Su Tantawan nu Babila
11
Kanu paganay a timpu na isa bu i basa nu langun nu taw sia sa liwawaw na dunia. 2 Na kanu kapendadalaug'u manga taw lu kanu sebangan na nakauma silan lu kanu kadatalan nu dalepa a Sinarb taman sa lu den ba silan mindalepa. 3 Na nia nilan ibpamagenggata na “Entanu ka mumbal tanu sa patpasagi a malumiket a budta enggu pakayawan tanu sa mapia ka enggu pedtegas.” Na entu ba i 'bpagusalen nilan a watu na su patpasagi a pinadtegas a budtac enggu ispaltu menem i ipandeketa nilan lun. 4 Na nia nilan pan pidtalu na “Saguna na mumbal tanu sa siudad enggu tantawan a makasugku sa langit i kalambeg'in asal'a mabadtug tanu enggu di tanu den mamakabpalak sia sa liwawaw na dunia.”5 Daka mimbaba su Kadenan a Mapulu ka kinakap'in su siudad enggu su tantawan a papedtindegen nu manusia 6 ka nia nin pidtalu na “Ilay ka! Saguna na sakamaginged bu silan enggu isa bu i basa nilan langun. Na ludsuan bu i nia nu langun nu enggulan nilan. Na di 'gkauget na dala den malegen kanu langun nu mapagitung'ilan enggula. 7 Na entanu ka embaban tanu silan ka bulibugend tanu su basa nilan ka enggu di den silan makadsasabuta.” 8 Na maitu ba i ukit a kinapabpalak'u Kadenan a Mapulu kanu manga taw sia sa liwawaw na dunia taman sa natelenan nilan su kapapedtindeg'ilan kanu siudad. 9 Tembu binedtuan su siudad a entu sa Babile kagina lu ba binulibug'u Kadenan a Mapulu su basa nu sakadunia enggu iganat lu ba na pinabpapalak'in silan sia kanu liwawaw na dunia.
Su Tarsilan nu Tupu ni Sim
10 Nia ba su tarsilan nu tupu ni Sim.
Guna su nakamagatus lagun den i umul'i Sim na pimbata su wata nin a si Arpaksad ulian nu nakadua lagun kanu kinaipus'u kinagkadalem. 11 Na iganat kanu kinambata kani Arpaksad na naumanan pan sa lima gatus lagun i umul'i Sim enggu nakamuliataw pamun sekanin sa manga wata a mama enggu manga babay.
12 Na guna menem su nakamagatus enggu telu pulu enggu lima lagun den su umul'i Arpaksad na pimbata su wata nin a si Silak. 13 Na iganat kanu kinambata kani Silak na naumanan pan sa pat gatus enggu telu lagun su umul'i Arpaksad enggu nakamuliataw pamun sekanin sa manga wata a mama enggu manga babay.
14 Na guna menem su nakatelupulu lagun su umul'i Silak na pimbata su wata nin a si Ibir. 15 Na iganat kanu kinambata kani Ibir na naumanan pan su umul'i Silak sa pat gatus enggu telu lagun enggu nakamuliataw pamun sekanin sa manga wata a mama enggu manga babay.
16 Na guna menem su nakatelupulu enggu pat lagun den su umul'i Ibir na pimbata su wata nin a si Palig. 17 Na iganat kanu kinambata kani Palig na naumanan pan su umul'i Ibir sa pat gatus enggu telupulu lagun enggu nakamuliataw pamun sekanin sa manga wata a mama enggu manga babay.
18 Na guna menem su nakatelupulu lagun su umul'i Palig na pimbata su wata nin a si Riyu. 19 Na iganat kanu kinambata kani Riyu na naumanan pan su umul'i Palig sa dua gatus enggu siyaw lagun enggu nakamuliataw pamun sekanin sa manga wata a mama enggu manga babay.
20 Na guna menem su nakatelupulu enggu dua lagun su umul'i Riyu sa na pimbata su wata nin a si Sirug. 21 Na iganat kanu kinambata kani Sirug na naumanan pan su umul'i Riyu sa dua gatus enggu pitu lagun enggu nakamuliataw pamun sekanin sa manga wata a mama enggu manga babay.
22 Na guna menem su nakatelupulu lagun su umul'i Sirug na pimbata su wata nin a si Nahur. 23 Na iganat kanu kinambata kani Nahur na naumanan pan su umul'i Sirug sa dua gatus lagun enggu nakamuliataw pamun sekanin sa manga wata a mama enggu manga babay.
24 Na guna menem su nakaduapulu enggu siyaw lagun su umul'i Nahur na pimbata su wata nin a si Tira. 25 Na iganat kanu kinambata kani Tira na naumanan pan su umul'i Nahur sa magatus enggu sapulu enggu siyaw lagun enggu nakamuliataw pamun sekanin sa manga wata a mama enggu manga babay.
26 Na guna menem su nakapitupulu lagun su umul'i Tira na pimbata su manga wata nin a mama a si Abram,f Nahur enggu Haran.
Su Tarsilan nu Tupu ni Tira
27 Nia ba su tarsilan nu tupu ni Tira.
Si Tira i ama ni Abram, Nahur enggu Haran. Na si Haran ba a nia i ama ni Lut. 28 Na minatay si Haran lu kanu dalepa a Ur a pimbatan sa lekanin kanu dalepa nu manga taw a Kaldiag kanu timpu a bibiag pamun su ama nin a si Tira. 29 Na namangaluma si Abram enggu si Nahur. Nia ngala nu kaluma ni Abram na si Sarai enggu nia menem ngala nu kaluma ni Nahur na si Milka a wata a babay ni Haran a ama bun ni Iska. 30 Si Sarai na dala wata nin kagina bayas.
31 Na ginanatan ni Tira su dalepa a entu a Ur kanu dalepa nu manga taw a Kaldia ka linemu sa dalepa a Kanaan. Pinaunut'in su wata nin a si Abram, su mamanugang sa lun a si Sarai enggu su apu nin a si Lut a wata ni Haran. Ugaid'a guna silan makauma kanu dalepa a Haran, na lu den ba silan mindalepa. 32 Na nakasaut pan su umul'i Tira sa dua gatus enggu lima lagun entu pan ka minatay sekanin lu sa dalepa a Haran.