Sakayo aba omulondi wa Yesu
19
1 Yesu wenjila Yeriko ne ali khuluchendo lulwe lwa okhucha mu olukoba lwa Yerusalemu. 2 Omundu yalimo bari Sakayo, omukhongo wa abasololi ba emirulo, khandi yali omundu omuyinda muno. 3 Yali alakhakanga ari alengele Yesu, nebuchwa lituli liali likali se yali anyale ta, khandi yali omundu omwimbikiti. 4 Kho watimaka yimbeli wanina khu omusala omukhuyu kho alengele Yesu, sikila yali alabirire abwene yaho.5 Lwa Yesu yatukha abundu wa Sakayo yali, walengela hekulu wamusungila ari, “Sakayo yikha khu omusala bwangu sikila bulano endacheniya ewuwo.” 6 Kho Sakayo wekha okhurula khu omusala bwangu wakaanila Yesu mu obusangafu.
7 Lwa abandu boosi balengela barakikha okhwing'ulung'unya bari, “Wuchile okhuba omucheni wa ‘Omwoni.’ ” 8 Nebuchwa, Sakayo wasinjila wasungila Omwami ari, “Omwami, lengela, enusu ya emiandu kianje endahelesia abamanani. Na kaaba bari nanuula omundu esindu siosisiosi, endamukalusilia esikelo silia okhwola khane.”
9 Yesu wamusungila ari, “Bulano obuhonia butukhile mu yinju yino, sikila omundu wuno yesi arula mu olwibulo lwa Aburahamu. 10 Sikila Omwana wa Omundu yeecha okhukaka nende okhuhonia batiba.”
Epimbi ya abakhalabani likhumi
(Matayo 25:14-30)
11 Lwa bali ne balarekeresianga amakhuwa kano, wachililila okhubasungila epimbi, sikila yali wimbiye Yerusalemu, khandi abandu bali balapaaranga bari obwami bwa Wele bulatuukha mu ebise biosibiosi. 12 Wabasungila ari, “Yaliho omukhongo wali ne alachichanga khu oluchendo mu esibala sia hale kho arobolwe okhuba omwami mani akalukhe. 13 Walanga abakhalabani baabe likhumi, wabawa buli sia mulala eminaa ndala. Wabasungila ari, ‘Rumikhila chisilingi chino okhukhola ebiashara nabwila endikalukha.’ ”
14 “Nebuchwa abandu ba mu esibala siisie bali bamubiyila, baaruma abarume bamusungile bari, ‘Efwe se khwenya omundu wuno abe omwami wefu ta.’ 15 Kakhaba kario, bamukhola omwami mani wakalukha yingo. Kho warumania ari balange abakhalabani baabe likhumi ba yawa chisilingi kho amanye obukhala bwa bali nebanyolile mu biashara biabo.”
16 “Wa okhuranga wecha wasunga ari, ‘Omwami chimina chicho chireerile obukhala bwa chimina chindi likhumi.’ 17 Wamusungila ari, ‘wukholile obulayi, ewe omukhalabani omulayi! Sikila wusubilwe nende sititi, olaba omwami wa chingoba likhumi.’ 18 Wa khabili wecha wasunga ari, ‘Omwami, chimina chicho chireerile obukhala bwa chimina chindi birano.’ 19 Wamusungila ari, ‘Olaba omwami wa chingoba chirano.’ 20 Owundi wecha wasunga ari, ‘Omwami, akhamina khakho ngo akhano, nakhakanyila obulayi musitambaya nabiikha hale, 21 sikila nakhuria, ewe wubeele omundu omululu. Obukulanga wa okharere ta khandi ochesanga wa okharaaka ta.’ 22 Wamusungila ari, ‘Endakhukhalakila okhurula khu amakhuwa kaako, wubele omukhalabani omubi muno! Se wamanya ori esie nibeele omululu ta khandi embukulanga wa ekhareere ta, ne enjesanga wa ekharaaka ta? 23 Sina siakila walekha okhubukula chisilingi chanje ore mwibikhilo kho nengalukha enjibukule nende obukhala?’ 24 Wasungila abandu bali ne basinjileo ari, ‘Bukula akhamina kha ali ninakho muhelesie wa chiminalikhumi.’ 25 Bamusungila bari, ‘Omwami, wubele nende chimina likhumi khale!’ 26 Wakalusia ari, ‘Endamusungilanga, buli sia mulala wuli ninabio, balimutasa ebindi ebikali, nebuchwa wukhali nabio ta, yakhaba sititi sia ali ninasio bakhamunule. 27 Nebuchwa khu basiku banje bano, bandoba esie okhuba omwami waabo, barere hano mani mubachinje yimbeli wanje.’ ”
Okhwinjila Yerusalemu mu obusangafu.
