Mukhaba khuli Abafarisayo ta
(Matayo 10:26-27)
12
1 Ebise bilia, abandu chielefu chingali bali bebunjelesie halala, ne sikila bali abakali bali balaswalananga. Yesu wasungila abechi baabe ari, “Mwilinde okhurulana nende liiba lia Abafarisayo, yaani liiba lia obuchinia.” 2 Sibulaho siafunikhwa sikhalifunulwa ta, naho siekisa sikhalimanyikha ta. 3 Nono liosiliosi lia walakaya musilima lilihulilikha abuwanga, khandi liosiliosi lia wamonyela mu bwikisi lililwachibwa khubisuli bia chinju.aWa okhoyela okhuria
(Matayo 10:28-31)
4 “Lekha emusungile basale banje, mukharia balia banyala okhwira omubili kwong'ene, mani ne bakhamala sibulaho sia banyala okhukhola okhubira yaho ta. 5 Nebuchwa, lekha emusungile wa mukhoyela okhuri: Ria Wele wunyala okhwira omubili, mani neyakhamala wubeele nende obunyali bwa okhukusukuna mu mulilo kwa emakombe. Yee, toto emusungila endi mukhoya murie omwene oyo. 6 Opicho birano se bikulikhanga chisilingi chibili? Mani Wele se yebililanga khakhaba khalala ta. 7 Liakhaba liswi lia khumirwe kienyu liabalwa. Mukharia ta sikila enywe mubele nende obukhala obukali okhubira opicho ebikali.
Yesu akaya abechi baabe okhuba abachinia
(Matayo 10:32-33; 10:19-20)
8 “Khandi endamusungilanga endi yesiyesi wulanjiyama yimbeli wa abandu, Omwana wa Omundu yesi akhamwiyame yimbeli wa chingeloosi cha Wele. 9 Nebuchwa, omundu wulanjikana yimbeli wa abandu, yesi akheekanwe yimbeli wa chingeloosi cha Wele. 10 Khandi buli omundu wulakaya likhuwa libi khu Omwana wa Omundu alibeelwa, nebuchwa wunyeka Roho Omutakatifu se alibelwa ta. 11 Khandi nemucha okhuyalwa yimbeli ya abetaini ba sinakoki nende yimbeli wa abaami, mukheendekhelela khuli muletetea nende lia mulalakaya ta. 12 Sikila Roho Omutakatifu alamwechesia ebise biene lia mwenyekha mulakaye.”
Epimbi ya omuyinda omuyingwa
13 Omundu okhurula mu lituli wasunga ari, “Omwechesi, sungila wandaye wanje, yangabekho emiandu kia papa yakhulekhela.” 14 Nebuchwa Yesu wasunga ari, “Musale wanje, wina wukholile esie omukhalaki naho omundu wa okhukabania emiandu akari wenyu?” 15 Khandi wabasungila ari, “Mube meso, khandi mwilinde okhurulana nende buli lukano lwa obulianga. Sikila obulamu bwa omundu se burulana nende obukali bwa emiandu kikie ta.” 16 Khandi wabasungila epimbi yindala ari, “Omundu omuyinda yachesa ebiakhulia ebikali okhurula mu omukunda kukwe. 17 Mani webaasia ari, ‘Ekhole sina? Sikila sendi nende abundu wa okhubikha likesa lianje ta!’
18 “Kho wasunga ari, ‘Endakhola endi; endakhomolola ebiaki bino nombakhe bili nende obwangu obukali, mani embikhemo likesa nende emiandu kianje. 19 Mani esungile omwoyo kwanje endi, “Bulaano wubeele nende libikhilo lia ebindu ebikali ebilayi bia olarumikhila khu mihika emikali. Yimunya, lia, onywe khandi wikhoyele!” ’
20 “Nebuchwa, Wele wamusungila ari, ‘Ewe omusilu! Esilo sia bulano obulamu bubwo bulenyekhananga. Kho wina wukhanyoole ebindu bia webiikhila?’ 21 Kho kakhabe kario khu omundu yesiyesi wibikhila obuyinda mani se ali omuyinda mumoni cha Wele ta.”
