Yesu aruma abechi amakhumi musafu na babili
10
1 Yinyuma wa kano, Omwami warobola abandi amakhumi musafu na babilia, wabaruma bache yimbeli wuwe, babili babili, bache buli mu esirekere nende chingoba cha yenya okhuchamo. 2 Wabasungila ari, “Lichesa libeele likhongo, nebuchwa abakhalabani babeele batiti. Kario saya Omwami mwene lichesa arume abakhalabani mu omukunda kukwe. 3 Rekukha muche, lengela endamurumanga khuli ebimeme bia amachese mu ebibwe. 4 Mukhachinga chisendi, esikapu naho ofularo ta, khandi mukhasinjila khungila nemukhesia abandu ta.5 “Yinju yosi yosi yamwinjilamo, musunge muri, ‘Omulembe kube munju muno!’ 6 Niiba ambo omundu wa omulembe wumo, omulembe kwenyu kulaba ninaye. Nebuchwa namunyoola omundu wukhali wa omulembe ta, omulembe kwenyu kulamukalukhila. 7 Mumenye munju mwenomu, nemulia nokhunywa siabalamuwa, sikila omukhalabani akhoya omurungo. Mukhayiyayiya nemurula munju yino nemucha muyindi ta. 8 Lwa mwinjila mulukoba mani bamwinjisia, lia sia balamuwa. 9 Muhonie abalwale balimo mani mubasungile muri, ‘Obwami bwa Wele bwichile ahambikiti ni nanywe.’ 10 Nebuchwa, nemucha mulukoba mani baloba okhumwinjisia, muche khu yinjila chaabo mani musunge muri, 11 ‘Yakhaba olufumbi lururile mulukoba lwenyu lwahanda khubilenge biefu khula mu sisimulilanga khuli yingani khu enywe. Nebuchwa mwichulile muri, Obwami bwa Wele bubeele ahambikiti.’ 12 Lekha emusungile, yinyinga ya likhalaka, olukoba lulia lukhanyole esinyasio esikali okhubira sia Sotoma.
Chingoba chikhasubila mu Yesu ta
(Matayo 11:20-24)
13 “Ne esinyasio khu enywe abandu ba Korasini! Ne esinyasio khu enywe abandu ba Betesaita! Sikila kaba bari amaya kakholekha mwinywe, niko kakholekha Tiro nende Sitoni, andi befwala amakunia khandi bekhala mu likokhe ne bekanila. 14 Enywe mukhanyole esinyasio esikali yinyinga ya likhalaka okhubira Tiro nende Sitoni. 15 Na ewe Kaperinaumu, wenya okhwiniinia otukhe mwikulu? Sekanyalikha ta! Okhasukunwe emakombe. 16 Yesiyesi wumurekeresia alaba wundekeresia esie, wumuloba enywe alaba wundobile esie, na wulia wundoba esie alaba wulobile wulia wanduma esie.”
Esifune sia obusangafu bwa toto
17 Abechi amakhumi musafu na babili bakalukha nebali nende obusangafu, basunga bari, “Omwami, yakhaba ebisieno bikhuriire efwe lwa khurumbure eliira lilio!”
18 Yesu wabasungila ari, “Nalengele Sietani nekhakwa khuli oluheni okhurula mwikulu. 19 Nimuhelesie obunyali bwa okhuswena khunjukha nende walute, nende obunyali khu maani ka omusiku, khandi sibulaho sinyala okhumusalisia. 20 Kakhaba kario, mukhaba nende obusangafu sikila ebisieno bimuriire ta, yilali mube nende obusangafu sikila amera kenyu kahandikwa mwikulu.”
Obusangafu bwa Yesu
(Matayo 11:25-27; 13:16-17)
21 Mubisee biene bilia Yesu wechula obusangafu burulana nende Roho Omutakatifu, wasunga ari, “Orio muno Papa, Omwami wa mwikulu nende esialo, sikila wakisa amakhuwa kano khu abasicha nende abachesi, mani wafunulila abana abatiti. Yee Papa, kano niko kakhusimisia. 22 Nahelesibwa buli esindu nende Papa wanje, abulaho wumanyile Omwana, yilali Papa, khandi abulaho wumanyile Papa yilali Omwana, nende yabo ba Omwana yarobola ari abafunulile.”