(Matayo 21:1-11; Mariko 11:1-11; Yohana 12:12-19)
28 Yesu ne yakhamala okhulakaya amakhuwa kano, wachililila nende oluchendo lulwe lwa okhucha Yerusalemu. 29 Neyakhatukha ahambi wa Petifake nende Petania, khu esikulu sia balanganga bari, Miseituni, waruma abechi baabe ne asunga ari, 30 “Cha mu esirekere sili yimbeli wenyu, ne mulengilangamo mulanyola epunda yimbukha bayibohile, yikharumikhwakho nende omundu ta. Yikangulule muyirere hano. 31 Omundu yesiyesi namureeba ari, ‘Sina sikila ne mulayikangululanga?’ Musungile muri, ‘Omwami wenyile okhuyirumikhila.’ ”
32 Kho be baruma, baacha bayinyola khuli yali ne abasungile. 33 Ne balayikangululanga, abeneyo bareeba bari, “Sina sikila enywe namulakangululanga epunda yeneyo?” 34 Babakalusia babasungila bari, “Omwami yenya okhuyirumikhila.”
35 Bayireera wa Yesu yali, khandi bayaalakho chikanjo chaabo mani bekhasia Yesu khu omukongo kwayo. 36 Lwa yali khu epunda ne alachichanga, abandu baala chikanjo chabo khu yinjila nabirirakho.
37 Yesu ne alekhanga okhurula khu esikulu sia Miseituni, lituuli lia abechi baabe liarakikha okhufumia Wele mu obusangafu ne boopa chingalakala sikila amaya ka bali nebalengele. 38 Basunga bari,
“Abiitwe chikhabi omuruki
wicha mu elira lia Omwami!
Omulembe mwikulu
nende yifuma ya likulu!”
39 Mani Abafarisayo balalakho bali mu lituli basungila Yesu bari, “Omwechesi, kondekhela abechi baabo balinye.” 40 Wabakalusia wasunga ari, “Endamusungilanga, bano ne balinya amachina kalarakikha okhuyokela.”
Yesu walila ne akholela esisa Yerusalemu
41 Lwa yatukha ahambikiti walengela olukoba lwa Yerusamu, walulilila ne alukholela esisa, 42 wasunga ari, “Kabaanga bari ewe wamanya yinyinga ya bulano, ebindu binyala okurera omulembe! Nebuchwa biayechisa mumoni chicho. 43 Chinyinga chilecha, abasiku baabo bakhakhwinjilile khandi bakhusire chimbeka choosi. 44 Bakhakhuswalakile hasi ewe nende abana baabo bakhumenyamo. Se bakhalekhe lichina nelisingile khu lindi ta, sikila se wechulila ebise bia Wele yechelamo okhukhuhonia ewe ta.”
Yesu wakhuma bali ne balakusianga mu litembeli
(Matayo 21:12-17; Mariko 11:15-19; Yohana 2:13-22)
45 Wenjila mu oluya lwa litembeli warakikha okhukhuma abandu bali ne balakusiliangamo. 46 Wabasungila ari, “Liahandikwa, ‘Yinju yanje yilaba yinju ya okhusaya,’ nebuchwa enywe mwayikhola okhuba ‘libina lia abefwi.’ ”
47 Khandi buli yinyinga yechesianga mu litembeli. Nebuchwa abasaayi abakhulundu, abechesi ba amalaka ka Musa, nende abemelesi baandi, balia echamu ya okhumwira. 48 Nebuchwa se banyala okhunyoola obwiyangu bwa okhukhola bario ta, sikila abandu abakali bali bamusirire ne benya okhurekereesia amakhuwa kaake.