Lisaaya lia Omwami
(Matayo 6:9-15; 7:7-11)
11
1 Yinyinga ndala Yesu yali abundu alasaayanga, neyakhamala, mulalakho wa abechi baabe wamusungila ari, “Omwami, khwechesie okhusaaya khuli Yohana yechesia abechi baabe.”2 Wabasungila ari, “Namusaya, sunga muri,
‘Papa,a
elira lilio litakatifu lifumibwe,
Obwami bubwo bwiche.
3 Okhuhe esiakhulia siefu sia buli nyinga,
4 khubeele obwoni bwefu,
khuli efwe fwesi khubeelanga yabo bakhukholelanga amabi.b
Okhakhulekha khwenjila mu makhako ta.’ ”
5 Khandi wabasungila ari, “Kaaba bari mulala wenyu wubeele nende omusaale wa anyala okhucha ewuwe musilo wamusungila ari, ‘Musaale wanje, mbekho emikati kitaru, 6 sikila omusaale wanje wunjeniye mani embula sia okhumuwa alie.’ 7 Mani omusaale wuwe wulia amusungile ari, ‘Okhanyaasia ta, nikaleo omuliango, khandi esie nende abana baanje khukonile. Senyala nabuukha nakhuha esindu siosi siosi ta.’? 8 Lekha emusungile, salabuukha buchwa amuhe emikati sikila wubeele omusaale ta, nebuchwa sikila okhunialilisia, alabuukha amuhe siosi siosi sia yenyile. 9 Subila emusungile, saba mani mulaheebwa, kaka mani mulanyola, khong'onda omuliango mani mulekulibwa. 10 Sikila yesiyesi wusaba ahebwangwa, wukakanga anyoolanga, naye wukhong'ondanga omuliango kulekulibwa. 11 Papa sina mwinywe, wa omwana wuwe anyala okhumusaba ying'eni naye amuhe yinjukha. 12 Naho asabe libuyu naye amuhe yinyanja? 13 Nono kaaba bari enywe muli ababi mwamanya okhuha abana beenyu ebihanwa ebilayi, Papa wa mwikulu se alawa Roho Omutakatifu yabo bamusaba!”
Abandu balekhaasia Yesu nende beelisebuli
(Matayo 12:22-30; Mariko 3:20-27)
14 Nono Yesu yali alakhumanga esisieno siali nesiakhola omundu okhuba omuminyi. Esisieno silia nesiakhacha, omuminyi wulia walakaya, abandu bahuka. 15 Nebuchwa abandi basunga bari, “Akhumanga ebisieno okhubirira mu Beelsebuli, omukhongo wa ebisieno.” 16 Ne abandu baandi benya okhureka Yesu, kho bamureeba bari abechesie esiloli okhurula mwikulu.
17 Nebuchwa yali wumanyile yinganakani yaabo, wabasungila ari, “Buli obwami bwa kabukhanamo obwene khu bwene bwakhakwe, na yinju yakabukhanamo se yihambananga ta. 18 Ne kaaba bari Sietani wakabukhanamo omwene, obwami bubwe bulasingila buriena? Sikila enywe mulasunganga muri esie ndakhuumanga ebisieno mu elira lia Beelisebuli. 19 Ne kaaba bari esie ekhuuma ebisieno mu bunyali bwa Beelisebuli, abana benyu bakhuumanga mubunyali bwa wina? Khwako, abana benyu nibo bakha mukhalakile enywe. 20 Ne kaaba bari endakhuumanga ebisieno mu bunyali bwa Wele, aba obwami bwa Wele bwichile mwinywe.”
21 “Omundu wa amani, wuli nende obulwani, nalinda emiandu hango wuwe, ebindu biibie bibechanga nomulembe. 22 Nebuchwa omundu wa amani okhumukhila alamwingilila wamukhaya, abukulanga obulwani buubwe bwa yeyikina nende emiandu kikie.”
23 “Yesiyesi wukhali ninasie ta, yanjenyelanga amabi, na yesiyesi wukhabuusia ninasie ta, asalanisianga.”
Omundu abechanga omubi muno esisieno sila mukalukhamo
(Matayo 12:43-45)
24 “Esisieno nisiakharula mu omundu, siyiyanga mu siangalamwe nesikaka wa simunyila. Ne silakhaywa okhunyola abundu, sisunganga siri, ‘Endakalukha munju yanje ya narulamo.’ 25 Lwa sikalukha sinyole yinju yene beyilemo khandi bayilombile obulayi, 26 sirekukhanga sicha okhurera ebisieno bindi musafu, biiche bingile bimenyemo. Omundu wulia abechanga omubi okhukhila lwa okhuranga.”
27 Ne asilakaya amakhuwa kano, omukhasi wali mu lituli lia abandu wamusungila ari, “Omukhasi wakhwibula khandi wakhununia wubeele nende yikhabi.” 28 Nebuchwa Yesu wasunga ari, “Babeele na yikhabi balia bahulila likhuwa lia Wele ne okhulirumikhila.”
