Abakhasi basanga mumilimo kia Yesu
8
1 Ebise bititi nebiakhabira, Yesu wacha oluchendo nabira mungoba nende mubirekere, nayelwacha Likhuwa Lilayi lia Obwami bwa Wele. Yali nende abarume baabe likhumi na babili. 2 Abakhasi balalakho bali nibahonisibwe obulwale nende ebisieno boosi bali ninaye. Bali, Maria wabalanganga bari Makatelena, wa ebisieno musafu biamurulamo, 3 Yoanina, mukha Kusa, wali omukhalabani omukhongo wa Heroti, Susana nende abandi abakali. Barumikhilanga emiandu kiabo okhuyeta ne okhulinda Yesu nende abarume baabe obulayi.Epimbi ya amaloba ka yimo yakwamo
(Matayo 13:1-9; Mariko 4:1-9)
4 Lwa abandu bachililila okhwicha khu Yesu okhurula mungoba lukano na lukano, walakaya epimbi yino. 5 “Yaliho omulimi warula wacha okhumicha yimo yiye. Lwa yali nalamichanga echindi chaakwa khu yinjila abandu bachisenakila, amanoni kachilia. 6 Echindi chaakwa khu olwanda chamela, ori chilakhulunduanga chooma sikila sichanyola amachi ta. 7 Echindi chaakwa munyonyi ya amawa, chakhulundua ninayo, yinyonyi yakila chakhunya. 8 Echindi chaakwa mumaloba amalayi, chakhulundua mani buli yindala yaama echindi yimia.” Niyakhamala okhulakaya kano wasunga ari, “Wuli nende amarwi ka okhuhulila, akhoya ahulile.”
Esifuno sia Epimbi yino
(Matayo 13:10-17; Mariko 4:10-12)
9 Kho abechi baabe bamureeba esifuno sia epimbi yino. 10 Wasunga ari, “Enywe mwahelesibwa obuchesi bwa okhumanya amakhuwa ka obwami bwa Wele, halali khu abandu baandi endakayanga mupimbi, kho ‘Nibamoka bakhalengela ta, nibareka amarwi bakhahulila ta.’ ”
11 “Nono sino nisio esifuno sia epimbi yino: Yimo yibeele likhuwa lia Wele. 12 Yinjila ya chimo chakwakho yibeele khuli balia bahulila likhuwa lia Wele. Omusiku Sietani wecha wabukula likhuwa liene okhurula mu emioyo kiabo, kho bakhasubila mani bahonisibwe ta. 13 Olwanda lwa chimo chakwakho lubeele khuli balia bahulila likhuwa lia Wele nende obusangafu, halali sibali nende emisi ta. Basubilanga khu bisee bititi nebuchwa ebise bia amakhako balekhanga okhusubila. 14 Liloba lia yinyonyi ya amawa libeele khuli bahulilanga likhuwa, halali mwimenya liabo, bamiinwangwa nende lihenda lia obulamu, obuyinda bwa esibala nende chiraha cha limenya, nisio sikila sibatukhanga okhwama ebiamo ta. 15 Liloba lilayi lia chimo chakwamo, libele khuli bahulilanga likhuwa mubulungifu nende omwoyo omulayi, mani batinyilakho kho banyole ebiamo ebilayi mulikhalilikha liabo.”
Etaha ekhakiswa ta
(Mariko 4:21-25)
16 “Abulaho wakhisianga etaa mani ayifunikhila mundubi ta, naho ayira hasi wa esitanda, yilali ayirechanga ekulu kho boosi benjila balole obuwanga. 17 Sikila sibulaho siakukhulilwa sikhalirelwa abuwanga ta, khandi libulaho lili abwikisi likhalimanyikha mani lirelwe abuwanga ta. 18 Mwikhale meso khwako koosi kamuhulila, sikila wuli nabio, balamutasa ebindi, naye wukhali nabio ta, yakhaba sititi siali nasio bakhamunuule.”
Abawandaye ba Yesu nende maayi wuwe
(Matayo 13:18-23; Mariko 4:13-20)
19 Abawandaye ba Yesu nende maayi wuwe beecha okhumulengela, halali sibamutukhila ta sikila abandu bali abakali bali bamusirire. 20 Omundu mulala wasungila Yesu ari, “Maayi wuwo nende waandaye baabo basinjiile elwanyi, bekombile bakhulengelekho.” 21 Nebuchwa Yesu wasunga ari, “Maayi wanje nende waandaye baanje ni yabo bahulila likhuwa lia Wele nebakhola khuli lisunga.”
Yesu aholelesia oluwucho
(Matayo 8:23-27; Mariko 4:35-41)
22 Yinyinga ndala, Yesu wenjila muliaro nende abechi baabe, wabasungila ari, “Khwambukhe khuche yingelekha wa yinyanja.” Kho barekukha. 23 Lwa bali akarikari wa yinyanja, chindoolo chatiila Yesu. Oluwucho olukali lwecha lwakelula amachi ka yinyanja karakikha okhwingila muliaro, benyoola mubutinyu obukali. 24 Baacha bamubuusia bamusungila bari, “Omwami, Omwami, khulahelanga!”
Yesu wasingila wakondekhela ebikubuli bia amachi nende oluwucho ari biyenjeele, mani biayenjeela. 25 Wabareba ari, “Lisubila lienyu libeele hena?” Baaba nende oburi khandi bahuka, barebana bari, “Mundu sina wuno? Wukondekhela oluwucho nende amachi nabimuhulila!”