23 Wasiunikhanila abechi baabe wabasungila mubwikisi ari, “Chimoni chilengela ka enywe mulengelanga chibeele na yikhabi. 24 Sikila lekha emusungile, abang'oosi nende abaami abakali bekomba okhulengela ka enywe mulengela yilali sibakalengela ta, bekomba bari bahulile ka enywe muhulilanga yilali sibakahulila ta.”
Epimbi ya Omusamaria omulayi
25 Omwechesi wa amalaka wecha okhutema Yesu, wasunga ari, “Omwechesi, ekhole sina kho enyole obulamu bwa mindali?”
26 Yesu wamusungila ari, “Amalaka ka Musa kasunga kari sina? Ohulilangao siina ne okasoma?”
27 Wamukalusia wasunga ari, “ ‘Siima Omwami Wele wuwo nende omwoyo kukwo kwosi, nende libamwoyo lilio liosi, nende amani kaako koosi nende obuchesi bubwo bwosi,’ khandi, ‘Siima omucheesa wuwo khuli wesima ewe wamwene.’ ”
28 Yesu wamukalusia ari, “Wulakaye obulayi, khola orio mani okhamenye mindali.”
29 Nebuchwa niye khulwa okhwenya okhwiyechesia wareeba ari, “Wina niye omucheesa wanje?” 30 Yesu wamukalusia wasunga ari, “Omundu yali alekhanga okhurula Yerusalemu nacha Yeriko, wakanana nende abefwi, bamufwalula chingubo khandi bamukhupa mani bamulekha nakana okhufwa. 31 Ebise bilia Omusaayi yali alabiranga khu yinjila yilia, lwa yamulengela wabirira olubeka lundi lwa yinjila. 32 Kho, kariokario, omukhalabani wa mu litembeli, wa olwibulo lwa Lebi yesi wecha. Lwa yamulengela, wabirira olubeka lundi lwa yinjila. 33 Nebuchwa, Omusamaria yali khuluchendo, lwa yatukha wa omundu wulia yali, wamulengela wamukholela esisa. 34 Wacha wa yali, wachukha amafura nende yindali khu makuma kaake, mani wakaboa. Wamura khu punda yiye wamuyila mu yinju ya abacheni mani wamulinda obulayi. 35 Yinyinga yalondakho wabukula chitinari chibili wahelesia omulindi wa yinju yilia nasunga ari, ‘Linda omundu wuno, na lwa ekhakalukhe, siosi siosi sia olarumikhila sibira esikelo sia ekhuhele ekhakhurunge.’ 36 Nopaara, ni wina khu abandu bataru bano wechesia okhuba omucheesa wa omundu wa abefwi boopa?” 37 Wamukalusia wasunga ari, “Omusamaria wamukholela esisa.” Yesu wamusungila ari, “Ewe wesi, cha okhole orio.”
Yesu achendelelela Marita nende Maria
38 Yesu nende abechi baabe lwa bali khuluchendo lwabo, benjila mu esirekere sindi. Omukhasi mulala bari Marita wamwinjisia munju yiye. 39 Yali nende waandaye omukoko bari Maria, wali niyekhaale abilenje bia Omwami alarekelesianga amechesio kaake. 40 Nebuchwa, Marita yali aleyuyanga khumilimo kia okhutenda abacheni. Wacha wasungila Yesu ari, “Omwami, se ololakho ori waandaye wanje wundekheele emilimo kia okhutenda abacheni sieng'ene? Musungile yeche yanjete.” 41 Nebuchwa Omwami wamusungila ari, “Marita, Marita ewe olehendekhelelanga khu biindu ebikali. 42 Nebuchwa wulekhile esindu silala sienyekha. Nisio sia Maria aroboole mani abulaho wulamunuula ta.”