Su Kinambata kanu Ismail
16
Na si Sarai a kaluma ni Abram na di pembata. Ugaid'a aden panunugun nin a babay a bedtuan sa Hagiar a taw sa Egypt. 2 Daka nia nin pidtalu kani Abram na “Pakikineg aku pan sa mapia! Kagina ka da aku tuluni nu Kadenan a Mapulu sa wata na mapakay a nia nengka dulugen na su panunugun ku, ka aden a entu na makambata sekanin sa mambabata ku.” Na pinaginugutan mambu ni Abram su pidtalu sa lekanin ni Sarai. 3 Tembu inisugut den ni Sarai a magkaluma ni Abram su panunugun nin a si Hagiar a taw sa Egypt. Nanggula su entu ulian nu ikasapulu lagun a kinagkakaleben nilan sa dalepa a Kanaan.4 Na dinulug den mambu ni Abram si Hagiar taman sa migkalaling sekanin. Na guna katawi ni Hagiar i migkagingay sekanin na pinakabulugan nin su 'bpanalagadan nin a si Sarai. 5 Sabap sa entu na nia pidtalu ni Sarai kani Abram na “Seka i dait a pedtempuan sa kapapegkabulug sa laki nu panunugun ku! Inenggay ku sekanin sa leka ugaid'a guna nin katawi i migkagingay sekanin na papegkabulugan aku nin den. Na su Kadenan a Mapulu i kemukum sa lekita dua.”
6 Daka nia inisawal'i Abram sa lekanin na “Nia nin kabantang na panunugun nengka sekanin, na seka bun i pegkakataw sa lekanin. Na u ngin i kalangan nengka a mapia a pakaidan nengka sa lekanin na entu ba i enggula ka.” Na iganat sa entu ba na sangat den a pinakapasangan ni Sarai si Hagiar tembu minawa sekanin.
7 Guna su maitu na pibpayagan nu malaikat'u Kadenan a Mapulu si Hagiar kanu ubay nu bualan kanu tawan-tawan a dalepa. Su bualan a entu na masupeg kanu lalan a ipedsangul sa Sur. 8 Nia nin pidtalu sa lekanin na “Hagiar a panunugun ni Sarai! Endaw ka a nan ebpun enggu endaw ka a nan 'bpagangay?” Na nia inisawal'i Hagiar na “Inawan ku su 'bpanalagaden ku a si Sarai.” 9 Daka nia pidtalu sa lekanin nu malaikat'u Kadenan a Mapulu na “Embalingan ka enggu pangalimbaba ka sa lekanin.” 10 Na pidtalu nin lun pan i “Pagkadakelen ku su manga tupu nengka a su kadakel'in na di magaga milang.”
11 Pidtalu bun nu malaikat'u Kadenan sa lekanin i
“Pakikineg ka! Su ipegkagingay nengka a nan
na wata a mama.
Nia nengka ibedtu lun
na Ismaila
kagina pinakikineg'u Kadenan a Mapulu
su langun na 'gkambukuan nu ginawa nengka.
12 Ugaid'a su wata nengka a nan
na mana su talaw a binatang i kalagidan nin
ka 'gkuntelan nin su apia entain
enggu 'gkuntelan bun mambu sekanin nu madakel.
Na samuken nin sa kagkakaleben su manga pagali nin.”
13 Daka nia natagu sa ginawa ni Hagiar na “Saben-sabenal a nailay ku su Kadenan a Pakailay sa laki?” Na sabap sa entu na pinggungalanan nin su Kadenan a mimbitiala sa lekanin sa “Seka su Kadenan a Pakailayb sa laki.” 14 Na tembu nabedtuan su kalut a entu sa “Su Kalut'u Tidtu a Kadenan a Pakailay sa laki.”c Na su nabetadan nu nia ba a kalut na lu kanu pageletan nu dalepa a Kadis enggu Birid.