Yesu ahonia omundu yinyinga ya Sapato
14
1 Yinyinga ndala ya Sapato, lwa Yesu yacha okhulia munju ya mulala wa Abafarisayo abakhongo. Abandu bandi bali balamulengelanga kho bamukhaabekho amakhuwa. 2 Omundu yali yimbeli wuwe, yali wafwimba ofulenje nende amakhono. 3 Yesu wareeba abechesi ba amalaka ka Musa nende Abafarisayo ari, “Amalaka kafukilila okhuhonia omulwale mu yinyinga ya Sapato naho ta?” 4 Nebuchwa nibo balinya chi. Wabukula omundu wulia wamuraakho omukhono wamuhonia mani wamusungila ari yechiile yingo.5 Kho wabareeba ari, “Wina khu enywe, wunyala walekha okhurusia omwana wuwe naho ying'ombe yikwile mu obwina yinyinga ya Sapato?” 6 Nebuchwa liabakhaya se bamukalusia ta.
Epimbi ya yikhoyo ya esiselelo
7 Lwa Yesu yalengela khuli abacheni bali balarobolanga ebisala bia abundu wa olukoosi, wabasungila epimbi ari, 8 “Omundu ne akhulaanga mubucheni bwa yikhoyo ya esiselelo, okharobolanga abundu wa olukoosi ta, aundi omucheni wa oluyali okhukhubira anyala okhuba wulangilwe yesi. 9 Ne omwene obucheni wamulanga enywe mwesi yeche akhusungile ari, ‘Buukhila wuno khu sisala siene esio.’ Kho obukhe ne chisoni wikhale abundu akhali wa olukoosi ta. 10 Nebuchwa nebakhulangile mu obucheni, yikhala abundu akhali wa olukoosi ta, kho omwene obucheni yeche akhusungile ari, ‘Musale wanje, yicha wikhalile abundu abulayi hano.’ Kho okhanyoole oluyali yimbeli wa abacheni baasio. 11 Sikila buli omundu winiinia alibombisibwa, ne omundu wibombisia aliniinisibwa.”
12 Kho Yesu wasungila omundu wamulanga obucheni ari, “Ne olangiile abandu esiakhulia sia esiteere naho sia hangolobe okhalangilanga abasaale, abawaandayo naho abalebe baabo naho abachesa abayinda ta. Bakhola bario bakhulanga wesi khuli yingila ya okhukhurunga. 13 Nebuchwa ne okhola omulukha, laanga abamanani, abalema nende ababofu, 14 mani okhanyole chikhabi, sikila nibo se banyala okhukhurunga ta. Ne ewe okharungwe mwisisimukha lia abalungi.”
Epimbi ya omulukha omukali
(Matayo 22:1-10)
15 Kho mulala khu abandu bali ne bekhaale ninaye khumesa ya esiakhulia wasunga ari, “Omundu wukhalie esiakhulia mu obwami bwa Wele wubeele na yikhabi!” 16 Nebuchwa Yesu wasunga ari, “Omundu mulala yali nende omulukha omukali, walanga abandu abakali. 17 Yisa ya omulukha okhurakikha khuli yatukha, waruma omukhalabani wuwe asungile abandu balangwa ari, ‘Yicha, sikila barekekhe buli esindu.’ ”
18 “Nebuchwa buli sia mulala waabo warakikha okhurusia esifuno sikila alekhe okhucha. Wa okhuranga wasunga ari, ‘Nikulile omukunda abundu, nenyekha enje engulengele. Ne osiima wumbeele.’ ”
19 “Owundi wasunga ari, ‘Nikulile chiheyi amayoki karano, khandi nibeele khu yinjila endachichanga okhuchikhaka. Nosima wumbeele.’ ”
20 “Khandi owundi wasunga ari, ‘Nibele nende omukhasi omweya, kho se endanyala okhwicha ta.’ ”
21 “Omukhalabani wulia wakalukha wasungila omukhongo wuwe amakhuwa kano. Kho okurima kwatiila omukhongo mwene yinju wulia, wasungila omukhalabani ari, ‘Cha mungila cha olukoba bwangu osungile abamanani, abalema nende ababofu beeche.’ ”
22 “Omukhalabani wulia wasunga ari, ‘Omwami, lia osungile likholeekhe, yilali obwangu busilimo.’ ”
23 “Omukhongo wuwe wamusungila ari, ‘Cha mu chingila chingali nende chinditi osungile abandu beeche kho yinju yanje yichule. 24 Endamusungilanga, abulaho omundu yakhaba mulala khu ba nalaanga wulachanjama esiakhulia sia omulukha kwanje ta.’ ”
Sienyekha kho obe omwechi
(Matayo 10:37-38)
25 Nono lituli likali liali limulondilekho, wasiukhana wabasungila ari, 26 “Omundu yesiyesi wiicha khwisie se anyala okhuba omwechi wanje ne akhasimile esie okhubira, papa wuwe, mayi wuwe, omukhasi nende abana baabe, wandaaye baabe naho obulamu buubwe ta. 27 Wukhanyala okhuchinga omusalapa kukwe mani yandondekho, se anyala okhuba omwechi wanje ta. 28 Kaaba bari mulala wenyu, yeenya okhwombakha yinju ya ekorofa. Se alaranga yekhale hasi alengele obukusi bwa okhwombakha, kho amanye nali nende emiandu kinyala okhumala eliombakha lilia ta? 29 Nebuchwa kaaba bari alombakha omusingi mani akhaywe okhumalilisia, abandu bakulengela bakhamuchekhelele, 30 basunge bari, ‘Omundu wuno yarakikha okhwombakha mani wakhaywa okhumala.’ 31 Naho kaaba bari omwami alenyanga okhucha mwiye nende omwami wundi, akhoya okhwikhala hasi amanye ari abasikari baabe chielefu likhumi, banyala okhulwana nende ba omwami wundi wulia chielefu amakhumi kabili. 32 Ne alola ari se anyala ta, anyoanga aruma abarumwa baabe bache balombe omulembe khu omwami wundi wulia na asili sinaho. 33 Kho nono, yesiyesi wukhanyala okhulekha ebindu biibie bioosi se anyala okhuba omwechi wanje ta.
Omunyu kukhalimo omuya ta
(Matayo 5:13; Mariko 9:50)