Su Telu Kataw a Balapantag a Ana nu Ibrahim
18
Na mibpapayag su Kadenan a Mapulu kanu Ibrahim lu kanu mangasela a kayu nu Mamri gagalu nu kabpamagagayan nin lu kanu bengawan nu pegkakalebenan nin sa kutika na maudtu. 2 Na kanu kabpanandeng'in na nakatekaw demun sekanin nakailay sa telu kataw a manga mama a pedtindeg lu kanu unan nin. Daka pinalalaguy nin silan malaw enggu sinemugiud sekanin kanu lupa. 3 Na nia pidtalu nu Ibrahim na “Hu mapulu! 'Bpangenin ku sa lekanu sa senep sa atay i aut kanu pan kanu pegkakalebenan nu ulipen nu. 4 Na 'bpapangintelenen kanu demun muna san kanu atag'u kayu ka suguti aku nu sa kapananggitan ku sekanu sa apia paidu bu a ig a makapangagas'u kanu manga aya nu. 5 Na gagalu na sia kanu kanu pegkakalebenan ku na suguti aku nu bun a kapananggitan ku sekanu sa apia paidu bu a pan ka enggu makambalingan su bagel'u entu pan ka talus kanu lu kanu pebpawangan nu.”Daka nia nilan inisawal na “Uway, na enggula ka den su pidtalu nengka a nan.”
6 Daka namagayas embalingan su Ibrahim lu kanu pegkakalebenan nin ka nia nin pidtalu kanu Sara na “Pamagayas ka! Kua ka sa telu kaasadanb kanu mapia sa langun a tapung ka adum ka enggu umbal ka sa pan.” 7 Na entu pan ka namagayas sekanin lemu kanu manga pangangayamen nin ka namili sekanin sa sapi a manguda enggu masebud ka inenggay nin kanu panunugun nin ka pinabpulengan nin lun mamagayas ka enggu nin 'gkailutu. 8 Daka kinemua su Ibrahim sa pinagkadsem a gatasc enggu da padtegasa a gatas ka endaw i kinalutu nu sapi na initalagad'in kanilan. Na gagalu nu kapegkan nu manga ana nin na lu demun sekanin kanu ubay nilan a pedtindegd lu kanu atag'u kayu.
9 Daka inidsan nilan su Ibrahim sa “Endaw si Sara a kaluma nengka?” Nia nin nakasawal na “Lu sekanin kanu ludep'u pegkakalebenan nami.” 10 Na nia pidtalu nu isa kanu manga ana na “Natatalanged i kanu kambalingan ku sia sa maya bun ba a gay kanu mauma a lagun na aden den wata a mama ni Sara a kaluma nengka.”
Saleta mambu na 'bpamakikineg su Sara lu kanu pintuan a lu tampal sa taligkudan nu Ibrahim. 11 Na kanu entu ba a manga timpu na mangatua den a benal silan dua ka su Sara na di den 'gkauma na gay nin a mana su kadsalilidan kanu manga babay. 12 Tembu nakadtatawa i ginawa nu Sara sa nia natagu kanu ginawa nin na “Panun pan i kambata nami sa matua kami den a benal kanu kaluma ku?” 13 Daka inidsan nu Kadenan a Mapulu su Ibrahim sa “Enduken ka midtatawa si Sara enggu pakaidsa nin i panun kun i kambata nin a matua den a benal sekanin? 14 Aden ba di magaga nu Kadenan a Mapulu? Mana bun su pidtalu ku i kanu kambalingan ku sia sa maya bun ba a gay sa mauma a lagun, na aden den wata a mama ni Sara.”
15 Na sabap sa gilek'u Sara na mibpalaw sekanin sa nia nin pidtalu na “Da aku edtatawa.” Ugaid'a nia nin pidtalu kanu Sara na “Saben-sabenal a midtatawa ka!”
