Su Sabapan nu Kinambunua ni Abram kanu Pat Kataw a Datu
14
Na maya ba i nanggula kanu timpu nu pat kataw a datu a si Amrapil a datu na dalepa a Sinar,a si Ariuk a datu na dalepa a Ilasar, si Kidurlaumirb a datu na dalepa a Ilam enggu si Tidal a datu na dalepa a Guy. 2 Inimbunua nu pat kataw ba a nia a manga datu su lima kataw a datu a si Bira a datu na dalepa a Sudum, si Birsa a datu na dalepa a Gumura, si Sinab a datu na dalepa a Adma, si Simibir a datu na dalepa a Sibuy enggu su datu na dalepa a Bila a bedtuan bun sa dalepa a Suar. 3 Na midtimu-timu su lima kataw ba a nia a manga datu lu kanu kadatalan nu Sidim a bedtuan bun sa Matimus a Lanaw. 4 Kagina kanu dalem'u nakasapulu enggu dua lagun na pindatuan bu silan ni Kidurlaumir ugaid'a nia nin kinasapulu enggu telu lagun na sinemungkang den silan. 5 Na kanu ikasapulu enggu pat lagun na nakauma su pat kataw a datu a si Kidurlaumir enggu su manga datu a tinemampil sa lekanin. Na inimbunua nilan muna su manga taw a Ripaim sa dalepa a Astarut-karnaim, su manga taw a Sus sa dalepa a Ham enggu su manga taw a Im sa dalepa a Sabi-kiriataim taman sa tinabanan nilan silan. 6 Tinabanan nilan bun su manga taw a Hur kanu kapalawan nu dalepa a Seir taman den sa dalepa a Il-paran a lu kanu dulunan nu tawan-tawan a dalepa.c 7 Daka sinemibay silan 'bpawang sa dalepa a Inmispat a bedtuan bun sa Kadis taman naagaw nilan sa kinambunua su manga kalupan nu manga taw a Amalik maitu bun su manga taw a Amur a pegkaleben kanu dalepa a Hasasun-tamar. 8 Daka midtimu-timu su datu na dalepa a Sudum, su datu na dalepa a Gumura, su datu na Adma, su datu na Sibuy enggu su datu na Bila a bedtuan bun sa dalepa a Suar lu kanu kadatalan nu Sidim ka minamung silan sa embunua sungkang kanu 9 datu na dalepa a Ilam a si Kidurlaumir, si Tidal a datu na dalepa a Guy, si Amrapil a datu na dalepa a Sinar enggu si Ariuk a datu na dalepa a Ilasar. Nia nin nanggula na pat kataw a datu, kuntela sa lima kataw a datu.10 Na su kadatalan nu Sidim na madakel i mangasalig a pesu a napenu na ispaltu.d Na sia kanu kabpalalaguy nu datu na dalepa a Sudum enggu su datu na dalepa a Gumura na aden naulug kanilan lu ba. Su ped menem na namalaguy lu kanu bakuludan. 11 Daka pinangua nu pat kataw a manga datu su langun na kaaden sa dalepa a Sudum enggu sa dalepa a Gumura apeg den nu langun na kauyagan lu. 12 Na pidtapik'ilan bun si Lut a pakiwatan ni Abram apeg den nu manga tamuk'in a mindalepa lu ba kanu dalepa a Sudum.
13 Daka aden sakataw a da masigkem a nakapanudtul kani Abram a taw a Hibru a lu pendadalepa masupeg kanu masela a kayu ni Mamri a taw a Amur a suled'i Iskul enggu Anir a manga tampil'i Abram sa kapembunua. 14 Na guna makineg'i Abram i nabiag su pakiwatan nin na linimud'in su telu gatus enggu sapulu enggu walu a manga mategel a pabubunua nin a lu den pimbabata kanu pendadalepan nin. Daka tinundug'ilan su pat kataw a datu taman den lu sa dalepa a Dan. 15 Daka pinabpalak-palak'in su manga taw nin ka nia nin kinagkagabi na nilusudan nilan su kuntela. Na tinabanan nilan enggu pidsaluba nilan taman den kanu dalepa a Huba a tampal sa ilud'u dalepa a Damaskus. 16 Na nakua nilan embalingan su pakiwatan nin a si Lut enggu su manga kaaden nin apeg den nu manga babay enggu su ped pan a nangabiag.
Pinalihalan ni Milkisidik si Abram
17 Kanu kapegkauma ni Abram ebpun kanu kinapanaban nin embunua kani Kidurlaumir enggu su manga tampil'in a datu na inalaw sekanin nu datu na dalepa a Sudum lu kanu Kadatalan nu Sabi a bedtuan bun sa Kadatalan nu Datu. 18 Daka si Milkisidike a datu na Salimf enggu 'bpangurbang kanu Kadenan a Mapulu sa Langun na nananggit sa pegken enggu alak a ebpun sa ig'a ubas. 19 Na pinalihalan nin si Abram sa nia nin pidtalu na “Palihalan si Abram nu Kadenan a Mapulu sa Langun a nangaden sa sulega enggu dunia. 20 Pugin su Kadenan a Mapulu sa Langun a napapanaban sa leka kanu manga kuntela nengka.” Daka inenggay ni Abram kani Milkisidik su ikasapulu bad a ebpun kanu langun nu tamuk a nakua nin.
21 Daka nia pidtalu nu datu na dalepa a Sudum kani Abram na “Kua ka den su langun nu manga kaaden ugaid'a imbalingan nengka sa laki su manga taw ku.” 22 Ugaid'a nia inisawal'i Abram sa lekanin na “Inidsapa ku kanu Kadenan a Mapulu sa Langun a su Nangaden sa sulega enggu dunia 23 i apia mana kanaut'a tanul atawa ka iket'a talumpa a makabpun sa leka na di aku kemua asal'a di nengka madtalu i seka i napagkawasa sa laki. 24 Dala kuan ku nia tabia na su nangausal'u manganguda ku enggu su umun nu manga tampil ku a minunut sa laki. Na inggay nengka kani Anir, Iskul enggu Mamri su umun nilan.”