Wukhwinjisia mu obwoni walamwa
(Matayo 18:6-7; 21-22; Mariko 9:42)
17
1 Yesu wasungila abechi baabe ari, “Bwa toto, amakhako ka okhukhola obwoni kalecha, nebuchwa sibeele esilamo khu omundu wulakarera! 2 Bwakhabele obulayi omundu mweneyo bamubohe olukina mu liikosi mani bamusukune mu yinyanja, okhukhila akhole abatoro bano bakhole obwoni. 3 Rekeresia obulayi, kaba bali wandayo akhola obwoni, mukondekhele, mani nayekanila omubeele. 4 Ne yali nakhukholele amabi amakhabi musafu khu nyinga ndala, mani wakalukha amakhabi musafu nasunga ari ‘Mbeele,’ okhoyela wamubeela.”Amani ka lisubila
5 Abarume basungila omwami bari, “Niinia lisubila liefu!” 6 Omwami wabasungila ari, “Mubanga bari mubeele nende lisubila lititi khuli yimo yinditi ya haratali, mwakhasungile omukhuyu kuno muri, ‘Siukha oche wiraake mu yinyanja,’ mani kwakhakholile khuli musungile.
Emilimo kia omukhalabani wukhali nende obukhala ta
7 “Khusunge khuri, mulala wenyu wubele nende omukhalabani wumulimilanga ne okhwaya amachese. Neyakhachelela, anyala wamusungila ari, ‘Yicha khulie fwesi khu emesa khuno’? 8 Se kali kario ta. Alamusungila ari, ‘Teekha esiakhulia sia hangolobe, khandi wirekekhe wiche otende emesa yanje esie ne endia nende okhunywa. Ne nakhamala kho ewe olie nende okhunywa.’ 9 Anyala wasungila omukhalabani ari orioo sikila wukholile ka asungile ari akhole? 10 Kho enywe mwesi, nimwakhamala okhukhola ka musungilwe mukhole, sunga muri, ‘Efwe khubeele abakhalabani khukhali nende obukhala ta, khukholile buchwa emilimo kiefu.’ ”
Yesu ahonia abandu likhumi ba amachele
11 Yesu ne asili khuluchendo lwa okhucha Yerusalemu, wabira akarikari wa ebitonye bia Samaria nende Kalilaya. 12 Lwa yali nalenjilanga mu sirekere silala, wakanana nende abandu likhumi ba amachele, bali basinjile sinaho. 13 Basungila yesu nende emioyo kia ekulu bari, “Yesu, Omwami, khukholele esiisa.” 14 Lwa Yesu yabalengela wabasungila ari, “Muche mwiyechesie yimbeli wa abasaayi.” Ne balachichanga bahona.
15 Kho mulala wabo khuli yalengela ari wuhonile, wakalukha ne alafumianga Wele nende omwoyo kwa ekulu. 16 Wacha wekwisia mu ebilenje bia Yesu, wamupila orioo. Naye yali Omusamaria.
17 Yesu wakalusia wasunga ari, “Se babeele abandu likhumi bahonisibwe ta? Abandi sienda babeele hena? 18 Se anyolekhemo mulala wa okhwicha afumie Wele nekhali omucheni wuno?” 19 Kho wamusungila ari, “Singila oche, lisubila lilio likhuhonisie.”
Elicha lia obwami bwa Wele
(Matayo 24:23-28, 37-41)
20 Yesu ne yakharebwa nende Abafarisayo yinyinga ya obwami bwa Wele bukhechele, wabakalusia ari, “Obwami bwa Wele se bulecha nende ebiechesi bia mulengela ta. 21 Naho muhulile abandu nibasunga bari, ‘Lengela, bubeele hano.’ naho, ‘Halia,’ sikila, lengala, obwami bwa Wele bubeele akarikari wenyu.”
22 Khandi wasungila abechi babe ari, “Chinyinga chilechanga cha mukhekombe ndalakho ya chinyinga cha Omwana wa Omundu, nebuchwa se mukhayilengele ta. 23 Khandi bakhamusungile bari, ‘Lengela, wubeele halia!’ Naho ‘Lengela, wubeele hano!’ Mukharula elwanyi naho mukhabalondakho ta. 24 Sikila kakhabe khuli oluheni lurubulanga obuwanga mumaleesi okhurula olubeka lulala nebucha olubeka lundi, kho kakhabe kario mu yinyinga ya Omwana wa Omundu. 25 Nekhali akhabisibwe mu esinyasio mbele khandi eselukho yino yimulobe. 26 Khuli buchwa kali mu chinyinga cha Noa, kakhabe kario mu chinyinga cha Omwana wa Omundu. 27 Abandu balichanga ne banywa, nebayilana, nabwila Noa yengila mu eliaro likali mani yifula ya emikhuura yecha yabeera boosi.
28 “Kakholekha kariokario mu chinyinga cha Loti. Abandu balichanga ne banywa, bakulanga ne bakusia, khandi barakanga ne bombakha. 29 Nebuchwa yinyinga ya Loti yarulila Sotoma omulilo omukali kwarula mwikulu kwabeera boosi.
30 “Kakhabe kariokario yinyinga ya Omwana wa Omundu akhechele. 31 Yinyinga yene eyo, omundu wukhabe ne aninile khu olusuli lwa yinju, mani esindu sisie sibeele mukari, se akhekhe asibukule ta. Kakhabe kario nende omundu wuli emukunda, se akhakalukha yingo ta. 32 Mwichulila omukhasi wa Loti? 33 Yesiyesi wulakhaka okhuhonia obulamu buubwe alabutibia, yilali wulia wulatibia obulamu buubwe alanyola obulamu bwa mindali. 34 Endamusungila, yinyinga yilia babili bakhabe bakonile mu esitanda silala. Mulala akhabukulibwe na owundi alekhwe. 35 Abakhasi babili bakhabe balasielanga halala. Mulala akhabukulibwe ne owundi alekhwe. 36 (Abasacha babili bakhabe balakholanga emilimo mu omukunda halala. Mulala akhabukulibwe ne owundi alekhwe.)”a
37 Bamureeba bari, “Omwami kano kakhekholekhe hena?” Wabakalusia ari, “Wa emibili kia abafu kili, chingosia chibusiangaho.”