Su Kadaluakan nu Manusia
6
Na guna su pegkadakel-pegkadakel den su manusia sia sa liwawaw na dunia taman sa pimbata su manga wata a babay 2 na nadsusuliman nu manga wata a mama nu aden bagel'in a di 'gkangailaya i su manga wata a babay nu manusia na manganisan a benal. Na pinamangaluma nilan i apia entain i 'gkapamili nilan. 3 Guna su maitu na nia pidtalu nu Kadenan a Mapulu na “Di den edtangen su napas a 'bpagenggay sa uyag-uyag a inenggay ku kanu manusia taman sa taman kagina makaduduniayb silan. Nia bu kauget'u umul'ilan na magatus enggu duapulu lagun bun den.” 4 Na kanu entu ba a timpu na guna penduluga nu manga wata a mama nu aden bagel'in a di 'gkangailay su manga wata a babay nu manusia na mimbabata silan. Na iganat sa kanu entu ba a manga timpu taman den kanu namakatundug pan na mimbuat su manga Nipili,c na silan ba a nia su mangabagel enggu badtug a taw kanu entu a timpu.5 Daka nailay nu Kadenan a Mapulu i subela den su kadaluakan nu manusia sia sa liwawaw na dunia ka nia nilan bu 'gkagkahanda sa kagagabian na mawag. 6 Tembu nadsenditan a benal'u Kadenan a Mapulu su kinapangaden nin kanu manusia enggu nakalidu i entu sa ginawa nin. 7 Guna su maitu na nia pidtalu nu Kadenan a Mapulu na “Ibped-ibpeden ku mayupas su manusia a pinangaden ku sia sa liwawaw na dunia apeg den nu manga pangangayamen taman den kanu manga talaw a binatang maitu bun su manga papanuk kagina nadsenditan ku su kinapangaden ku kanilan.” 8 Ugaid'a nasuatan a benal'u Kadenan a Mapulu su Nabi Nuh.
Su Nabi Nuh enggu su Masela a Kapal
9 Nia ba su tarsilan kanu manga tupu nu Nabi Nuh.
Matidtu a taw sekanin enggu kanu timpu nin na sekanin i matidtu enggu naguyag-uyag a ikelas sia kanu adapan nu Kadenan. 10 Aden telu kataw a manga wata a mama nu Nabi Nuh a nia nin manga ngala na si Sim, si Yapit enggu si Ham. 11 Ugaid'a sia kanu adapan nu Kadenan na nabinasa den a benal su dunia ka napenu den na kadaluakan.
12 Na nadsima-sima nu Kadenan i saben-sabenal a migkalat den su dunia kagina langun nu manusia na namakasibay den i ukit'in. 13 Na guna su maitu na nia pidtalu nu Kadenan kanu Nabi Nuh na “Natatalanged a pupusen ku den su langun nu manusia sia sa liwawaw na dunia ka sabap kanilan na linemangkap den su kadaluakan sa dunia. Na saben-sabenal a binasan ku den silan enggu su langun nu sia sa dunia. 14 Na umbal ka sa masela a kapald a ebpun sa kayu a gupir.e Umbali ka bun sa manga bilik su kapal a entu enggu taneb ka sa ispaltu su ludep'in enggu su liu nin. 15 Na maya ba i kaumbal'engka kanu kapal. Nia nin kalendu na pitupulu enggu lima lepa,f nia nin menem balawagan na sapulu enggu dua enggu tenga lepa. Nia nin kalambeg na pitu enggu tenga lepa. 16 Umbali ka bun sa paliungang su kapal sa manga sapulu enggu walu kapulgada iganat kanu untul'in. Umbal ka su kapal a entu sa telu kapangkatan enggu panagui ka sa bengawan su ligid'in. 17 Ka natatalanged a mapatingguma aku sa masela a kadalem sia sa liwawaw na dunia ka enggu 'gkabinasa su langun nu balangiawa a sia 'bpaguyag-uyag kanu dunia. Na langun-langun nu sia sa dunia na maibped-ibped den matay. 18 Ugaid'a mangaden aku sa kapasadan sa leka a natalatantu a inggulalan ku. Seka apeg'u manga wata nengka a mama taman kanu kaluma nengka enggu su manga mamanugang sa leka na dait a mameludep lu kanu kapal. 19-20 Paludep ka sa babay-mama kanu uman i embalangan a balangiawa asal bu na aden masama a bibiag sia sa liwawaw na dunia. Paludep ka bun sa babay-mama kanu uman i embalangan nu papanuk, binatang enggu malanap-lanap ka enggu aden masama a bibiag kanilan. 21 Na seka menem na kua ka sa langun na embalangan na makan enggu limud ka kagina entu ba i maumbal a makan nu apeg den nu langun nu lu kanu kapal.”
22 Na guna su maitu na pinggula den nu Nabi Nuh su langun nu inisugu sa lekanin nu Kadenan a dait a enggulan nin.