Epimbi ya omwimelesi wukhali omusubilwa ta
16
1 Khandi Yesu wasungila abechi baabe ari, “Yaliho omuyinda mulala wali nende omwimelesi wa emiandu kikie. Likhuwa liamutukhila bari omwimelesi wuwe alononanga emiandu kiikie. 2 Wamulanga wamureba ari ‘Makhuwa sina ka esie endahulilanga khwiwe? Reera ebitabu biosi bia amanyolelo nende lirumikha lia obwimelesi bubwo, sikila se olachililila okhuba omwimelesi wanje ta.’ 3 Omwimelesi wulia wereba ari ‘Endakhola endie, sikila omukhongo wanje alasingisianga emilimo kianje? Se endi nende amani ka okhulima ta, khandi chilaba chisoni esie okhusaba saba. 4 Nimanyile lia endakhola, kho omukhongo wanje ne yasingisia emilimo, abandu balanjakanila mu chinju chaabo.’ ”5 “Kho walanga abandu boosi bali nende amakobi ka omukhongo wuwe, sia mulala, wareeba wa okhuranga ari, ‘Wu nende likobi lia omukhongo sikelo si?’ 6 Wamukalusia ari, ‘Emitungi yimia kia amafura ka amaseituni,’ Wamusungila ari, ‘Bukula esitabu sisio ohandikemo emitungi amakhumi karano.’
7 “Wareeba owundi ari, ‘Ne ewe wubeele nende likobi lia omukhongo sikelo siina?’ Wasunga ari, ‘Amakunia yimia kia yingano.’ Wamusungila ari, ‘Bukula esitabu sisio ohandikemo amakunia amakhumi munane.’ ”
8 “Omukhongo wa omwimelesi wulia wamufumia sikila yali omuchesi. Sikila abandu ba mu sibala sino babeele abachesi ne bakhalabanila amakhuwa kaabo okhubira abandu ba obuwanga. 9 Ne esie endamusungilanga, lomba obusaale khu lwa okhurumikhila obuyinda bwa mu sibala muno, kho lwa buwao, munyole okhwakanilwa mu limenya lia mindali.”
10 “Wulia wunyala okhusubilwa mu esindu sititi anyala okhusubilwa nende ebikali, na wulia wukhasubilwa khu bititi ta, se anyala okhusubilwa nende ebikali ta. 11 Ne kaaba bari se onyala wasubilwa mu obuyinda bwa khu sibala ta, wina wulakhusubila nende obuyinda bwa toto? 12 Ne kaaba bari se onyala okhusubilwa nende esindu sia owundi ta, wina wulakhuwa esiisio?”
13 “Abulaho omukhalabani wunyala okhukholela emilimo abakhongo babili ta, sikila alabiyila mulala mani asime owundi, naho alaria mulala na owundi amulekelesie. Se munyala mwarumikhila Wele nende emiandu ta.”
Amalaka nende obwami bwa Wele
(Matayo 5:18-32; 6:24; 11:12-13)
14 Abafarisayo, bali ne bayanja emiandu, lwa bahulila amakhuwa kano bamuchekhelela ne bamuleka. 15 Wabasungila ari, “Enywe mubeele abandu ba okhwikhola okhuba abalungi yimbeli wa abandu, nebuchwa Wele wamanya emioyo kienyu. Sikila ebindu bilolekha okhuba bia obukhala mu chimoni cha abandu, bibeele lisinye mu chimoni cha Wele.”
16 “Amalaka ka Musa nende amakhuwa ka abang'oosi karumikha nabwila Yohana yecha. Okhurulila abwenaho, Likhuwa Lilayi lia obwami bwa Wele liayelwachibwa, ne buli omundu arumikhilanga amani okhwingilamo. 17 Nebuchwa bubeele obwangu likulu nende esialo okhuwao okhukhila enyukuta ndala ya amalaka okhurusibwaho.
18 “Buli omusaacha wulekhana nende omukhasi wuwe mani ayile owundi, akhola obuheyi, khandi omundu wuyila omukhasi walekhana nende omusacha wuwe yesi akhola obuheyi.
Omundu omuyinda nende Lasaro
19 “Yaliho omundu omuyinda, wafwalanga chingubo chindayi cha obukusi bwa hekulu, khandi yamenyanga limenya lilayi. 20 Omundu bari Lasaro, walichingi omumanani khandi yali nende amakonjo, yekhalanga mu silibwa sia omuyinda wulia. 21 Lasaro yekombanga okhutola ebitonye bia esiakhulia biakwichanga okhurula khu emesa ya omuyinda wulia. Chimbwa choosi chechanga nechikhomba mumakonjo kaake.
22 “Ebise biatukha omumanani wulia wafwa, chingeloosi cheecha chamubukula chamuyila wa Aburahamu yali. Omundu omuyinda wulia yesi wafwa bamuyabila. 23 Lwa yali mu esinyasio emakombe, wachinga chimoni walengela Lasaro wa Aburahamu yali. 24 Kho walanga ari ‘Papa Aburahamu, kholelekho esisa mani orume Lasaro atonge olwala lulwe mu amachi yeche yandonyisie khu olulimi lwanje, sikila nibeele mu obuchuni obukali mu omulilo kuno.’
25 “Nebuchwa Aburahamu wamusungila ari, ‘Mwana wanje, yichulila ori, mu obulamu bubwo khu esialo wanyola ebindu ebilayi, kariokario Lasaro yanyola ebindu ebibi. Nebuchwa bulano alahulukhanga, ne ewe wubeele mu esinyaasio. 26 Khandi obwina obukali bubeele akarikari wefu, kho abandu bali olubeka luno se banyala okhwambukha becha wa oli ta, naho abandu okhurula olubeka lwenyu bambukhe beeche yino ta.’
27 “Wamukalusia ari, ‘Nono endakhusabanga, papa Aburahamu, ruma Lasaro mu yinju ya papa wanje 28 sikila nibeele nende wandaye banje barano. Lekha abakambile bakhakhola bario beecha abundu wa esinyasio hano ta.’ ”
29 “Nebuchwa Aburahamu wamukalusia wasunga ari, ‘Babeele nende ebitabu bia Musa nende abang'oosi, lekha balonde ka bisunga.’ ”
30 “Wamukalusia wasunga ari, ‘Tawe papa Aburahamu, omundu warula mu abafu wabasungila balasubila mani bekanile.’ ”
31 “Aburahamu wamukalusia wasunga ari, ‘Ne bakhahulila ka Musa nende abang'oosi basuunga ta, se balahulila omundu wundi ta, yakharula mu abafu.’ ”