Lireeba khu bunyali bwa Yesu
(Matayo 21:23-27; Mariko 11:27-33)
20
1 Yinyinga ndala, Yesu yali alechesianga abandu mu litembeli nayelwacha Likhuwa Lilayi. Abasaayi abakhulundu nende abechesi ba amalaka ka Musa halala nende abasakhulu Abayahuti beecha wa yali. 2 Bamusungila bari, “Khusungile olakholanga amakhuwa kano mu obunyali sina? Wina wakhuwa obunyali buno?”3 Yesu wabakalusia wasunga ari, “Siesi endamureebakho lireeba. Musungile, 4 lipatiisia lia Yohana liarula mwikulu naho khu abandu?”
5 Mani barakikha okhureebana mulala khu wundi, basunga bari, “Ne khusunga khuri ‘Liarula mwikulu,’ alasunga ari, ‘Sina sikila mwalekha okhumusubila?’ 6 Nebuchwa khwasunga khuri, ‘Liarula khu abandu,’ abandu boosi balakhupa amachina bakhwire, sikila basubila bari Yohana yali omung'oosi.”
7 Kho bamukalusia bari, “Se khumanya wa liarula ta.”
8 Yesu wabasungila ari, “Siesi se endamusungila mu obunyali sina bwa ekholanga amakhuwa kano ta.”
Epimbi ya abakotisi ababi ba esituti sia amasapipu
(Matayo 21:33-46; Mariko 12:1-12)
9 Yesu warakikha okhusungila abandu epimbi yino, “Omundu yaraka esituti sia amasapipu, wakotisia abalimi bandi mani wacha mu esibala sindi wamenyayo oluhono. 10 Ebise bia okhuchesa khuli biatukha, waruma omukhalabani wuwe khu abalimi bakotisia ari bamuwekho amatunda. Nebuchwa khuli omukhalabani yatukhayo, abalimi balia bamukhupa khandi bamutimania mu emikhono emitaka. 11 Khandi waruma omukhalabani wundi. Nebuchwa bamukhupa yeesi khandi bamukhosia chisoni, bamutimania mu emikhono emitaka. 12 Khandi waruma omukhalabani wa khataru. Wuno yesi bamukhupa amakuma mani bamusukuna elwanyi.
13 “Omwene situti wulia wasunga ari, ‘Endakhola endie? Endaruma omwana wanje omusiime, wakana balamuwa liria.’
14 “Nebuchwa lwa abalimi balia bamulengela basungana bari, ‘Wuno niye wukhalie emiandu kia mwene esituti sino. Lekha khumwire kho esituti sino sibe siefu.’ 15 Kho bamurusia elwanyi wa esituti bamwira.
“Nono omwene situti silia alabakhola arie? 16 Alecha yere abalimi bakotisia balia mani ahelesie esituti khu abandu bandi.” Lwa abandu bahulila kano, basunga bari, “Kakhaba kario ta!”
17 Nebuchwa wabalengela mumoni chaabo wareeba ari, “Nono lihandiko lino lisunga liri sina?
‘Lichina lia abombakhi baloba
nilio liakhekela lia okhwiyikina khu yinju.’
18 “Omundu yesiyesi wukwa khwichina lino alafunikhakamo ebitonye, na yesiyesi wa lilakwakho, lilamutubundula.”
19 Abechesi ba amalaka nende abasaayi abakhulundu benya bari bamutiile abwene na abwene, sikila bamanya bari yasunga epimbi yilia okhubekicha nibo. Nebuchwa baria abandu.
Okhurunga emirulo khu omuruki Kaisaria
(Matayo 22:15-22; Mariko 12:13-17)
20 Kho abechesi ba amalaka ka Musa nende abasaayi abakhulundu yabo balondolesia chingila cha Yesu, baraakho abakhabilisi bekhola okhuba abalayi kho bamutile. Benya bamutiile khu lia alakaya mani bamuhane mu emikhono kia kabana. 21 Bamureeba bari, “Omwechesi, khwamanya khuri olakayanga ne wechesia kali toto, khandi se oyekhelanga olubeka lulala ta. Nebuchwa wechesianga yinjila ya Wele okhulondekhana nende bwa toto. 22 Khusungilekho, khulaba mu lilaka ne khurunga emirulo khu Kaisaria naho ta?”
