Wikanile naho ohele
13
1 Nono baliho balala ebise bienebio basungila Yesu khuli Pilato yera Abakalilaya bali ne balarusianga ebihanwa bia ebiayo (bia okhuhosia/Okhusinja). 2 Yesu wabakalusia wasunga ari, “Nemupaara Abakalilaya bano bali abooni olukali okhubira Abakalilaya bandi, kho babirira mu esinyasio khuli sino? 3 Endamusungilanga, se kali kario ta. Nebuchwa nemukhekanila ta, mwesi mukhahele murio. 4 Naho abandu likhumi na munane ba omunara kwa Siloamu kwa kwakho kwabeera, mupaara muri bali abooni olukali okhubira abandu bandi bamenya Yerusalemu? 5 Endamusungilanga se kali kario ta. Nebuchwa nemukhekanila ta, mwesi mukhahele murio.”Epimbi ya omukhuyu kukhaamanga ta
6 Khandi wabasungila epimbi yino, “Omundu yali waraka omukhuyu mu omukunda kukwe kwa amasapipu. Yinyinga yindi wacha okhubutakho amakhuyu nebuchwa se yanyolakho ta. 7 Kho wasungila omulimi wuwe ari, ‘Lengela, khu mihika kitaru, nichanga okhukaka amatunda khu omukhuyu kuno, yilali se nanyoolakho esindu ta. Kureme kukwe, sikila kulononanga liloba buchwa.’
8 “Omulimi wulia wamukalusia ari, ‘Omwami, lekha kube khu lwa omuhika mulala, enda kwakila endemo esiina. 9 Nekurakho amatunda omuhika kwicha, obulayi buchwa, nekukharakho ta, onyala wakurema.’ ”
Yesu ahonia omukhasi omuleme yinyinga ya Sapato
10 Yinyinga ya Sapato Yesu yali alechesianga mu chisinakoki. 11 Omukhasi mulala yalimo wa esisieno sialemasia khu lwa emihika likhumi na munane. Yali wayekotamo buchwa sanyala okhukololokha ta. 12 Lwa Yesu yamulengela wamulanga, wamusungila ari, “Mukhasiwe, wuhonisibwe obulema bubwo.” 13 Kho Yesu wamurakho omukhono wakololokha abwene na abwene, mani wafumia Wele.
14 Nebuchwa omukhongo wa sinakoki se yewulila obulayi ta sikila Yesu yali wuhonisie yinyinga ya Sapato. Wasunga ari, “Chiwo chinyinga sasaba cha okhukhola emilimo. Mwiche mu nyinga chene echo muhonisibwe, yilali mukhecha mu nyinga ya Sapato ta.”
15 Omwami wamukalusia wasunga ari, “Enywe abachinia! Buli sia mulala wenyu se yekulilanga ying'ombe naho epunda yiye yinyinga ya Sapato mani ayiyila okhunywa amachi ta? 16 Omukhasi wuno, yesi wa olwibulo lwa Aburahamu, Sietani khamulemasia khu mihika likhumi na munane. Se buli obulayi okhumuhonia okhurula mu obutinyu bubwe yakhaba ne yili yinyinga ya Sapato?”
17 Lwa yasunga amakhuwa kano chisoni chatiila abasiku baabe, nebuchwa abandu bekhoyela amakhuwa ka okhuhukia ka yali nakholile.
Epimbi ya yimo ya haratali nende ya limela
(Matayo 13:31-33; Mariko 4:30-32)
18 Kho Yesu wasunga ari, “Obwami bwa Wele bubeele burie? Enyala nabulekhasia nende siina? 19 Bubeele khuli yimo ya haratali, ya omundu yacha waraka musituti siisie. Mani yamela yakhulundua kwakwa omusaala khandi amanoni kombakha ebichwi khu chisakia chakwo.”
20 Khandi wareeba ari, “Enyala okhulekhasia obwami bwa Wele nende siina? 21 Bubeele khuli amamela ka omukhasi yabukula watubania mu esikelo esikali sia obusie, nabwila kakhola bwosi bwafwimba.”
Omuliango omunyiki
(Matayo 7:13-14; 21-23)
22 Kho Yesu wachililila nende oluchendo lulwe lwa okhucha Yerusalemu, wabira mungoba nende mu birekere ne yechesia. 23 Omundu mulala wamureba ari, “Omwami, abandu batiti buchwa nibo balahonisibwa?”
Wakalusia wabasungila ari, 24 “Khaka wingilile mu muliango omunyiki. Sikila endakhusungilanga, abakali bakhakhake okhwinjila mani se bakhanyale ta. 25 Lwa mwene yinju akhabuukhe yekaleo omuliango. Mukhasinjile elwanyi ne mukhong'onda omuliango ne musunga muri, ‘Omwami, khwikulilekho omuliango.’ Naye akhamukalusie asunge ari, ‘Esie se emumanyile ta, naho wa murula ta.’ 26 Kho mukhasunge muri, ‘Khwalichanga ne khunywa ninawe, khandi wechesianga munjila cha mungoba chefu.’
27 “Nebuchwa akhakalusie ari, ‘Endamusungilanga, se emumanyile enywe ta, naho wamurula. Rula hano, enywe mwesi mu kholanga esifwabi!’
28 “Abwenaho mukhalile namwilumaka ameno, lwa mukhalengele Aburahamu, Isaka, Yakopo nende abang'oosi boosi mu obwami bwa Wele, nebuchwa enywe mwabene musukunwe elwanyi. 29 Khandi abandu bakharule ebukwe nende mumbo, abandi ebunaswa nende siafubo, bakhekhale mwikhoyo mu obwami bwa Wele. 30 Bwa toto, balala baho bali abamalilisi bakhabe ba okhuranga, ne ba okhuranga bakhabe abamalilisi.”
Yesu alilila Yerusalemu
(Matayo 23:37-39)
31 Yisa yeneyo Abafarisayo balala beecha khu Yesu bamusungila bari, “Rula abundu hano oche ahandi, sikila Heroti alenyanga okhukhwira.” 32 Wabakalusia ari, “Cha musungile esibwe silia muri, ‘Lengela, endakhuma ebisieno nende okhuhonia abandu bulano nende muchuli, ne yinyinga ya khataru ekhabe nimalile emilimo kianje.’ 33 Kakhaba kario, endachilila nende oluchendo lwanje bulano, muchuli nende busiayo, sikila se kanyalikha omung'oosi afwile elwanyi wa Yerusalemu ta.
34 “Oh! Yerusalemu, Yerusalemu, Olukoba lwiranga abang'oosi, khandi lupanga amachina abandu ba Wele barumwa khu yiwe. Nakhaka okhukhukara khuli yingokho yikaranga ebinywinywi biayo mu mbaha chayo, nekhali ewe se wenya ta. 35 Lengela yinju yiyo yikhawanjulukhe. Endamusungilanga semulandengela khandi ta, nabwila mulisunga muri ‘Wu nende yikhabi wulia wicha mu lira lia Omwami.’ ”