Nangaden su Kadenan sa Kapasadan kani Abram
15
Guna maipus i langun na entu na nakatingguma su kadtalu nu Kadenan a Mapulu kani Abram sa ukit a taginepen sa nia nin katigan na “Da ka 'gkagilek Abram ka saki i kelung'engka taman sa enggan ku seka sa masela a balas!”2 Ugaid'a nia inisawal'i Abram na “Hu Kadenan a Mapulu, ngin pan i kapantag'u ibpagenggay nengka sa laki ka da bun wata ku? Nia bu makabpusaka kanu manga tamuk ku na si Ilisira a taw sa Damaskus.” 3 Na nia pan pidtalu ni Abram na “Hu Kadenan, na ilay ka! Da aku nengka enggi sa muliataw tembu isa kanu panunugun ku bu i kabpusakan ku.”
4 Ugaid'a nia pidtalu sa lekanin nu Kadenan a Mapulu na “Dikena su panunugun nengka a nan i kabpusakan nengka ka leka demun a wata i kabpusakan nengka.” 5 Daka pinaliu sekanin nu Kadenan a Mapulu enggu nia nin pidtalu na “Tingada ka kanu kawang-kawangan enggu bilang ka su manga bitun u magaga nengka, ka su kadakel'u manga tupu nengka na mana su kadakel'u manga bitun.” 6 Na sinemalig si Abram kanu Kadenan a Mapulu. Na sabap sa entu na initimbang sekanin nu Kadenan a Mapulu sa ikelas. 7 Daka pidtalu sa lekanin nu Kadenan i “Saki su Kadenan a Mapulu a napaawa sa leka ebpun sa Ur lu kanu dalepa nu manga taw a Kaldia ka enggu ku makaenggay sa leka su nia ba a kalupan a mabpusaka nengka.”
8 Ugaid'a nia inisawal'i Abram na “Hu Kadenan a Mapulu, panun i kataw ku lun sa mabpusaka ku i nia?”
9 Nia pidtalu sa lekanin nu Kadenan a Mapulu na “Pananggiti aku sa sawalu a sapi, sawalu a kambing enggu sawalu a bili-bili a manga telu lagun i umul'in. Pananggit ka bun sa satiman a malapati enggu satiman tegul.” 10 Daka pinananggit den mambu ni Abram su langun nu entu enggu pinangupak'in sa luk nia nin bu da pangumapaka na su manga papanuk. Na entu pan ka pinapagabay nin i kinabetad'in lun. 11 Na pembugawn ni Abram su manga masela a papanuk a pendudsuk kanu entu.
12 Na guna su pedsedep den su senang na nakasalidep si Abram na midtaginep sekanin sa sangat a pakagilek-gilek. 13 Na nia pidtalu sa lekanin nu Kadenan a Mapulu na “Natatalanged i su manga tupu nengka na 'gkaleben silan kanu dalepa a dikena kanilan. Mapangungulipen silan lu ba enggu pakabulugan sa dalem'u pat gatus lagun. 14 Ugaid'a kukumen ku su bangsa a mangungulipen sa kanilan enggu mauli sa entu na mamakadtapik silan sa kakawasan kanu kaawa nilan lu ba. 15 Seka menem na pagkalendun ku i umul'engka taman sa mapia i kapatay nengka. 16 Na sekali pan makambalingan sia ba su manga tupu nengka na maipus su ikapat a tupu amaika mauma den su tedtab'u kapembaladusa nu manga taw a Amur.”
17 Na endaw i kinasedep'u senang taman sa migkalibuteng den na nakatekaw demun nakambuat su pedtagebel a kuden enggu su pedsindaw a sulu a minukit kanu pageletan nu pinanebi a manga binatang. 18 Daka kanu entu demun ba a kutika na minumbal su Kadenan a Mapulu sa kapasadan kani Abram sa nia nin pidtalu na “Ibpagenggay ku kanu manga tupu nengka su nia ba a kalupan a iganat lu kanu lawas'a ig'u dalepa a Egypt taman den kanu masela a lawas'a ig'u Yupratis, 19 apeg den nu kalupan nu manga taw a Kin, manga taw a Kinis, manga taw a Kadmun, 20 manga taw a Hit, manga taw a Piris, manga taw a Ripa, 21 manga taw a Amur, manga taw a Kanaan, manga taw a Girgas enggu manga taw a Hibus.”