Yesu yaruma abarume baabe likhumi na babili
(Matayo 10:5-15; Mariko 6:7-13)
9
1 Yesu walanga abarume baabe likhumi na babili, wabawa amani nende obunyali bwa okhukhuunga ebisieno nende okhuhonia obulwale. 2 Kho wabaruma okhwilwacha Obwami bwa Wele nende okhuhonia abalwale. 3 Wabasungila ari, “Mukhachinga esindu siosi siosi ta, yakhaba yindabusi, esikapu, esiakhulia, chisendi naho yingubo yindi ta. 4 Yinju yosi yosi yamulakanilwa, menyamo okhwola yinyinga ya mukharule mulukoba lulia. 5 Abundu hosi hosi wa mukhakanilwa ta, lwa murula mulukoba lulia, sisimula olufu khubilenje bienyu yibe yingani khubo.” 6 Baarula baacha mubirekere, nebelwacha likhuwa nende okhuhonia abalwale buli abundu.Okhwihendekhelela khwa Heroti sikila Yesu
(Matayo 14:1-12; Mariko 6:14-29)
7 Lwa omwami Heroti yahulila kali nikakholekhe, waaba nende elihendekhelela, sikila balala basunga bari aundi Yesu niye Yohana wusisimukhe okhurula mubafu. 8 Abandi bari Eliya yali wulolekhe, abandi nabo bari mulalakho wa abang'oosi yali wusisimukhe. 9 Heroti wasunga ari, “Esie nasinja Yohana namurusiakho omurwe, omundu siina wa endahulilanga nakhola amakhuwa kano?” Wenyelesia okhulengela Yesu.
Yesu waliisia abandu chielefu chirano
(Matayo 14:13-21; Mariko 6:30-44; Yohana 6:1-14)
10 Lwa abarume baabe bakalukha, basungila Yesu ka bali nebakholile. Wababukula baacha mulukoba lwa Betesaita okhwikhala bong'ene. 11 Lwa abandu bamanya, abakali bamulondakho, wabaakanila wabasungila amakhuwa ka Obwami bwa Wele khandi wahonia balia bali abalwale. 12 Eliuba liali lilakwichanga, ebise bia hangoloobe, abechi baabe beecha bamusungila bari, “Sebula abandu bache mubirekere nende mungoba chili ahambi, kho banyoole esiakhulia nende wa okhukona, sikila khubeele musichimi buchwa.” 13 Yesu wabasungila ari “Enywe bawelesie esiakhulia.” Bamukalusia basunga bari, “Khubeele buchwa nende emikati kiraano nende ching'eni chibili. Naho wenya khuche khukule esiakhulia silatukha abandu bano boosi?” 14 Sikila mu abandu baliho, abasaacha boong'ene bali batuukha chielefu chiraano.
Wasungila abechi baabe ari, “Yikhasia abandu bano mubipupu bia abandu amakhumi karaano karaano.” 15 Baakhola khuli yali nasungile, abandu boosi bekhala hasi. 16 Wabukula emikati kiraano nende ching'eni chilia, walengela mwikulu wasiima Wele. Watonyamo emikati kilia wahelesia abechi baabe kho bakabe abandu. 17 Abandu boosi baalia bekura. Abechi baabe babunjelesia ebitonye biali nabisikaale, biatukha ebikapu likhumi na bibili.
Petero warumbula Yesu okhuba Kristo
(Matayo 16:13-19; Mariko 8:27-29)
18 Yinyinga ndala Yesu yali alasayanga nali nende abechi baabe bong'ene, kho wabareeba ari, “Abandu basunganga bari esie nibeele wina?”
19 Bamukalusia basunga bari, “Balala basunga bari Yohana Omupatiisi, abandi bari wubele Eliya ne abandi nabo basunga bari mulalakho wa abang'oosi ba khale wusisimukhe.”
20 Nebuchwa Yesu wabakalusia wabareba ari, “Na enywe musunga muri esie wina?”
Petero wamukalusia wasunga ari, “Ewe wubele Kristo wa Wele.” 21 Yesu wabalakilisia ari bakhasungilakho omundu yesi yesi ta.