Subila mu Wele
(Matayo 6:25-34)
22 Khandi wasungila abechi baabe ari, “Nono endamusungilanga endi, mukheendekhelela limenya lienyu, khu sia mulalia, naho sia mulafwala khu omubili kwenyu ta. 23 Sikila obulamu bukhila esiakhulia, khandi omubili nakwo kukhila chingubo. 24 Yibaasiakho khuli khooro kili, sekirakanga naho sekichesanga ta, kibula ebiachi bia okhubungamo esiakhulia, nebuchwa Wele akilisianga. Ne enywe mubeele nende obukhala okhukhila khooro. 25 Khandi wina mwinywe mukhuhenda khukhwe wunyala warambiyisia obulamu bubwe yakhaba na yisa ndala? 26 Kaaba bari se munyala okhukhola esindu esititi khuli esienesi, mwihendekhelela sina khu kandi amakali?
27 “Yibaasiakho khuli ebimuli bia mundaha bikhulunduanga. Sebikholanga emilimo ta khandi sebinabanga chingubo ta. Nebuchwa lekha emusungile, Omwami Solomoni mu buyinda bubwe bwoosi se yafwalakho yingubo yindayi khuli esimuli silala khubino ta. 28 Enywe abandu ba lisubila lititi, kaaba bari Wele anyala wafwala ebimuli bia mundaha, biliho bulano na muchuli bisukunwe mu omulilo, se anyala okhumulinda enywe okhubira ebimuli! 29 Khwako, mukhakaaka sia mulalia naho sia mulanywa ta, khandi mukhahendekhelela sikila ebindu bino ta. 30 Sikila abandu bakhamanyile Wele ta boosi bakakanga ebindu bino, nebuchwa Papa wenyu wa mwikulu wamanya ari mwenyekhana mube nabio. 31 Nebuchwa, mukake obwami bwa Wele mbele, mani mukhaheebwe ebindu bino biosi.
32 “Enywe muli batiti mukharia ta, sikila Papa wenyu wusimisiibwe okhumuha enywe obwami. 33 Kusia emiandu kienyu muhelesie abamanani chisilingi. Mwikakile emifuko kia chisenti kikhasakhula ta, mube nende libikhilo mwikulu likhaliwa ta, wa omwifwi naho sinyala okhwonona sikhatukha ta. 34 Sikila wa libikhilo lilio lili niho wa omwoyo kukwo kwosi kuli.
Abakhalabani bali meso
(Matayo 24:45-51)
35 “Mwirekekhele liosiliosi lilecha, mwiboe emikoye kienyu khandi chitaa chenyu chikhasima ta, 36 khuli abandu balindile omwami wabo akalukhe yingo okhurula mwikhoyo ya esiselelo, kho bamwikulile omuliango lwa alecha akhong'onde. 37 Abakhalabani ba omwami wabo alecha anyole nebali meso babeele nende yikhabi. Endamusungilanga toto, alafwala chingubo khuli omukhalabani khandi areere esiakhulia abekhasie hasi balie, mani abatende. 38 Bukhabe obulayi khu abakhalabani ba omwami waabo akhabanyole ne basili meso yakheecha akarikari wa esilo naho etaywa ya okhuranga ne yikhakholiokha ta. 39 Nebuchwa manya lino, omwene yinju amanya ebise bia omwifwi alechela, handi siyarula walekha yinju yiye yifunakwe ta. 40 Enywe mwesi mukhoya mwirekekhe sikila Omwana wa Omundu alecha ebise bia mukhamanya ta.”