Esinyasio sia bandu baloba okhwikanila
(Matayo 12:38-42; Mariko 8:12)
29 Lwa lituli liali ne lilakaliyanga, warakikha okhusunga ari, “Eselukho yino yamayaana. Yikakanga okhulola amaya, nebuchwa abulaho wulalengela yilali amaya kakholekha khu Yona. 30 Sikila Yona yecha khuli amaya khu abandu ba Ninebe, Omwana wa Omundu yesi aliba ario khu selukho yino. 31 Yinyinga ya likhalaka, Omwami wa esikhasi wa Siepa akheche okhukhalakila abandu ba eselukho yino, sikila yarula hale okhwicha okhurekelesia obusicha bwa Solomoni. Lengela, omundu omukhongo okhukhila Solomoni wubeele hano, yilali baaloba okhumuhulila. 32 Yinyinga ya likhalaka abandu ba Ninebe bakhasinjile halala nende ba eselukho yino bayikhalakile. Sikila nibo bekanila lwa bahulila amelwacho ka Yona. Lengela, omundu omukhongo okhukhila Solomoni wubeele hano.”
Yesu niye etaa
(Matayo 5:15; 6:22-23)
33 “Abulaho omundu wuhambisianga etaa mani ayikisa naho afunikhila mundubi, nebuchwa, ayirechanga khusiani siayo, kho yabo benjila balengele obulafu. 34 Yimoni yibele etaa ya omubili kukwo. Ne yili nende obulamu, omubili kukwo kwosi kubeele nende obulafu, nebuchwa ne yabofula omubili kukwo kubeele musiilima. 35 Khwako, obe meso, obulafu buli mukari mumwo bukhaba esilima ta. 36 Omubili kukwo kulaba nende obulafu, esiilima silatakhamo, kulaba omulafu kwosi, khuli etaa yirusianga obulafu.”
Yesu akondekhela Abafarisayo nende abechesi ba amalaka ka Musa
(Matayo 23:1-36; Mariko 12:38-40; Luka 20:45-47)
37 Yesu nayakhamala okhulakaya, Omufarisayo mulala wamusaba ari ache anyole esiakhulia ewuwe, waacha wekhala amesa okhulia. 38 Omufarisayo wulia wahuka lwa yalengela Yesu naalia halali okhusaaba amakhono kake ta. 39 Omwami wamusungila ari, “Nono enywe Abafarisayo musinganga khwikulu khwa esikombe nende esipwakuli, nebuchwa mukari mwayechula obuliungu nende obumayanu. 40 Enywe abayingwa! Se mwamanya muri wulia walomba elwanyi niye walomba nende mukari mwosi ta? 41 Nebuchwa muhaane khu abamanani ebindu bia muli ninabio mani ebindi biosi kane biibe ebilafu khu enywe.
42 “Esinyaasio khu enywe Abafarisayo. Sikila muhananga silala khwikhumi sia buli pilipili, sarati nende chifwa chindi khuli namasaka cha murakanga mu esituti sienyu, yilali mulekelesia okhukholela abandu ka toto nende okhwechesia obuyansi bwa Wele. Mukhoya mwakhola kano, halali okhulekelesia akandi ta.
43 “Esinyaasio khu enywe Abafarisayo! Sikila mwayanja ebifumbi bia yimbeli mu chisinakoki nende emilembe kia liria mu soko.
44 “Esinyaasio khu enywe! Sikila mubeele khuli ebilindwa bikhalolekha ta, khandi abandu bachendangakho halali okhumanya bari ebilindwa nibio ta.”
45 Omwechesi mulala wa malaka wamukalusia ari, “Omwechesi, wubeele khuli wulakhunyekanga fwesi ne osunga amakhuwa kano.”
46 Yesu wasunga ari, “Esinyaasio khu enywe mwesi, abechesi ba amalaka ka Musa, sikila mutiukhanga abandu ebindu ebisiro bikhachingikha ta. Ne enywe mwabene se munyala okhuchinga ta. 47 Esinyaasio khu enywe, sikila mwombakhanga ebilindwa bia abang'osi ba abakuka benyu beera. 48 Nono ebikholwa benyu biechesia biri mwayeyamana nende ka abakuka benyu bakhola. Beera abang'oosi, nanywe mwombakha ebilindwa biabo. 49 Sikila kano, Wele mu busicha bubwe wasunga ari, ‘Endabarumila abang'oosi nende abarume, balalakho bakhabeere na abandi bakhaboopie esibi.’ 50 Kho esifuki sia abang'oosi bachukha okhurula mukhurakikha khwa esialo, sikhabe khumirwe kia abandu ba eselukho yino. 51 Okhurulila khu sifuki sia Abeli okhutukha khu sia Sakaria, wa beerera akarikari wa obwali bwa elwanyi nende amuliango kwa litembeli. Yee, endamusungilanga, eselukho yino yikhanyoole esinyaasio sikila esifuki sino siosi.”
52 “Esinyaasio khu bechesi ba amalaka! Sikila mwabiikha olufunguo lwa yinju ya obuchesi. Enywe mwabene simwenjila ta, khandi mwakhingililila bali ne balenjilanga bakhenjila ta.”