Yesu walakayila lifwa lilie
(Matayo 16:20-28; Mariko 8:30; 9:1)
22 Wabasungila ari, “Omwana wa omundu akhabirire musinyaasio sia ebindu ebikali. Abasakhulu, abasaayi abakhulundu nende abechesi ba amalaka ka Musa bakhamulobe, bakhamwire yilali yinyinga ya khataru akhasisimukhe.”
Chinga omusalapa kukwo olonde khu Yesu
23 Yesu wabasungila ari, “Yesi yesi wulandondakho, akhoya yeyimane amakhuwa ka esibala, abukule omusalapa kukwe yandondekho buli nyinga. 24 Sikila yesi yesi wulakhaka okhuhonia obulamu buubwe alabutibia, nebuchwa wulia wularusia obulamu buubwe sikila esie, alanyoola obulamu khandi. 25 Bukhala siina omundu okhunyoola emiandu kia khusialo kiosi mani atibie obulamu bubwe. 26 Omundu ne yakholela esie nende likhuwa lianje chisoni, Omwana wa omundu yesi akhamukholele chisoni, lwa akhakalukhe na yifuma yiye, nende ya Wele na chingeloosi chindakatifu. 27 Lekha emusungile bwatoto, baho balala basinjiile hano, sibalifwa ta, nabwila wabakhalengele obwami bwa Wele.”
Yifwani ya Yesu yakalukhana yamwekhamwekha
(Matayo 17:1-8; Mariko 9:2-8)
28 Yesu niyakhamala okhulakaya amakhuwa kano, chinyinga munane chaawa, wabukula Petero, Yohana nende Yakopo baacha khu esikulu okhusaya. 29 Lwa yali nalasayanga, mumoni mumwe mwakalukhana, chingubo chiche chamwekhamwekha. 30 Khandi abandu babili, Musa nende Eliya, balolekha balalakayanga ninaye. 31 Boosi bali balamwekhanga, balakaya khwifwa lia Yesu, liali nelilechanga okhukholekha Yerusalemu khuli liang'oolwa. 32 Petero nende abasie bali bakonile chindolo chisiro, lwa babuukha bamulengela alamwekhanga mani wusinjile nende abandu babili balia. 33 Abandu balia nebalarekukhanga, Petero wasungila Yesu ari, “Omwami, bubeele obulayi mbo efwe khubeele hano. Lekha khwombakhe ebisali bitaru, akhakho, kha Musa nende kha Eliya.” Siyali wumanyile sialasunganga ta. 34 Nasilakaya amakhuwa kano, lileesi liecha liabafunikha, oburi bwabatiila nebalengilanga mwileesi. 35 Bahulila omwoyo nekulakayila mwileesi kuri, “Wuno Omwana wanje, Omurobole wanje, mumurekeresie!” 36 Omwoyo kulia nekwakhamala okhulakaya, Yesu walolekha yeng'ene. Khwako koosi, balinya buchwa, sibalakayilakho omundu amakhuwa kabalengela tawe.
Okhuhonisibwa khwa omusiani wa esisieno
(Matayo 17:14-18; Mariko 9:14-27)
37 Yinyinga yalondakho, nebakharula khu esikulu, wakanana na lituuli lia abandu. 38 Omundu okhurula mu lituli mulia wayokela ari, “Omwechesi, endakhwisayanga endi olengelekho omwana wanje omusiani, sikila wubeele omutelwa. 39 Esisieno simwingilangamo nayopa oluhungu, simusisikhanga olufuro nalurula mumunwa kukwe. Sesilekhanga okhumunyasia ta, nono siononile obulamu bubwe. 40 Nayesayile abechi baabo basikhuume yilali bakhaywa.”
