Su Masela a Kinagkadalem
7
Daka nia pidtalu nu Kadenan kanu Nabi Nuh na “Ludep ka den lu kanu kapal apeg'u sakambinabatan nengka. Kagina seka bu i nailay ku a matidtu sa langun na taw kanu nia ba a timpu. 2 Paludep ka bun sa enggaga-pitu timan a babay-mama kanu uman i embalangan nu limpiu a binatang enggu enggagad-satiman a babay-mama kanu uman i embalangan nu dikena limpiu a binatang. 3 Na pitu timan menem a babay-mama kanu uman i embalangan nu papanuk asal bu na aden masama a bibiag kanu sempu nilan sia sa liwawaw na dunia. 4 Kagina pitu gay saguna na mapaulan aku kanu liwawaw na dunia sa dalem'u patpulu gay enggu ibped-ibpeden ku mayupas su langun na balangiawa a pinangaden ku kanu kalupan.”5 Daka pinggula den mambu nu Nabi Nuh su langun nu inisugu sa lekanin nu Kadenan a Mapulu.
6 Na saleta mambu na nakanem gatus lagun i umul'u Nabi Nuh kanu entu a timpu nu kinagkadalem kanu kalupan. 7 Na linemudep den mambu su Nabi Nuh lu kanu kapal apeg'u kaluma nin taman den kanu manga wata nin a mama enggu su manga mamanugang sa lekanin ka enggu silan mamakalipuas kanu kadalem. 8-9 Na mana bun su inipapata nu Kadenan kanu Nabi Nuh, na pinaludep'in lu kanu kapal su babay-mama kanu uman i embalangan nu binatang magidsan i limpiu enggu dikena limpiu. Napaludep bun sekanin sa manga papanuk enggu langun nu embalangan na malanap-lanap. 10 Na endaw i kinaipus'u pitu gay na nakatingguma su kadalem kanu liwawaw na dunia. 11 Na nabungkasan su langun nu bualan kanu lupa taman sa nakabubus su ig a ganat sa pulu kanu timpu a nakanem gatus lagun i umul'u Nabi Nuh, kanu ikasapulu enggu pitu gay nu ikadua a ulan-ulan. 12 Na kanu dalem'u nakapatpulu gay na da den pinda nu kabpagulan.
13 Na kanu entu bun ba a gay na linemudep lu kanu kapal su Nabi Nuh enggu su kaluma nin taman den kanu manga wata nin a mama a si Sim, si Yapit enggu si Ham apeg'u manga kaluma nilan. 14 Na napaludep bun silan sa uman i embalangan nu manga binatang magidsan i manganaut enggu mangasela, su uman i embalangan na malanap-lanap a sia 'bpaguyag-uyag kanu lupa enggu su uman i embalangan nu manga papanuk. 15-16 Na babay-mama kanu uman i embalangan nu langun na balangiawa na pinaludep'u Nabi Nuh lu kanu kapal a mana bun su inipapata nu Kadenan sa lekanin. Daka endaw demun i kinaludep'u Nabi Nuh na pinintuan nu Kadenan a Mapulu su bengawan nu kapal.
17 Na 'bpangiseg-'bpangiseg bun su kapegkadalem kanu liwawaw na dunia kanu dalem'u nakapatpulu gay taman sa nakagampung su kapal iganat lu kanu nabetadan nin. 18 Na midsanaw den su dunia enggu nangiseg pan a benal i kinagkadalem sia sa liwawaw na dunia, na penggantung-gantung bu su kapal kanu liwawaw nu ig. 19 Nangiseg pamun a benal su kinagkadalem kanu liwawaw nu dunia taman sa naibped nakageled su langun na mangalambeg a kapalawan kanu lusud'u dunia. 20 Migkadalem a benal taman sa nalampasan nin pan su puntiuk'u kapalawan sa manga labi telu lepa. 21 Daka nakageled den su langun nu balangiawa kanu liwawaw na dunia, su manga papanuk enggu su manga binatang taman den kanu manga malanap-lanap apeg den nu langun na manusia. 22 Na langun-langun nu aden napas'in kanu liwawaw nu dunia na naibped namamatay. 23 Na maitu ba i kinaibped-ibped mayupas'u Kadenan kanu langun nu balangiawa kanu liwawaw nu dunia, magidsan i manusia enggu su manga binatang taman den kanu manga papanuk nia tabia na su Nabi Nuh enggu su langun nu lu kanu kapal.
Su Kinabpapas'u Kadalem
24 Na kanu dalem'u magatus enggu limapulu gay na migkadalem bu sia sa liwawaw na dunia.