Inipamagayuk'u Ibrahim kanu Kadenan su manga Taw sa Sudum
16 Daka ginemanat den su telu kataw a entu a ana a inisigkil silan nu Ibrahim. Na guna silan makauma kanu kapuluan na nasandeng'ilan su dalepa a Sudum. 17 Na nia natagu sa ginawa nu Kadenan a Mapulu na “Di dait a ipagema ku kani Ibrahim su 'gkagkahanda ku. 18 Kagina su manga tupu nin na sangat a 'gkadakel taman sa mabaluy a mabagel a bangsa. Na langun na bangsa sia sa liwawaw na dunia na kapalihalan sia makanggulalan sa lekanin 19 kagina pinamili ku sekanin asal'a makapamandu nin kanu manga wata nin taman den kanu manga temundug pan a manga muliataw nin su kapaginugut kanu kasuguan ku sa ukit a kanggalebek'ilan sa kaikelasan enggu katidtu ka enggu ku matuman su manga pasad ku sa lekanin.”
20 Sabap sa entu na nia pidtalu nu Kadenan a Mapulu kanu Ibrahim na “Su kapembuku a nakineg ku pantag sa dalepa a Sudum enggu Gumura na sangat den a pakatiawan-tiawan enggu su kabaladusan nilan na midsusubela den. 21 Na lemu aku ka enggu ku 'gkaamad u ngintu benal ba su langun nu ipembuku a entu sa laki atawa ka dikena.”
22 Na guna su maitu na ginemanat su dua kataw kanu manga ana ka tinemalus silan lu sa dalepa a Sudum. Saleta mambu na lu su Ibrahim pedtindeg kanu adapan nu Kadenan a Mapulu. 23 Daka inubay sekanin nu Ibrahim ka inidsan nin sa “Ngintu, ilalagit'engka den mimatay su manga ikelas kanu manga baladusa a entu? 24 Panun u aden limapulu kataw a ikelas lu kanu entu a dalepa, na ngintu pangimatayane nengka bun silan? Ngintu, di nengka silan kadsabalan sabap kanu limapulu kataw a entu a ikelas kanu entu a dalepa? 25 Katawan ku i di nengka pandaligatan mimatay su ikelas enggu su baladusa ka enggu di silan makabpagidsan. Katawan ku i di nengka i entu enggulan kagina su 'bpangukum kanu dunia na matidtu i kukuman nin!”
26 Na sabap sa entu na nia pidtalu nu Kadenan a Mapulu na “U matalanged ku i aden limapulu kataw a ikelas kanu entu a dalepa na lasamen ku sabap kanilan.”
27 Daka midtalu 'bpaluman su Ibrahim sa “Hu Kadenan a Mapulu, na ampun aku bu! Apia maitu sa puput aku bu nu dunia na suguti aku nengka a makadtalu 'bpaluman. 28 Ugaid'a panun u patpulu enggu lima kataw bu i ikelas a taw kanu entu a dalepa na ngintu binasan nengka bun sabap kanu kulang a lima kataw?” Na nia nin inisawal kanu Ibrahim na “U aden patpulu enggu lima a ikelas kanu entu a dalepa na di ku binasan.”
29 Na midtalu 'bpaluman su Ibrahim sa “Panun u patpulu kataw bu i aden lu?” Nia nin inisawal na “Sabap kanu patpulu kataw a entu na di ku binasan.”
30 Daka midtalu menem su Ibrahim sa “Hu Kadenan a Mapulu, na da ka bu 'gkalipunget ugaid'a suguti aku sa makadtalu 'bpaluman. Panun menem u telupulu bu i ikelas kanu entu a dalepa?” Nia nin inisawal sa lekanin na “Sabap kanu telupulu kataw a entu na di ku binasan.”
31 Na pidtalu pamun nu Ibrahim i “Hu Kadenan a Mapulu, na kagina ka nakabulug den gaid su kinadtalu-talu ku na panun menem u duapulu bu i aden lu ba?” Nia nin inisawal na “Sabap kanu duapulu kataw a entu na di ku binasan.”
32 Nia den mauli a pidtalu nu Ibrahim na “Hu Kadenan a Mapulu, na da ka bu 'gkalipunget ka nia den ba i mauli a idsa ku! Upama ka sapulu kataw bu i ikelas lu ba?” Na nia nin inisawal kanu Ibrahim na “Sabap kanu sapulu kataw a entu na di ku binasan.”
33 Na endaw i kinapasad edtalu nu Kadenan a Mapulu kanu Ibrahim na ginemanat den sekanin. Daka mimbalingan den mambu su Ibrahim lu kanu pegkakalebenan nin.