Su Kinasugu kani Abram
12
Na pidtalu nu Kadenan a Mapulu kani Abram i “Ganati ka su dalepa nengka, su manga pagalia nengka enggu su manga tupu nu ama nengka ka lu ka kanu dalepa a ipebpagilay ku sa leka.2 “Pagkadakelen ku su manga tupu nengka
taman sa mabaluy silan a mabagel a bangsa.
Palihalan ku seka enggu baluyn ku a mabadtug su ngala nengka
ka enggu mabaluy ka a palihala kanu madakel a taw.
3 Palihalan ku su apia entain a malimu sa leka
enggu isinta ku su apia entain i mapakabulug sa leka.
Na su langun na tribu kanu liwawaw na dunia
na kapalihalan san makanggulalan sa leka.”
4-5 Daka ginemanat mambu si Abram a mana bun su pidtalu sa lekanin nu Kadenan a Mapulu ka linemu sekanin sa dalepa a Kanaanb enggu minunut sa lekanin si Lut. Na kanu kinaganat'i Abram kanu dalepa a Haran na nakapitupulu enggu lima lagun i umul'in. Na nia pinaunut'i Abram na su kaluma nin a si Sarai enggu si Lut a pakiwatan nin. Na init'ilan bun su manga tamuk a napantiali nilan, maitu bun su manga ulipen a nakua nilan lu sa dalepa a Haran. Na guna silan makauma lu sa Kanaan 6 na minundul pamun si Abram taman sa nakauma silan kanu masela a kayuc na Murid sa dalepa a Sikim. Na kanu entu a timpu na su manga taw a Kanaan na lu pamun kanu entu a kalupan. 7 Daka pibpapayagan nu Kadenan a Mapulu si Abram sa nia nin pidtalu sa lekanin na “Ibpagenggay ku kanu manga tupue nengka su nia ba a kalupan.” Na minumbal sekanin lu ba sa pegkurbanan kanu Kadenan a Mapulu. 8 Iganat lu ba na minundul pamun sekanin lu kanu bakuludan a temampal sa sebangan na Bitil.f Na minudsud sekanin sa kagkakalebenan nin lu kanu pageletan nu Bitil enggu Ai daka minumbal bun sekanin lu ba sa pegkurbanan kanu Kadenan ka sinemimba sekanin kanu ingala nu Kadenan a Mapulu. 9 Daka minundul pamun si Abram taman sa temalus silan kanu kalupan sa Nigib.
Su Kinalu ni Abram enggu si Sarai sa Egypt
10 Na aden nakatingguma a mapasang a kapenggutem tembu linemu si Abram sa dalepa a Egypt ka lu pan sekanin 'gkakaleben kagina su kapenggutem kanu dalepa nilan na 'bpangiseg bun. 11 Na kanu kabpeludep'ilan sa Egypt na nia nin pidtalu kanu kaluma nin a si Sarai na “Pakikineg aku nengka pan sa mapia! Katawan ku i sangat i kanisan nengka a babay. 12 Na endaw i kailay sa leka nu manga taw sa Egypt na matagu sa ginawa nilan i kaluma ku seka. Daka imatayan aku nilan asal bu na makua ka nilan. 13 Kagina ka maitu na edtalu ka i suled aku nengka ka enggu di aku nilan imatayan sabap sa leka taman sa sakawn aku nilan sa mapia.”
14 Na guna su nakaludep den silan sa Egypt na nadsima nu manga taw lu ba su kanisan ni Sarai. 15 Na guna sekanin mailay nu 'gkangasaligan nu Piraung na napanudtul'ilan su kanisan nin lu kanu Piraun. Sabap sa entu na napananggit si Sarai lu kanu tuluganh nu Piraun. 16 Na sabap kani Sarai na sinakaw sa mapia nu Piraun si Abram. Na inenggan nin sekanin sa manga bili-bili enggu manga kambing, manga sapi enggu kimar,i manga unta, manga panunugun a mama enggu panunugun a babay. 17 Ugaid'a tiniuban nu Kadenan a Mapulu sa pakatiawan-tiawan a sakit su Piraun taman den kanu manga taw lu kanu tulugan nin sabap kanu entu a kinapananggit kani Sarai a kaluma ni Abram lu kanu tulugan. 18 Na sabap sa entu na inipatawag'u Piraun si Abram ka nia nin pidtaluan sa lekanin na “Ngin i pinggula nengka a nia sa laki? Ngintu ka da nengka edtalua i kaluma nengka besen sekanin? 19 Ngintu ka nia nengka pidtalu na suled'engka sekanin? Ngintu, asal'a magkaluma ku sekanin? Na kua den i kaluma nengka ka a nia ka awa kanu den sia!” 20 Daka inisugu nu Piraun kanu manga taw nin su kapaawa kani Abram. Na binugaw nilan den sekanin enggu su kaluma nin a it'ilan su langun nu manga kaaden nilan apeg'u manga panunugun nilan.