Yesu yahonia omundu wa ebisieno
(Matayo 8:28-34; Mariko 5:1-20)
26 Baambukha yinyanja baacha mu esitonye sia Kerasi, sili olubeka lundi lwa Kalilaya. 27 Yesu neyakharula mu eliaro wakanana nende omundu walalukha sikila yali nende ebisieno. Siyafwalanga chingubo ta, khandi siyali wamenya mu yinju ta, yilali yamenyanga mubilindwa. 28 Lwa yalengela Yesu wopamo oluhungu, wasikama yimbeli wuwe nasunga ari, “Olanjenyangakho siina, Yesu, Omwana wa Wele wa Yikulu Olukali? Endakhwisayanga okhanda khusinyasio ta.” 29 Sikila Yesu yali wukhungile esisieno sirule mu omundu wulia. Siamutilanga buli khase, yakhaba nibamubohanga emikhono nende ebilenge khuminyololo yakikitulanga, esisieno silia nesimuyila musichimi 30 Yesu wamureba ari, “Ewe wina?” Omundu wulia wasunga ari “Lechoni,” sikila ebisieno biamulimo biali ebikali. 31 Biamwisaya biri akhabiruma mu obwina bukhali nesiakamo ta. 32 Ebise bilia lialiho lituli lia chimbichi mumayilwe khumwikha kwa esikulu. Ebisieno biamwisaya biri abiyamile bingile mumbichi chilia, Yesu wabiyamila okhwingila mumbichi chilia. 33 Ebisieno biarula mumundu wulia biengila mumbichi, charula chimbilo cheekha omwikha chawela munyanja chafwilamo.
34 Lwa abaayi ba chimbichi balengela amakhuwa kakholekha belukha chimbilo, baacha basungila abandu ba mungoba nende mubirekere. 35 Kho abandu barula okhucha balengele kali na kekholekhe, baacha wa Yesu yali banyoola omundu wa ebisieno biali nebimurulilemo, wikhaale abilenje bia Yesu, wufwalile chingubo khandi wubeele munganakani chiiche, oburi bwabatiila. 36 Abandu baliho basunga khuli omundu wali nende ebisieno yahonisibwa. 37 Kho abandu ba musitonye sia Kerasi bamusaba bari arule musitonye siabo sikila oburi bwali bubatilile. Yesu wengila muliaro warekukha waacha.
38 Omundu wa ebisieno biamurulamo yali wusabile Yesu ari amulondekho, nebuchwa wamukalusia nasunga ari, 39 “Kalukha yingo, osungile abandu amakhuwa ka Wele akhukholeele.” Omundu wulia warekukha waacha nasungila abandu mungoba amakhuwa ka Yesu yali namukholeele.
Yesu wasisimusia omukhana wa Yairo nende okhuhonia omukhasi omulwale
(Matayo 9:18-26; Mariko 5:21-43)
40 Lwa Yesu yakalukha, lituli lia abandu liamwakanila, sikila bali bamulindile.
41 Omundu bari Yairo, omukhongo wa sinakoki, wecha wakwa mubilenje bia Yesu, wamwisaya ari achekho munju mumwe, 42 sikila yali nende omwana wuwe omukhana, omutelwa, wa emihika likhumi na kibili yali akana okhufwa.
Lwa Yesu yali nalachichangayo, abandu bali bamwikhumilekho nebamwiminakisiakho. 43 Yalimo omukhasi walichingi nende obulwale bwa okhurula amabanga emihika likhumi na kibili. Yali wachenda khubasilikhi, yilali siwanyola wa okhumuhonia ta. 44 Weecha yinyuma wa Yesu watila khwikemo lia yingubo yiye, amabanga kasinjila okhurula wahona abwene na abwene. 45 Yesu wareeba ari, “Wina wakhandilakho?” Lwa buli omundu wekaana, Petero wasunga ari, “Omwami, lituli lia abandu likhwikhumilekho.” 46 Yilali Yesu wasunga ari, “Omundu yandililekho sikila amani kanduriremo.”
47 Lwa omukhasi wulia yamanya ari sanyala okhwichisa ta, wecha nalateremanga, wakwa yimbeli wa Yesu khandi wasunga yimbeli wa abandu siakila namutilakho, khandi khuli yahonisibwa abwene na abwene. 48 Yesu wamusungila ari, “Mukhana wanje, lisubila lilio likhuhonisie. Cha nende omulembe.”
49 Yesu nasilakaya, omundu okhurula munju ya omukhongo wa sinakoki wecha wasunga ari, “Omukhaana wuwo wufwile, okhanania omwechesi ta.”
50 Nebuchwa, lwa yesu yahulila wakalusiamo ari, “Okharia ta, subila buchwa, alahona.”
51 Lwa yatukha munju siyafuchilila omundu yesi yesi yenjilemo ta, yilali Petero, Yohana, Yakopo, papa wa mwana nende maayi wa omwana. 52 Abandu boosi bali balalilanga nibekhuula omwana wulia, nebuchwa Yesu wasunga ari, “Mukhalila ta, sewufwile ta, alakonanga.” 53 Bamuchekha sikila bali bamanyile bari yali wufwile. 54 Yesu wamutila omukhono wamulanga ari, “Mwana wanje, buukha!” 55 Wakalusia emiuya, khandi wabuukha abwene na abwene. Yesu wabasungila ari bamuhelesie esiakhulia. 56 Abebuli baabe bahuka, nebuchwa Yesu wabakaya ari bakhasungilakho omundu amakhuwa kali nikekholekhe ta.