23 Yesu wamanya omureko kwabo wabasungila ari, 24 “Njekesie yinyangala ya etinari. Epicha nende elira lilikho bia wina nibio?”
Basunga bari, “Bia Kaisaria nibio.”
25 Wasunga ari “Muhelesie Kaisaria ebindu bia Kaisaria, ne muhelesie Wele ebindu bia Wele.”
26 Bakhaywa okhumutila khu kayalakaya yimbeli wa abandu, nebuchwa bahuka khumakalusio kaake, balinya buchwa.
Lireba okhulondekhana nende lisisimukha
(Matayo 22:23-33; Mariko 12:18-27)
27 Balalakho ba Abasetukayo bakhasubilanga mwisisimukha ta beecha khu Yesu nende lireba. 28 Bamureeba bari, “Omwechesi, Musa yakhuhandikila ari, omusacha alafwa walekha namulekhwa ne akhebula ninaye ta, omusiani waabo akhoya akalusie namulekhwa yebubulile wandaye wuwe abana. 29 Nono, baliho abawandaye musafu. Wa okhuranga wayila mani wafwa ne akhebulakho ta. 30 Wakhabili wakalusia namulekhwa mani yesi wafwa ne akhebula ninaye ta. 31 Wakhataru yesi wakalusia namulekhwa wulia, kaaba kariokario, musafu balia bafwa boosi ne bakhebulakho omwana ninaye ta. 32 Olumalilisi, omukhasi wulia yesi wafwa. 33 Nono mwisisimukha omukhasi wuno akhabe wa wina? Sikila boosi musafu bali bamuyila khuli omukhasi.”
34 Yesu wabakalusia wasunga ari, “Abandu ba eselukho yino bayilananga. 35 Nebuchwa abandu bakhoolane okhusisimukha nende okhumenya mu chinyinga chilecha se bakhayilane ta. 36 Nibo se bakhafwe khandi ta, sikila babeele khuli chingeloosi, khandi babeele abana ba Wele, ba yasisimusia. 37 Nebuchwa khu amakhuwa ka lisisimukha, yakhaba Musa yechesia abuwanga, lwa esichakha siaburukhila omulilo, lwa yalangila Omwami, ‘Wele wa Aburahamu, Wele wa Isaka nende Wele wa Yakopo.’ 38 Nono, se ali Wele wa abafu ta, nebuchwa Wele wa abalamu, sikila khu Wele boosi babeele abalamu.” 39 Kho balalakho ba abechesi ba amalaka ka Musa basunga bari, “Omwechesi, wulakaye obulayi.” 40 Sikila si bali banyale okhureba amarebo kandi ta.
Kristo wubeele Omwana wa Tauti
(Matayo 22:41-46; Mariko 12:35-37)
41 Yesu wabareeba ari, “Banyala basunga bariena bari kristo wubeele omwana wa Tauti? 42 Sikila Tauti omwene asunga mu esitabu sia Sapuri ari,
‘Omwami yasungila Omwami wanje ari,
Yikhala olubeka lwa omukhono kwanje omusacha.
43 Nabwila ekhakhole abasiku baabo
baabe emesa ya okhurakho ebilenje biibio.’
44 “Khwako, Tauti amulanganga ‘Omwami,’ kho kanyalikha karie kristo abe omwana wuwe?”
Mukhalonda abechesi ba amalaka ka Musa ta
(Matayo 23:1-36; Mariko 12:38-40; Luka 11:37-54)
45 Wasungila abechi baabe abandu boosi nebalahulilanga ari. 46 “Mukhalonda emiima kia abechesi ba amalaka ka Musa ta. Bayanja okhufwala chikanjo khandi bayanja okhukhesibwa na liria yimbeli wa abandu mu chisoko. Bayanja okhwikhala khu ebisala bia oluyali mu chisinakoki nende abundu wa olukoosi mu yikhoyo. 47 Barumikhilanga obubacha ne banula namulekhwa ebindu biabo, ne bekhola okhusaya amasaya amarambi. Bakhakhalakilwe obululu okhubira abandu boosi.”