Su Kinabpitas'i Abram enggu Lut
13
Na iganat sa Egypt na mimbalingan si Abram lu sa Nigib a kaped'in su kaluma nin enggu si Lut a it'ilan su langun nu manga kaaden nilan. 2 Na kawasa den a benal si Abram sa pangangayamen, pilak enggu bulawan. 3 Na iganat sa Nigib na mimbalingan sekanin sa dalepa a Bitil. Na tinemalus sekanin lu kanu dalepa a pimbalayan nin paganay sa kagkakalebenan nin a lu tampal kanu pageletan nu Bitil enggu Ai 4 lu kanu nambetadan nu inumbal'in a pegkurbanan ka sinemimba si Abram kanu ingala nu Kadenan a Mapulu.5 Na saleta mambu na si Lut a midtatanggunut kani Abram na migkawasa bun a benal sa manga kambing, bili-bili enggu sapi. Aden sakambinabatan nin enggu aden bun manga ulipen nin. 6 Sabap sa entu na di den 'bpagedtun su 'bpanadtaban nu manga ayam'ilan kagina migkadakel den a benal su pangangayamen nilan tembu mapasang den kanilan i kadtangen sa sakadalepa bu. 7 Tembu tatap den 'bpamagukag su 'bpamedtuganul kanu pangangayamen ni Abram enggu Lut. Na kanu entu a timpu na lu pamun pegkaleben kanu kalupan a entu su manga taw a Kanaan enggu su manga taw a Piris.
8 Daka inimbitiala ni Abram si Lut sa nia nin pidtalu na “Di man dait a magukag ta enggu su 'bpamedtuganul kanu pangangayamen ta kagina 'bpagalia ta. 9 Na nia mapia na 'bpitas ta pan. Dikena ba maulad gaid i kalupan a nan sa embala-bala nengka? Na amaika nia nengka pamilin su tampal sa biwang na nia ku menem pamilin na su temampal sa kawanan. Na u nia nengka menem pamilin su tampal sa kawanan na nia ku menem pamilin na su temampal sa biwang.”
10 Daka nanandeng-sandeng si Lut enggu nadsima-sima nin i su embala-bala kanu kadatalan nu Jordana a lu tampal sa dalepa a Suar na kawasa sa ig a mana su pamumulanan nu Kadenan a Mapulub enggu mana su kalupan nu Egypt. Na kanu entu a timpu na da pan binasa nu Kadenan a Mapulu su dalepa a Sudum enggu Gumura. 11 Na nia pinamili ni Lut na su langun na kadatalan nu Jordan tembu linemu den ba sekanin kanu entu a dalepa a temampal sa sebangan. Na maya ba i ukit a kinabpitas'ilan. 12 Na migkalidtabun si Abram lu kanu kalupan sa Kanaan. Ugaid'a si Lut na lu mindalepa kanu isa kanu manga siudad'u kadatalan taman sa mimbalay sekanin sa kagkakalebenan nin lu masupeg sa siudad sa dalepa a Sudum. 13 Na su manga taw sa dalepa a Sudum na manga daluaka enggu pembaladusa a benal kanu Kadenan.
14 Na endaw i kinapitas'i Lut sa lekanin na nia pidtalu nu Kadenan a Mapulu kani Abram na “Sandeng ka enggu ilay ka su langun a nakabalibet sa leka, 15 ka su langun nu kalupan a 'gkailay nengka na ibpagenggay ku sa leka enggu kanu manga tupu nengka taman sa taman. 16 Na baluyn ku su manga tupu nengka a mana su kadakel'u libubuk kanu liwawaw na dunia. Na u aden makagaga milang kanu libubuk kanu liwawaw na dunia na magaga bun milang su manga tupu nengka. 17 Na lakaw ka, ka libet ka su kauladan nu kalupan ka ibpagenggay ku den sa leka.” 18 Daka pinalin ni Abram su pegkakalebenan nin ka lu sekanin mindalepa masupeg kanu mangasela a kayu nu Mamri a lu tampal sa dalepa a Hibrun. Na minumbal sekanin lu ba sa pegkurbanan kanu Kadenan a Mapulu.