Su Kapebpaletak a Tanda nu Kapasadan
17
Kanu timpu a nakasiyawpulu enggu siyaw lagun su umul'i Abram na pibpayagan sekanin nu Kadenan a Mapulu sa nia nin lun pidtalu na “Saki su Kadenan a Barakat sa Langun. Paguyag-uyag ka sa aden gilek'in sa laki enggu matidtu 2 ka enggu ku makanggulalan su kapasadan ku sa leka. Na pagkadakelen ku a benal su manga tupu nengka.” 3 Daka sinemugiud si Abram lu kanu lupa enggu pidtalu pan sa lekanin nu Kadenan i 4 “Pakikineg ka! Kagina ka san den sa leka su kapasadan ku na umbalen ku seka a ama nu madakel a bangsa. 5 Iganat saguna na dikena den Abram i itawag sa leka ka nia den itawag sa leka na Ibrahima den kagina pembaluyn ku seka a ama nu madakel a bangsa. 6 Na pagkadakelen ku a benal su manga tupu nengka taman sa mabaluy silan a madakel a bangsa enggu su ped menem kanilan na mabaluy a manga datu. 7 Na inggulalan ku su dala kapedtaman nin a kapasadan ku sa leka enggu kanu manga tupu nengka taman den kanu manga temundeg pan a manga tupu nilan. Na saki su Kadenan nengka enggu mabaluy a Kadenan nu manga temundug pan a manga tupu nengka. 8 Na inggay ku sa leka taman kanu manga tupu nengka su kalupan a pegkakalebenan nengka a su kalupan nu Kanaan ka enggu nu mabpusaka taman sa taman. Na saki i mabaluy a Kadenan nilan.”9 Daka nia pan pidtalu nu Kadenan kanu Ibrahim na “Seka menem na dait a inggulalan nengka su kapasadan ku taman kanu manga tupu nengka enggu su manga temundug pan a manga tupu nilan. 10 Na nia ba su kapasadan ku sa lekanu a dait a inggulalan nengka taman den kanu manga temundug pan a manga tupu nengka. Langun nu a manga mama na dait a mapaletak.b 11 Na dait a enggulalan nu su su kapebpaletak ka entu ba i tanda nu kapasadan ku sa leka. 12-13 Na su langun nu wata a nakawalu gay den i umul'in na dait a paletaken, maitu bun ba su manga temundug pan a manga tupu nengka magidsan pan su manga ulipen a lu den pimbabata kanu pendadalepan nengka atawa ka su pinamamasa nengka kanu manga lapu. Dait a paletaken silan langun kagina entu ba i maumbal a tanda nu dala kapedtaman nin a kapasadan ku sa leka. 14 Na apia entain a mama i di mapapaletak na dait a iawa kanu lumpukan nu manga tupu nin kagina sinungkang'in su kapasadan ku sa leka.”
15 Na nia pan pidtalu sa lekanin nu Kadenan na “Makapantag menem kanu kaluma nengka na di ka den sekanin pedtawaga sa Saraic kagina nia nin den ngala saguna na Sara.c 16 Palihalan ku sekanin enggu liu pan sa entu na enggan ku seka sa wata a mama a san makanggulalan sa lekanin. Palihalan ku sekanin ka enggu sekanin mabaluy a ina nu madakel a bangsa enggu san makabpun kanu manga tupu nin i mamendatu kanu manga taw.” 17 Daka sinemugiud menem su Ibrahim ugaid'a nakadtatawa i ginawa nin kagina nia natagu sa ginawa nin na “Makapambata pan ba i mama a nakamagatus lagun den i umul'in? Makambata pan ba si Sara a nakasiyawpulu lagun den i umul'in?” 18 Na sabap sa entu na pidtalu nu Ibrahim kanu Kadenan i “U mapakay bu na si Ismail den i makatalima kanu manga palihala nengka.” 19 Ugaid'a nia pidtalu nu Kadenan a na “Di mapakay kagina tulunan ku seka sa wata a mama san makanggulalan kanu kaluma nengka a si Sara. Nia nengka ibedtu sa lekanin na Iskak.d San ku tumanen sa lekanin enggu kanu manga temundug pan a manga tupu nin su dala taman nin a kapasadan ku. 20 Nakineg ku su pinangeni nengka makapantag kani Ismail. Na pakikineg ka! Palihalan ku enggu pambuad-buaden ku si Ismail taman sa pagkadakelen ku a benal su manga tupu nin. Na mabaluy sekanin a ama nu sapulu enggu dua a manga datu enggu umbalen ku sekanin a badtug a bangsa. 21 Ugaid'a san ku tumanen su kapasadan ku kani Iskak a embatan ni Sara sa maya bun ba a gay kanu temundug a lagun.”
22 Na endaw i kinapasad edtalu nu Kadenan na ginanatan nin den su Ibrahim. 23 Daka pinggula den nu Ibrahim su inisugu nu Kadenan sa lekanin, ka kanu entu demun ba a gay na pinaletak'in su wata nin a si Ismail enggu su manga mama a pegkakaleben sa lekanin magidsan i ulipen a lu den pimbabata kanu pegkakalebenan nin atawa ka pinamasa nin. 24 Na kanu timpu a kinapaletak kanu Ibrahim na nakasiyawpulu enggu siyaw lagun i umul'in 25 enggu su wata nin menem a su Ismail na nakasapulu enggu telu lagun i umul'in. 26 Na kanu entu demun ba a gay na su Ibrahim enggu su wata nin a su Ismail 27 taman den kanu manga mama a pegkakaleben sa lekanin magidsan i ulipen a lu den ba pimbabata atawa ka pinamamasa bu, na nakadsasalengan i kinapaletak kanilan.