41 Yesu wasunga ari, “Lwibulo sina luno lukhali nende lisubila ta, khandi lwa chingila chimbi. Ekhekhale ninanywe ne emwikhalilikha okhutuukha lina? Rera omusiani wuwo hano.” 42 Lwa yali nalechanga esisieno silia siamupa omunyikha wakwa warakikha okhupakala. Nebuchwa Yesu wasikondekhela khandi wahonia omusiani wulia, wamwakanisia khu papa wuwe. 43 Abandu boosi bahuka khubukhongo bwa chingulu cha Wele.
Yesu alakayila lifwa lilie khandi
(Matayo 17:22-23; Mariko 9:30-32)
Lwa bali nebasihuka khu buli esindu sia Yesu yali nakholile, wasungila abechi baabe ari, 44 “Rekeresia obulayi muhulile amakhuwa kano: Omwana wa omundu wakhembia okhuchamwa mani arwe mu makhono ka abandu.” 45 Nebuchwa nibo sibamanya amakhuwa kayalakayanga ta. Kali kaachiswa khunibo, kho bakhamanya ta, khandi bali nende oburi sibamurebakho amakhuwa kano ta.
Wina Omukhongo
(Matayo 18:1-5; Mariko 9:33-37)
46 Abechi baabe barakikha okhuyingana nibeenya okhumanya wina wukhabe omukhongo akarikari waabo. 47 Yesu yali wumanyile yinganakani yali mu mioyo kiaabo, wabukula omwana wamusingisia ahambi ninaye. 48 Wabasungila ari, “Yesi yesi wulakanila omwana omutiti khuli wuno mu lira lianje alaba wunjakaniile esie, yesi yesi wunjakanila esie alaba wakaniile wanduma esie. Sikila wuli omutiti akarikari wenyu niye omukhongo.”
Wukhakhwenyela amabi ta wubele olubeka lwefu
(Mariko 9:38-40)
49 Yohana wakalusia ari, “Omwami, khwalengele omundu nakhuuma ebisieno mu elira lilio, khwamukaya, sikila sali mulala wefu ta.”
50 Nebuchwa Yesu wamusungila ari, “Mukhamukaya ta, sikila wulia wukhamwenyela enywe amabi ta, wubele olubeka lwenyu.”
Abasamaria baloba Yesu.
51 Chinyinga cha Yesu okhucha mwikulu khuli chembiya, warakikha oluchendo lwa okhucha Yerusalemu. 52 Waruma abarumwa baabe yimbeli wuwe, baacha mu esirekere sia Samaria bamurekekhela buli esindu. 53 Nebuchwa abandu sibamwakanila ta sikila bali bamanyile bari yali khuluchendo lwa okhucha Yerusalemu. 54 Lwa abechi baabe, Yakopo nende Yohana balengela kano, basunga bari, “Omwami, onyala wakhwiyamila khulange omulilo kurule mwikulu kwiche kubasambe?” 55 Nebuchwa Yesu wasiukhana wabakondekhela, 56 kho bachililila nende oluchendo benjila mu esirekere sindi.
Bakhoya okhuba abechi ba Yesu
(Matayo 8:19-22)
57 Lwa bali khuluchendo, omundu mulala wasunga ari, “Endakhulondakho hosi hosi wocha.” 58 Yesu wamusungila ari, “Ebibwe bibeele nende obwina, ne amanoni kabeele nende ebichwi, nebuchwa Omwana wa Omundu abula wa awulukhila.” 59 Wasungila owundi ari, “Nondekho.” Nebuchwa omundu wulia wamukalusia ari, “Omwami, fuchilila enje njabile papa wanje mbele.” 60 Yesu wamukalusia wamusungila ari, “Lekha abafu bayabile abafu baabo. Nebuchwa ewe cha wilwache Obwami bwa Wele.” 61 Owundi wasunga ari, “Endakhulondakho, Omwami, nebuchwa lekha esebulane nende abandu ba yinju yanje mbele.” 62 Yesu wamukalusia wasunga ari, “Omundu wurakikhanga okhulima mani akhupa amasemu siyolaana okhwinjila mu Obwami bwa Wele ta.”