Epimbi ya lichese liatiba
(Matayo 18:12-14)
15
1 Nono, abasololi ba emirulo nende abooni bali balesendanga wa Yesu yali okhumurekeresia. 2 Abafarisayo nende abechesi ba amalaka ka Musa basunga bari, “Omundu wuno yakanila/yenjisia abooni khandi alia ninabo.”3 Kho wabasungila epimbi ari, 4 “Omundu sina khu enywe wunyala okhuba nende amachese yimia, lilalakho litibe, wukhanyala okhulekha amakhumi sienda nende sienda khusiangalamwe ache okhukaka lilala litibile nabwila alinyola? 5 Khandi neyakhalinyola, alichinganga khwibeka mubusangafu. 6 Ne yakhakalukha yingo, alanganga abasaale nende abachesa abasungila ari, ‘Yikhoyela ninasie, sikila ninyolile lichese lianje liabele ne litibile.’ 7 Kario kario, lekha emusungile, obusangaafu obukali buliba mwikulu sikila omundu wa obwoni mulala wikaniile, okhubira amakhumi sienda nende sienda bapaaranga bari babeele abalungi khandi se benyekha okhwikanila ta.”
Epimbi ya yinyangala yitibile
8 “Naho khusunge khuri omukhasi wubeele nende chinyangala likhumi mani atibie yindala. Se alabukula etaa yeye mu yinju nayikaka nabwila akhayinyole ta? 9 Khandi ne yakhayinyola, alanganga abasaale nende abachesa abasungila ari, ‘Sangalakho ninasie, sikila ninyolile yinyangala yanje yibeele ne yitibile.’ 10 Kariokario, endamusungilanga, bulaba obusangafu bwa chingeloosi cha Wele, omundu mulala wa obwoni ne yekanila.”
Epimbi ya omwana watamana
11 Khandi Yesu wasunga ari, “Yaliho omundu wali nende abasiani babili. 12 Omutiti wasungila papa wuwe ari, ‘Papa kabukhasia emiandu wumbelesie ekianje.’ Papa wabo wabakabukhasilia emiandu. 13 Chinyinga ne chikhabira chingali ta, omusiani omutiti wabunjelesia emiandu kiikie wacha khuluchendo mu sibala sia hale. Ne ali ebweneyo wonona emiandu kiikie mu limenya lia esifwabi. 14 Neyakhamala emiandu kiikie kiosi, yinjala yingali yakwa mu sibala sia yalimo, se yali nende esiakhulia ta. 15 Kho wacha okhukaka emilimo wa omundu mulala wa mu sibala silia. Omundu wulia wamuyila mubulime bubwe kho alisienge chimbichi. 16 Wekomba okhulia ebiakhulia bia chimbichi, nebuchwa se yaliho omundu wa okhumuwa esiakhulia ta.
17 “Lwa yakalukha mu nganakani chiche, webasia ari ‘Abandu benga bakholilanga papa wanje emilimo mani balichanga ne basikasia, nebuchwa esie endafwilanga hano sikila yinjala! 18 Lekha embuukhe enje khu papa wanje emusungile endi, “Papa, esie nakhola obwoni khu Wele nende khwiwe. 19 Nono se nolana okhulangwa omwana wuwo ta. Khole buchwa khuli mulalakho wa abakhalabani baabo.” ’ 20 Kho wabuukha warakikha oluchendo lwa okhukalukha yingo waabo.”
“Ne asili sinaho, Papa wuwe wamulengela khandi wamukholela esiisa, watimaka okhucha okhumwakanila ne okhumwikwayila. 21 Omusiani wulia wasungila papa wuwe ari, ‘Papa, esie nakhola obwoni khu Wele nende khwiwe. Nono se endukha okhulangwa omwana wuwo ta.’ 22 Nebuchwa papa wuwe wasungila abakhalabani ari, ‘Reera ekanjo yindayi mumufwale, mure epete khu olwala lulwe, khandi mumufwale ofularo. 23 Muche murere esinabete siabika musinje, khulie khandi khwikhoyele. 24 Sikila omwana wanje wuno yali khuli wafwa, nebuchwa wulamukhe khandi. Yali watamana, nono wunyolekhane.’ Kho barakikha okhwikhoyela.”
25 “Ebise bilia, wandaye wuwe omukhulundu yali wuchile emukunda. Ne alachelelenga wahulila chinyimbo nende obukhino yingo. 26 Walanga mulala wa abakhalabani wamureba siali ne silakholekhanga. 27 Omukhalabani wamusungila ari, ‘Wandayo wuchelele, papa wuwo wakhasinja esinabete siabika, sikila amwakanile ne asili omulamu.’ 28 Okurima kwamutila, waloba okhwingila mu yingo. Papa wuwe warula elwanyi okhumwikongochela yengile mu yingo. 29 Nebuchwa wasungila papa wuwe ari, ‘Lengala, emihika kino kioosi esie nakhukholela khuli omukhalabani wuwo, ekhalekhakho okhukhola okhulondekhana nende elienya lilio ta. Kakhaba kario okhambaakho khakhaba akhameme kha libusi kho nikhoyele nende abasaale banje ta. 30 Nebuchwa lwa omwana wuwo wuno, wonona emiandu kiikio nende abakhasi abaheyi achelele, wamusinjila esinabete siabika!’ 31 Papa wuwe wamusungila ari, ‘Mwana wanje, ewe wubele hano ninasie buli khase, buli esindu sia endi nasio esisio nisio. 32 Khukhoyele khukholele wandayo omulukha khandi khwikhoyele, sikila yali khuli wafwa mani wusisimukhe, yali watamana nebuchwa wunyolekhe.’ ”