Omukhalabani weyikinwa nende wukheyikinwa ta
41 Petero wasunga ari, “Omwami, olakhusungilanga efwe epimbi yino naho abandu boosi?” 42 Omwami wamukalusia wasunga ari, “Nono, wina niye wuli omukhalabani wa okhusubilwa khandi omusicha, wa omukhongo wuwe anyala wamukhola omwimelesi wa yinju yiye wa okhukabila abakhalabani baasie esiakhulia khu bise bienyekha? 43 Bukhabe obulayi khu omukhalabani wulia kaaba bari omukhongo wuwe akhamunyole nalakholanga ario lwa alikalukha. 44 Endamusungilanga toto endi alimukhola asinjilile emiandu kikie kiosi. 45 Nebuchwa omukhalabani wulia anyala okhwisungila ari, ‘Omukhongo wanje se wukalukhe khangu ta,’ mani arakikhe okhuupa abakhalabani bandi ba esisacha nende ba esikhasi, ne alia buchwa nanywa namela. 46 Omukhongo wa omukhalabani wulia alikalukha yinyinga yakhapaarire ta, khandi mu ebise bia akhamanyile ta. Akhamukhalakile esinyasio esilulu khandi akhamusukune elwanyi wa bakhaasubila ta bali.
47 “Omukhalabani wamanya elienya lia omukhongo wuwe nebuchwa se yerechekha okhukhola ario ta, akhanyoole esikhupe esikali. 48 Nebuchwa wulia wukhamanyile ta mani wakhola kakhoyelwa okhupwa, akhanyole esikhupe sititi. Khu buli mulala wahebwa ebikali, ebikali bikhenyekhe okhurula khu niye, na wulia wa abandu bahelesia ebikali balimwenyakho ebikali.
Abandu baukhana sikila Yesu
(Matayo 10:34-36)
49 “Necha okhubwana omulilo mu esibala, mani nikomba endi andi kwaburukha khale! 50 Nebuchwa nibeele nende lipatiisia lia esinyaasio esilulu lia ekhoyela okhupatisibwa, mani nibeele nende eliendekhelela likali nabwiila liliicha likholekha. 51 Mupaara muri nayecha okhurera omulembe mu esibala? Se kali kario ta, esie narera eliaukhana mu abandu. 52 Sikila okhurulila ebise bino okhuchilila, abandu barano bamenya munju ndala balaukhanamo. Bataru balabiyila babili ne babili babiyile bataru balia. 53 Bakhaukhane, papa abiyile omwana wuwe, ne omwana naye abiyile papa wuwe, maayi abiyile omukhana wuwe ne omukhana naye abiyile maayi wuwe; maayi omukhwe akhabiyile mukha omwana wuwe, ne mukha omwana naye abiyile maayi omukhwe wuwe.”
Okhumanyilisia ebise.
(Matayo 16:2-3)
54 Khandi wasungila lituuli lilia ari, “Mulalengela amaleesi kalebusianga mumbo se musunganga muri, ‘Yifula yilechanga okhukwa.’ Mani kaba kario. 55 Khandi mulalengela yimboho ya okhurula emwalo ne yiwucha, se musunganga muri ‘Esimiyu silechanga,’ mani kaba kario. 56 Enywe mubeele abachinia! Mwamanya okhumanyilisia khuli esialo nende likulu bili. Siina sikila nemukhamanyilisia ebise bia bulano ta?”
Wulilisiana nende wa mulayalananga naye
(Matayo 5:25-26)
57 “Khandi sina sikila ne mukhekhalakila kali amalunji okhukhola ta? 58 Nemucha nende wa mulayalananga naye wa omukhalaki, khaka buchwa muhulilisianile khu yinjila. Ne kakhali kario alakhutusia wa omukhulaki, mani omukhalaki naye akhure mu makhono ka omusikari wa esibohe, omusikari wa esiboe naye akhure mu esibohe. 59 Endamusungilanga, se olirula musiboe mulia ta, nabwila okharunge likobi lilio limalilisi.”