 Ugaid'a kineteng sekanin mapaludep'u manga ana kanu walay entu pan ka pinintuan nilan mamagayas su bengawan 11 ka binulag'ilan gagalu su langun na taw a lu kanu liu nu walay magidsan i manganguda enggu mangatua tembu di nilan 'gkatun su bengawan.
12 Daka nia pidtalu nu dua kataw a ana kani Lut na “U aden manga pagali nengka sia, manga wata enggu manga mamanugang sa leka a sia ba pegkaleben na paunut ka silan ka ganati nu den su dalepa a nia 13 ka pembinasan nami den. Kagina su ipembuku pantag kanu nia a dalepa na midsubela den tembu sinugu kami nu Kadenan a Mapulu ka enggu nami 'gkabinasa.” 14 Guna su maitu na inangayan ni Lut su 'bpamangaluma kanu manga wata nin a babay ka nia nin pidtalu kanilan na “Pamagayas kanu ka awan tanu su dalepa a nia kagina pembinasan den nu Kadenan a Mapulu.” Ugaid'a nia nilan lun kataw na pendadamangias bu sekanin.
Su Kinaganat'i Lut enggu su Binabatan nin sa Sudum
15 Daka guna su pegkalinawag den na pinapamagayas'u manga malaikat si Lut sa nia nilan pidtalu na “Pamagayas ka! Edtapik ka su kaluma nengka enggu su dua kataw a wata nengka a babay ka ganat kanu den ka enggu di kanu makaamung kanu kabinasa nu nia ba a dalepa.” 16 Ugaid'a guna su pedtatalipenda bun si Lut na sinegedan nu manga malaikat su lima nin apeg'u lima nu kaluma nin enggu su dua kataw a wata nin a babay ka tinundan nilan silan mapaliu kanu entu a siudad sabap sa nalat i nanam'u Kadenan a Mapulu kanilan. 17 Na endaw i kinaliu nilan na nia pidtalu nu isa kanu malaikat na “Palalaguy kanu den ka ilipuas'u den i ginawa nu! Da kanu pendedelengi enggu da kanu a benal 'bpalen lu kanu kadatalan. Pagapas kanu malalaguy lu kanu manga bakuludan ka enggu di kanu matay.”
18 Ugaid'a nia inisawal'i Lut na “Hu mapulu, mawatan a benal su entu! 19 Saben-sabenal'a masela gaid i nakadtabang'u enggu kapianan nu sa laki ka inilipuas'u su umul ku. Ugaid'a tabia bun ka di aku pan makauma kanu entu a bakuludan na masaut aku den nu kapegkabinasa a entu taman sa matay aku. 20 Ilay nu su manaut a entu a dalepa! Dikena ba masupeg bu a pedtalaguyan? Manaut bu su entu. Na suguti kami nu a lu ba makaapas ka enggu kami di matay.”
21 Na nia inisawal'u isa sa kanilan na “Kapakayan a benal. Pedsugutan ku su entu a 'bpangenin nengka. Di ku ilalagit minasa su manaut a entu a dalepa. 22 Na tembu pamagayas kanu malalaguy lu ba kagina taman a di kanu makauma lu ba na di nami pan mabinasa su dalepa a entu.” Na entu ba i sabap'in ka nabedtuan su dalepa a entu sa Suar.a
Su Kinabinasa sa Dalepa a Sudum enggu Gumura
23 Na kanu kinauma ni Lut lu sa Suar na nakasebang den su senang. 24 Daka pinaulanan nu Kadenan a Mapulu su dalepa a Sudum enggu Gumura sa pedsindaw a apuy enggu sandawa a ebpun sa sulega. 25 Na maitu ba i ukit a kinabinasa nu Kadenan a Mapulu kanu entu a manga siudad enggu su 'bpamegkaleben lun apeg den nu langun nu kadatalan enggu su 'bpamangetu kanu lupa. 26 Ugaid'a su kaluma ni Lut a sia kanu taligkudan nin na linemengi tembu nabaluy sekanin a timus a mana pinatindeg a palaus.
27 Daka mibpanay lemu su Ibrahim kanu dalepa a pidtindegan nilan kanu Kadenan a Mapulu, 28 ka sinandeng'in lu ba su dalepa a Sudum enggu Gumura taman den kanu langun nu kadatalan. Na nia nin nasandeng na su lawan i kakapal'in a bel a ebpun kanu entu a dalepa a mana bel a sia pakabpun kanu 'gkangatutung a walay. 29 Na maitu ba i ukit a kinabinasa nu Kadenan kanu manga siudad'u entu a kadatalan. Ugaid'a da lipatani nu Kadenan su Ibrahim tembu pinalipuas'in si Lut kanu kinabinasa kanu entu a dalepa a pigkalebenan nin.
Su Nabpunan nu manga Taw a Muab enggu su Taw a Amun
30 Guna mapasad i entu na ginanatan ni Lut apeg'u dua kataw a wata nin a babay su dalepa a Suar ka tinemakedeg silan lu kanu kapalawan ka lu ba silan migkaleben kanu takub'u entu kagina 'gkagilekan sekanin pegkaleben kanu dalepa a Suar.
31 Daka aden isa a timpu a inimbitiala nu kaka a wata su ali nin sa nia nin pidtalu na “Ilay ka ba! Pegkatua den su ama ta enggu da den mama sia sa dunia a makapangaluma sa lekita asal'a kaadenan ta na muliataw. 32 Na nia mapia na languten ta su ama ta ka dulugen ta ka enggu 'gkauyag su tupu tanu sia makanggulalan sa lekanin.”
33 Na pinggula nilan den mambu su entu ka linangut'ilan den su ama nilan kanu entu bun ba a magabi entu pan ka dinulug sekanin nu kaka a wata nin. Ugaid'a da a benal sabut'i Lut kanu entu a nanggula kagina nalangut a benal sekanin. 34 Daka nia nin kinagkapita na nia pidtalu nu kaka kanu ali nin na “Pakikineg ka sa mapia! Nakadulug aku den kani ama kagina magabi, na languten ta sekanin 'bpaluman amay magabi ka seka menem i dulug lun ka enggu ta 'gkauyag su tupu tanu sia makanggulalan kani ama.” 35 Na pinggula nilan den mambu su entu ka endaw i kinagkagabi na linangut'ilan 'bpaluman su ama nilan. Daka nia menem dinemulug sa lekanin na su ali a wata nin. Na mana bun su nauna a dala a benal sabut'in kanu entu a nanggula kagina nalangut a benal sekanin. 36 Na maitu ba i ukit a kinagkagingay nu edsuled a entu sia nakanggulalan kanu ama nilan a si Lut.
37 Guna pembata su kaka a wata sa wata a mama na nia nin inibedtu lun na Muab.b Na sekanin i nabpunan nu manga taw a pembudtuan sa Muab sa saguna a timpu. 38 Na mimbata bun mambu su ali a wata sa wata a mama a nia nin inibedtu lun na Ben-Ami.c Sekanin menem i nabpunan nu manga taw a pembedtuan sa Amun sa saguna a timpu.