8
Ugaid'a da kalipatani nu Kadenan su Nabi Nuh enggu su langun nu balangiawa lu kanu ludep'u kapal magidsan i pangangayamen enggu su manga talaw a binatang. Tembu pinasanggiup'in su sambel kanu liwawaw na dunia ka enggu pegkababaw su ig.2 Na nangapelen su manga bualan nu kalupan enggu su ig sa kawang-kawangan taman sa tinemelen den ba a entu mulan.3 Na miniseg bun su kabpangilat kanu liwawaw na dunia enggu nia nin kinamagatus enggu limapulu gay na mimbalingan den su ig sa andang.4 Guna su maitu na nia nin kinasapulu enggu pitu gay kanu ikapitu a ulan-ulan na nakasendad su kapal lu kanu kapalawan sa Ararat.5 Na miniseg bun su kabpangilat, na kanu muna-muna demun a gay nu ikasapulu a ulan-ulan na 'gkasandeng den su manga puntiuk'u kapalawan.
6 Na guna menem maipus su patpulu gay na inukan nu Nabi Nuh su paliungan nu kapal 7 ka napaledtu sa uwak. Na mindedeledtu bu su uwak taman den kanu kinagkamala nu lupa. 8 Daka napaledtu menem sekanin sa malapati ka enggu nin 'gkatawan u nangilat den su ig. 9 Ugaid'a dala natun nu malapati a kadudsukan nin kagina madalem pamun su ig tembu mimbalingan lu kanu Nabi Nuh. Daka kinua nin den mambu su malapati ka pinaludep'in 'bpaluman lu kanu kapal. 10 Na guna su maitu na napalepas pan sekanin sa pitu gay entu pan ka pinaledtu nin 'bpaluman su malapati. 11 Na nia nin kinadsukilep na mimbalingan su malapati sa lekanin a aden den nait'in a gadung pamun a benal a laun nu kayu a ulibusa a lu kanu tuka nin. Na entu pan ba ka naamad'u Nabi Nuh i minilat den su ig. 12 Daka napalepas menem sekanin sa nakapitu gay entu pan ka pinaledtu nin 'bpaluman su malapati ugaid'a da den ba a entu embalingan su malapati.
13 Kanu muna-muna a gay, kanu muna-muna a ulan-ulan a nakanem gatus enggu salagun su umul'u Nabi Nuh na nailatan den su kalupan. Daka iniawa nin su tanggub'u kapal taman sa nailay nin a mamala den su kalupan. 14 Na kanu ikadua a ulan-ulan kanu ikaduapulu enggu pitu gay na mamala den a benal su kalupan.
15 Daka sinugu nu Kadenan su Nabi Nuh sa 16 “Liu ka den kanu kapal apeg'u kaluma nengka, su manga wata nengka a mama enggu su manga mamanugang sa leka. 17 Na paliu ka bun su langun nu nakaunut sa leka a embalangan na balangiawa a mana su manga papanuk, su pangangayamen, su manga talaw a binatang taman den kanu langun nu embalangan na malanap-lanap a 'bpaguyag-uyag sa liwawaw na dunia. Paliu ka silan ka enggu silan pegkadakel taman mamamipis ka enggu silan makapayapat kanu kalupan.” 18 Daka linemiu den mambu lu kanu kapal su Nabi Nuh apeg'u kaluma nin, su manga wata nin a mama enggu su manga mamanugang sa lekanin. 19 Na maitu bun su uman i embalangan nu manga binatang, malanap-lanap, manga papanuk enggu langun nu 'bpaguyag-uyag kanu kalupan na nameliu bun silan kanu kapal a salengan nu uman i isa su pagidsan nin.
20 Na guna su maitu na minumbal su Nabi Nuh sa pegkurbanan kanu Kadenan a Mapulu. Daka namili sekanin kanu uman i embalangan nu limpiu a binatang enggu limpiu a papanuk ka inigkurban nin sa pedtutungen langun lu kanu pegkurbanan. 21 Na guna mabaw nu Kadenan a Mapulu su makasuat a entu a baw na natagu sa ginawa nin i “Di ku den idsinta 'bpaluman su kalupan sabap kanu manusia apia mawag pan su 'gkagkahanda nu pamusungan nilan iganat sa manguda pan silan. Na di ku den binasan 'bpaluman su langun na balangiawa a mana su pinggula ku.
22 Na taman sa aden pan su dunia
su kapamula enggu kasabpet,
su timpu nu panenggaw enggu mayaw,
su timpu nu kambalat enggu kapanenang,
su kagagabian enggu su kalalamagan
na su langun nu entu na dala den kadtaman nin.”