Su Kapasadan nu Kadenan kanu Nuh
9
Na pinalihalan nu Kadenan su Nabi Nuh enggu su manga wata nin a mama sa nia nin pidtalu kanilan na “Pagkadakel kanu enggu payapat'u su lusud'u dunia. 2-3 Na mana bun su kinaenggay ku kanu manga gadung a pamumulanen na ibpagenggay ku bun sa lekanu a makan su langun nu manga binatang sa liwawaw na dunia, su manga papanuk sa kawang-kawangan, su 'bpamananap kanu lupa enggu su manga seda lu kanu didalem'u ig. Na kukuken silan na gilek sa lekanu kagina inipalad ku den silan san sa lekanu. 4 Ugaid'a dalem ka maitu na da kanu keman sa sapu a aden pamun lugua nin, ka su lugu na uyag-uyag. 5 Na saben-sabenal a sulian ku apia entain a makapatuga sa lugu nu manusia. Na magidsan pan i manusia atawa ka binatang a makapatuga sa lugu nu manusia na sulian ku.6 Apia entain i makapatuga sa lugu nu manusia
na alus bun a patugan su lugu nu minunu
kagina linimbag'u Kadenan su manusia
sia luyud kanu alung-alung'in.”
7 “Ugaid'a makapantag menem sa lekanu na pagkadakel kanu taman sa payapat'u su lusud'u dunia.”
8 Na nia inibpasad'u Kadenan kanu Nabi Nuh enggu kanu manga wata nin a mama na 9 “Saben-sabenal a inggulalan ku su kapasadan ku sa lekanu taman kanu mangauma pan a tupu nu. 10 Na maitu bun kanu uman i embalangan nu balangiawa a nakaunut sa lekanu a mana su manga papanuk, su manga pangangayamen enggu su talaw a binatang taman den kanu langun nu nakaunut sa lekanu lemiu lu kanu kapal. 11 Saben-sabenal a inggulalan ku su kapasadan ku sa lekanu. Langun nu balangiawa na di den binasan 'bpaluman sa ukit a kagkadalem. Da den makatingguma a kadalem a makabinasa kanu dunia.”
12-13 Na pidtalu pan nu Kadenan i “Ibetad ku su buludtub ku lu kanu kawang-kawangan ka nia ba su tanda nu dala kapedtaman nin a kapasadanc ku sa lekanu enggu kanu langun nu balangiawa a naped'u taman den kanu manga temundug pan a muliataw nu. Na nia ba i mabaluy a tanda nu kapasadan ku kanu sakadunia. 14 Na uman ku pandadtemen su dunia enggu mailay nu su buludtu lu kanu kawang-kawangan 15 na 'gkalendemen ku su kapasadan ku sa lekanu enggu kanu langun nu balangiawa sa di den kabpalumanan minasa na kadalem su langun na balangiawa. 16 Kagina uman embuat su buludtu lu kanu kawang-kawangan na ilayn ku enggu 'gkalendemen ku su dala kapedtaman nin a kapasadan ku sa lekanu taman den kanu langun na balangiawa a 'bpaguyag-uyag sia sa liwawaw na dunia.”
17 Na nia pan pidtalu nu Kadenan kanu Nabi Nuh na “Entu ba su tanda nu kapasadan ku kanu langun nu balangiawa sia kanu liwawaw nu dunia.”
Su Nuh enggu su manga Wata nin a Mama
18 Na su nameliu lu kanu kapal a manga wata a mama nu Nabi Nuh na si Sim, si Yapit enggu si Ham. Na si Ham ba a nia i ama ni Kanaan. 19 Na su telu kataw ba a nia a wata a mama nu Nabi Nuh i nabpunan nu langun na taw a nakapayapat kanu lusud'u dunia.
20 Na su Nabi Nuh na nabaluy a taliawid. Na namumulan sekanin sa pamumulanen a ubas. 21 Guna sekanin 'bpaginem sa alak a ebpun sa ig'a ubas na nalangut sekanin daka linemuwas sekanin lu kanu ludep'u balung-balung a tuleda nin. 22 Na nailay nu ama ni Kanaan a si Ham su kinagkawas-kawas'u ama nin, daka inilakit'in kanu dua kataw a suled'in lu kanu liu. 23 Daka si Sim enggu si Yapit na kinemua sa tanggub ka pidsambalan nilan melat kanu taligkudan nilan entu pan ka sinemunud silan lu kanu balung-balung a tuleda ka tinangguban nilan su ama nilan a nakagkawas-kawas. Na da nilan mailay su kinagkawas-kawas'u ama nilan kagina nakataligkud silan.
24 Na guna den makaimaman su Nabi Nuh taman sa natawan nin su pinakaidan sa lekanin nu ali sa langun a wata nin a si Ham 25 na nia nin pidtalu na
“Idsinta si Kanaan!
Mabaluy a mababa sa langun
kanu manga ulipen nu manga suled'in.”
26 Pidtalu nin bun i
“Pugin su Kadenan a Mapulu a pedsimban ni Sim.
Na mabaluy a ulipen nin si Kanaan.
27 Pagkauladen nu Kadenan su sakup'i Yapit.
Lu sekanin makagkaleben kanu dalepa ni Sim
enggu mabaluy si Kanaan a ulipen nin.”